Yangi Konstitutsiyaga asosan yoshlarga eʼtibor yanada kuchaytiradi

Shu kunlarda Oʻzbekiston “Adolat” SDP tashabbusi bilan konstitutsiyaviy qonun loyihasi mazmun-mohiyati tashviqotiga bagʻishlangan tadbirlar oʻtkazilmoqda.Ularning navbatdagisi partiya Termiz tuman Kengashi va “Yosh adolatchilar qanoti” Kengashi tomonidan tumandagi “Bunyodkor” MFYda joylashgan Agrotexnologiyalar va innovatsion rivojlanish institutida boʻlib oʻtdi. Tadbirda partiya tuman Kengashi va “Yosh adolatchilar qanoti” Kengashi faollari, deputatlar, institut professor-oʻqituvchilari va talabalar ishtirok etishdi. Tadbirda soʻzga chiqqanlar, yangilanayotgan Bosh qomusimiz, unga kiritilayotgan hayotbaxsh yangiliklar haqida oʻz fikr-mulohazalarini bildirishdi. Qayd etilganidek, Konstitutsiyaviy qonun loyihasini tayyorlash jarayonida 400 dan ortiq xalqaro hujjat, 190 ga yaqin davlatlar konstitutsiyasi puxta tahlil etildi.

Xalqaro ekspert va mutaxassislar tomonidan xalqaro huquqning umum eʼtirof etilgan barcha qoidalarini oʻzida mujassam etgan hujjat sifatida yuqori baholangandi.

Tadbirda maʼruzachilar Konstitutsiyada yoshlar masalasi alohida bob darajasiga olib chiqilishi Yangi Oʻzbekistonda yoshlar siyosati ustuvor ekanligi. Oliy taʼlim tashkilotlariga akademik erkinlik berilishi, tanlov asosida davlat hisobidan bepul oliy maʼlumot olinishi xususida aytib oʻtishdi. Nodavlat taʼlim tashkilotlari qoʻllab-quvvatlanishi toʻgʻrisidagi qoidalar yosh avlod hayotini yaxshilash, ularning orzu-intilishlarini roʻyobga chiqarish, zamonaviy mutaxassisliklarni egallagan holda hayotda oʻz oʻrnini topishi va shaxsiy rivojlanishi uchun imkoniyat yaratishini taʼkidlashdi.Uchrashuv soʻngida faollar barchani xalqimiz taqdiri va ertangi kunini belgilab beradigan tarixiy qonunga befarq boʻlmasdan, 30 aprelda boʻlib oʻtadigan referendumda faol ishtirok etishga chaqirishdi.

Zikrillo Bakijonov,

Xalq deputatlari Termiz tuman Kengashi deputati, tuman “Yosh adolatchilar qanoti” Kengashi faoli.