Yangi Konstitutsiya- inson huquqlari va erkinliklari kafolati

Oʻzbekiston “Adolat” SDP Angor tuman Kengashi va tuman “Yosh adolatchilar qanoti” Kengashi tashabbusi bilan tumandagi 3-IDUM va tumandagi 5-Maktabgacha taʼlim tashkilotida BPTlar faollari va yoshlar ishtirokida “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasining Konstitutsiyaviy Qonuni loyihasi tashviqotiga bagʻishlangan “Jamiyatda yoshlarning siyosiy, huquqiy oʻrni Konstitutsiya bilan kafolatlanadi!” shiori ostida faol yoshlar bilan muloqot tashkil etildi. Tadbirda soʻzga chiqqanlar yangi tahrirdagi Konstitutsiyaning Yangi Oʻzbekiston uchun ahamiyati, unga kiritilayotgan qoʻshimcha va oʻzgarishlar aholining yashash sharoitlari yanada yuksaltirishga, inson qadrini ulugʻlashga xizmat qilishini taʼkidlab oʻtdi.

Shuningdek, Yangi Qomusimizda oila, bolalar va yoshlar uchun alohida bob ajratilayotganligi, Davlat yoshlarda qadriyatlarimizga sodiqlik, vatanparvarlik tuygʻularini shakllanishiga gʻamxoʻrlik qilishi belgilanayotganligi aytib oʻtildi.

Bundan tashqari, yoshlarning taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish – davlatning konstitutsiyaviy majburiyati sifatida kiritilayotganligi ham taʼkidlandi.

Yusuf Halimov, Xalq deputatlari Angor tuman Kengashi deputati:

- Ota-onalarning oʻz farzandlarini voyaga yetguniga qadar nafaqat boqish va tarbiyalash, balki ularning taʼlim olishi, sogʻlom, toʻlaqonli va har tomonlama kamol topishi uchun ham gʻamxoʻrlik qilishi belgilanmoqda. Yana shuningdek, yangi tahrirdagi Konstitutsiya loyihasida davlat fuqarolarning bandligini taʼminlash, ularni ishsizlikdan himoya qilish, shuningdek, kambagʻallikni qisqartirish choralarini koʻrish singari masʼuliyatni ham oʻz zimmasiga olayotgani eʼtiborga molik jihatlardan biridir. Qolaversa, yangilanayotgan Qomusda davlat fuqarolarning kasbiy tayyorgarligini va qayta tayyorlanishini tashkil etishi hamda ragʻbatlantirishi aks ettirilayotgani aytib oʻtilgan. Muloqot yakunida tashkilotchilar barchani referendumda faol ishtirok etishga chorlashdi.

Muhammad Temirov,

Oʻzbekiston “Adolat” SDP Angor tuman “Yosh adolatchilar qanoti” Kengashi raisi.