“Yangi hayot uchun, yangi Oʻzbekiston uchun!” mavzusida tadbir tashkil etildi

Partiyaning Muzrabot tuman “Ayollar qanoti” Kengashi tomonidan tumandagi 21-umumiy oʻrta taʼlim maktabida maktab pedagog jamoasi ishtirokida Oʻzbekiston Respublikasi Mustaqilligining 32 yilligi munosabati bilan “Yangi hayot uchun, yangi Oʻzbekiston uchun!” mavzusida tadbir tashkil etildi. Tadbirda partiya Muzrabot tuman Kengashi xodimlari, tuman “Ayollar qanoti” Kengashi faollari, maktab jamoasi, BPT aʼzolari va faol yoshlar ishtirok etishdi.

Tadbirda soʻz olganlar tadbirni tashkil etishdan koʻzlangan maqsad, jonajon Oʻzbekistonimiz bu yil oʻz davlat mustaqilligining 32 yilligini keng nishonlash arafasida turganini, oʻtgan shonli yillarda inson qadrini yuksaltirish borasida amalga oshirilgan islohotlar koʻlami va mohiyatini targʻib qilishdan iborat ekanini bildirdi. Bugun mustaqil Oʻzbekistonda barcha soha va tarmoqlarda olib borilayotgan amaliy ishlar inson qadrini yuksaltirishga qaratilgani xususida toʻxtaldi.

Tadbirda maʼruzachilar Yangi Oʻzbekistonimizda istiqomat qilayotgan 130 dan ortiq millat va elatlarning tinch-totuv, ahil-inoqlikda turmush kechirayotgani, ularni oʻzlarini namoyon etishlari uchun birdek teng imkoniyatlar yaratib berilgani masalasiga alohida eʼtibor qaratishdi.

Tadbirda ishtirokchilar yagona Vatan boʻlgan Oʻzbekistonda tinch va osoyishta hayot, yaratib berilayotgan keng imkoniyatlar uchun shukronalik keltirishib, mamlakat mustaqilligini yanada mustahkamlash yoʻlida samarali mehnat qilish, oʻzaro ahillik muhitini yanada yaxshilash orqali oʻz hissalarini qoʻshishga tayyor ekanliklarini bildirishdi.

Abdugʻani Joʻrayev, partiya Muzrabot tuman Kengashi raisi:Bu yil xalqimiz Vatanimiz Mustaqilligining oʻttiz ikki yilligini “Yangi hayot uchun, yangi Oʻzbekiston uchun!” degan bosh gʻoya ostida keng nishonlamoqda. Oʻzbekiston atalmish shu buyuk Vatanga xalqimizning muhabbatini ifodalovchi bu ezgu soʻz har bir xonadonga, har bir yurtdoshimiz qalbiga cheksiz gʻurur, faxr va iftixor bagʻishlaydi. Bu betakror bayram barcha ezgu niyatli insonlarni birlashtiradi, ularning qalbida eng goʻzal va olijanob tuygʻularni uygʻotadi. Shu bois ham mustaqillik bayrami millati, tili va dinidan qatʼi nazar, diyorimizda yashayotgan barcha yurtdoshlarimizning ardoqli va sevimli bayramiga aylandi. Partiya Muzrabot tuman Kengashi tarkibidagi 50 dan ortiq boshlangʻich partiya tashkilotlarida “Yangi Oʻzbekistonda el aziz, inson aziz”! gʻoyasi asosida davra suhbatlari, ochiq muloqot va maʼnaviy-maʼrifiy tadbirlar tashkil etilmoqda. Tumanimizda oxirgi toʻrt – besh yil davomida asrlarga tatigulik bunyodkorlik ishlari amalga oshirildi. Bu oʻzgarishlarning ulugʻvorligini his etish uchun uzoqqa bormay, ayni kunlarda tumanimizning shahar va qishloqlaridagi ulkan bunyodkorlik ishlarida koʻrib, qalban his etish mumkin.

Shuningdek, davra suhbati davomida Oʻzbekiston Respublikasi Prezidentining “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qarori ijrosini taʼminlashda quyi boʻgʻin faollarining jonbozligini yanada oshirish masalalari ham muhokama qilinib, chora-tadbirlar rejasi belgilab olindi.

Zulfiya Bobonazarova,

“Adolat” SDP Muzrabot tuman Kengashi “Ayollar qanoti” faoli.