Yangi davrga qoʻyilgan qadam

Barchamizga yaxshi maʼlumki, bundan bir necha yillar ilgari oʻqituvchilarning mavqeyi sezilarli darajada past edi. Oylik maoshlari juda kam boʻlsa-da, oʻzining vazifasidan tashqari unga yuklatilgan turli qogʻozbozlik, qoʻshimcha boshqa ishlarga ham jalb etilaverishi natijasida oʻqituvchilik kasbini tashlab boshqa sohalarda faoliyat olib borayotganlar ham talaygina edi. Albatta bugungi kunda oʻqituvchining ijtimoiy mavqeyini yuksaltirish, sifatli taʼlim berishlari uchun munosib shart-sharoitlar yaratish borasida salmoqli ishlar amalga oshirildi. Qogʻozbozlik, majburiy mehnat, turli “hasharlar” dan ozod qilindi. Oʻqituvchilarning oylik maoshlari oshib borilishiga erishildi. Ustamalar, imtiyozlar belgilandi.

Shuni mamnuniyat bilan taʼkidlashimiz kerakki, endi oʻqituvchining shaʼni, qadr-qimmati Konstitutsiya darajasiga koʻtarildi. Yangilanayotgan Konstitutsiyamizning 52-moddasida “Davlatning oʻqituvchilar shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qilishi” belgilab qoʻyilmoqda.

Bu normalar mamlakatimizdagi 685 ming nafardan ortiq oʻqituvchilarning professional oʻsishi hamda ijtimoiy va moddiy qoʻllab-quvvatlanishi ularning jamiyatdagi ijtimoiy maqomi, obroʻsini yanada oshirishga xizmat qiladi. Bu esa kelajak avlodlarining sifatli, uzluksiz taʼlim olishlarini kafolatlaydi, chunki, oʻqituvchilarning bor eʼtibori, kuch-quvvati oʻz sohasiga, oʻz ustida ishlashga qaratilgan boʻlsa bu albatta taʼlim sifatining rivojlanishiga katta taʼsir koʻrsatadi. Bu esa oʻz navbatida ularning munosib turmush kechirishini taʼminlashda, pirovard natijada aholi turmush darajasini yaxshilashda va mamlakatimizda ijtimoiy adolatni ustuvor qadriyatga aylantirishda muhim ahamiyatga ega.

Albatta, “Insonga eʼtibor va sifatli taʼlim” deb boshlangan Yangi Oʻzbekistonimizdagi, Yangilanayotgan Konstitutsiyamizning oʻzidayoq, Konstitutsiyaviy tamoyilni “Davlat, Jamiyat va Inson” emas balki “Inson, Jamiyat va Davlat” deb belgilanishining yangi davrga qoʻyilgan qadam deb oʻylayman.

S.Axmedova,

Xalq deputatlari Urgut tuman Kengashi deputati.