Yangi Konstitutsiya: Yoshlar mamlakat kelajagi

O‘zbekiston “Adolat” SDP Surxondaryo viloyat Kengashi tomonidan Toshkent Tibbiyot akademiyasi Termiz filialida yangilanayotgan Konstitutsiyamizdagi o‘zgarishlarni aholiga tushuntirish, referendumda faol ishtirok etishga chaqirish maqsadida targ‘ibot tadbiri bo‘lib o‘tdi.Tadbirda O‘zbekiston “Adolat” SDP Siyosiy Kengashi Markaziy apparati xodimlari, partiya viloyat Kengashi vakillari, partiya “Yosh adolatchilar qanoti” Kengashi va “Ayollar qanoti” Kengashi faollari, deputatlar, BPTlar faollari, akademiya professor-o‘qituvchilari, talabalar va OAV vakillari ishtirok etishdi.

Unda O‘zbekiston “Adolat” SDP Siyosiy Kengashi Markaziy apparati bo‘lim mudiri Rayxona Urmanova ishtirok etib, mamlakatimizda amalga oshirilayotgan muhim jarayon 30 aprel kuni bo‘lib o‘tadigan “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha O‘zbekiston Respublikasining referendumi, baxtimiz qomusiga kiritilgan o‘zgarishlar, davlat hokimiyatini tashkil etish asoslari, qonun chiqaruvchi va ijro etuvchi hokimiyat tarmoqlarining maqomi va boshqa sohalardagi mezonlar xususida tushuncha berib o‘tdi. Yangi Konstitutsiyadagi o‘zgarishlarning hayotimizda tutgan o‘rni haqida so‘z yuritdi.

Ta’kidlandiki, bugun mamlakatimiz har jihatdan katta davlatga aylanmoqda. Aholimiz 2040 yilga borib 50 millionga yetadi, jamiyatning yarmidan ko‘pini yoshlar tashkil qiladi. Ularga munosib hayot sharoiti yaratish uchun esa barqaror iqtisodiyot, xavfsiz davlat, samarali boshqaruv, ijtimoiy kafolatlar bo‘lishi lozim.Bular va boshqa ko‘pdan-ko‘p muammolar yechimi mustahkam huquqiy poydevorni – O‘zbekistonning yangilanayotgan Konstitutsiyasini taqozo etadi. Aynan shuning uchun ham yurtimizda Konstitutsiyaviy islohotlar olib borilmoqda.

So‘zga chiqqanlar, Konstitutsiyaviy qonun loyihasini tayyorlash jarayonida 400 dan ortiq xalqaro hujjat, 190 ga yaqin davlatlar konstitutsiyasi puxta tahlil etilganligi xususida so‘z yuritishdi. Xalqaro ekspert va mutaxassislar tomonidan xalqaro huquqning umume’tirof etilgan barcha qoidalarini o‘zida mujassam etgan hujjat sifatida yuqori baholanganligi aytib o‘tildi. Bundan tashqari Konstitutsiyada yoshlar masalasi alohida bob darajasiga olib chiqilishi, Yangi O‘zbekistonda yoshlar siyosati ustuvor ekanligiga yaqqol ishora ekanligini e’tirof etishdi. Oliy ta’lim tashkilotlariga akademik erkinlik berilishi, tanlov asosida davlat hisobidan bepul oliy ma’lumot olinishi, nodavlat ta’lim tashkilotlari qo‘llab-quvvatlanishi to‘g‘risidagi qoidalar yosh avlod hayotini yaxshilashi, ularning orzu-intilishlarini ro‘yobga chiqarishi, zamonaviy mutaxassisliklarni egallagan holda hayotda o‘z o‘rnini topishi va shaxsiy rivojlanishi uchun imkoniyat yaratishini aytib o‘tishdi.

Shundan so‘ng so‘zga chiqqan boshqa ma’ruzachilar, asosiy qonunda har kimning uy-joyli bo‘lish huquqi belgilanayotganligi, ushbu normaning amal qilishi har bir fuqaro, jumladan, yosh oilalarning o‘z boshpanasiga ega bo‘lishini ta’minlab, kishilarning hayotdan rozilik darajasini oshirishi xususida so‘zladilar.. O‘tgan yili mamlakatimizda 50 ming oila uchun yangi kvartiralarolishga sharoit yaratib berilgan bo‘lsa, bu yil 90ming oilani uy-joyli qilish marrasi olingan. Yaqin 2-3yildaesa bu raqamni 200 mingga yetkazish ustida ishlanayotganligi ta’kidlandi.Bundan tashqari, hech kim sudning qarorisiz va qonunga nomuvofiq holda uy-joyidan mahrum etilishi mumkin emasligi, uy-joyidan mahrum etilgan mulkdorga uy-joyning qiymati hamda u ko‘rgan zararlarning o‘rni qonunda nazarda tutilgan hollarda va tartibda oldindan hamda teng qiymatda (bozor qiymatida) qoplanishi ta’minlanishi kafolatlanmoqda.

Shular haqida so‘z borar ekan, bu o‘zgarishlar bizga ko‘proq erkinlik va huquqlarga ega bo‘lishimizga imkon yaratishi ta’kidlandi.Keng jamoatchilik vakillari ishtirok etgan tadbirda xushovoz san’atkorlarning chiqishlari barchaga manzur bo‘ldi.Bir so‘z bilan aytganda, partiyamiz tomonidan tashkil etilayotgan bu kabi targ‘ibot tadbirlari, yurtdoshlarimizning konstitutsiyaviy faolligini oshirish bilan bir qatorda, yangilanayotgan bosh Qonunimizning xalqimizga munosib xizmat qilishida ahamiyatlidir.Uchrashuv so‘ngida faollar barchani xalqimiz taqdiri va ertangi kunini belgilab beradigan tarixiy qonunga befarq bo‘lmasdan, 30 aprelda bo‘lib o‘tadigan referendumda faol ishtirok etishga chaqirishdi.

  Gulshod Tursoatova,

O‘zbekiston “Adolat” SDP

Surxondaryo viloyat Kengashi matbuot kotibi