Yangi Konstitutsiya-farovon hayotimiz uchun huquqiy asos boʻladi

Bugun Termiz shahridagi Abu Ali ibn Sino nomidagi jamoat salomatligi texnikumida Xalq deputatlari Toshkent shahar Kengashi deputati, “Shuhrat” medali sohibi, dotsent, partiya faoli Sobir Turdiyevich Tursunov ishtirokida partiya viloyat Kengashi faollari va deputatlari oʻrtasida “Yangi Oʻzbekistonda yangi tahrirdagi Konstitutsiya” mavzusida yigʻilish boʻlib oʻtdi. Tadbirda “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni yangi tahrirdagi loyihasi boʻyicha atroflicha tushuntirish berib oʻtildi.

Qayd etilganidek, Konstitutsiyaviy qonun loyihasining matni kuni kecha Prezidentimizning Oliy Majlis Qonunchilik palatasi deputatlari va Senati aʼzolari, Oliy sud rahbariyati bilan boʻlib oʻtgan uchrashuvida ham atroflicha muhokama etilib, qoʻllab-quvvatlandi.

Yigʻilishda Yangilanayotgan Konstitutsiya – Yangi Oʻzbekistonni qurish gʻoyasi atrofida butun jamiyatimizni jipslashtirishi, unda barcha qatlam manfaatlari inobatga olinganligi, loyihani ishlab chiqishda keng jamoatchilik, siyosiy partiyalar, jamoat tashkilotlari, ekspertlik va ilmiy doiralar vakillari, ziyolilar faol ishtirok etganligi, alohida taʼkidlandi.

Yigʻilishda umumxalq muhokamalarida 220 mingdan ziyod takliflar kelib tushganligi, takliflarning har toʻrttasidan bittasi loyihadan joy olganligi qayd etildi. Shu maʼnoda yangilanayotgan Konstitutsiya tom maʼnoda xalq Konstitutsiyasi boʻlayotganligi eʼtirof etildi.

Yigʻilishda Konstitutsiyaga kiritilayotgan asosiy oʻzgarishlarning har biri boʻyicha alohida-alohida toʻxtalib oʻtildi, fikr almashildi. Konstitutsiyaviy qonun loyihasi bilan amaldagi Konstitutsiyaga 27 ta yangi modda kiritilayotganligi, moddalar soni 128 tadan 155 taga oshayotganligi, Konstitutsiyamizning amaldagi 275 ta normasi 434 taga koʻpayayotganligi, yaʼni amaldagi Konstitutsiyamiz 65 foizga yangilanayotganligi eʼtirof etildi.

Tadbirda Konstitutsiyaga kiritilayotgan asosiy oʻzgarishlarning har biri boʻyicha alohida-alohida toʻxtalib oʻtildi, fikr almashildi.Xususan, kiritilayotgan oʻzgartish va qoʻshimchalarning siyosiy-huquqiy ahamiyati, koʻlami va hajmidan kelib chiqib, loyihani yangi tahrirda bayon etishga barcha asoslar borligi, shu bois Konstitutsiyaviy qonun loyihasi nomi “Oʻzbekiston Respublikasi Konstitutsiyasi toʻgʻrisida” deb oʻzgartirilgani bildirildi.

Yangilangan Konstitutsiya jamiyatimiz hayotining barcha yoʻnalishlarini kompleks tartibga solish hamda mamlakatimizni demokratik rivojlantirish yoʻlida eng muhim huquqiy poydevor boʻlib xizmat qiladi. Konstitutsiyaviy qonun loyihasiga kiritilgan yangi normalar barcha sohalarni taraqqiy ettirishga, shu jumladan, davlat hokimiyatining yanada samarali tashkil qilinishiga yordam berishi taʼkidlab oʻtildi.

Yigʻilishda deputatlar qayd etganidek, yangilangan Konstitutsiya jamiyatni yanada taraqqiy ettirishga, fuqarolarning huquqlari, erkinliklari va qonuniy manfaatlari toʻlaqonli taʼminlanishiga xizmat qilishi aytib oʻtildi.

Tadbir davomida ishtirokchilar oʻzlarini qiziqtirgan savollariga atroflicha javoblar olishdi.

Gulshod Tursoatova,

Oʻzbekiston “Adolat” SDP

Surxondaryo viloyat Kengashi matbuot kotibi