Yakkasaroyda “Taraqqiyot strategiyasi” uchun takliflar olindi

“Adolat” SDP Yakkasaroy tuman kengashi tashabbusi bilan tumanda joylashgan Toʻqimachilik va yengil sanoat institutida “Oʻzbekiston – inson qadri ulugʻlangan yurt” loyihasi doirasida tadbir oʻtkazildi. “Adolat – inson qadri uchun” mavzusida tashkil etilgan tadbirda deputatlar, partiya faollari, keng jamoatchilik vakillari, institut professor-oʻqituvchilari ishtirok etishdi.

Tadbir davomida 2022-2026-yillarga moʻljallangan Yangi Oʻzbekistonning Taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi loyihasi eʼlon qilinganligi eʼtirof etildi va ushbu davlat Dasturiga tegishli platforma orqali fuqarolarning erkin tarzda jamiyat rivoji uchun muhim boʻlgan takliflarni berishga chaqirildi.

Mamarasul Axmatov, Xalq deputatlari Yakkasaroy tuman kengashi deputati:

— Bugungi tadbir har birimiz uchun katta ahamiyatga ega deb hisoblayman. Negaki, bunda fuqarolarimiz uchun kelgusi yillarga moʻljallangan Davlat Dasturiga oʻz takliflari, fikr-mulohazalarini bildirish imkoniyati berildi. Albatta, bundan oqilona foydalanishimiz kerak. Jamiyat taraqqiyoti yoʻlida xizmat qiladigan dolzarb takliflarni ilgari surmogʻimiz darkor. Oʻzimning asosiy soham taʼlim bilan bogʻliq boʻlganligi uchun undagi mavjud muammo va kamchiliklar boʻyicha takliflarimni bayon etdim.

Mehriniso Yoqubova,

“Adolat” SDP Toshkent shahar Kengashi matbuot kotibi