Yangi Oʻzbekiston barchamizniki!

Prezidentimiz Shavkat Mirziyoyev “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qarorni imzoladi. “Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgan tashkiliy-amaliy, maʼnaviy-maʼrifiy tadbirlar hamda targʻibot-tashviqot ishlari dasturi tasdiqlandi.

Bu yil Oʻzbekiston mustaqillik yoʻlini tanlaganiga 32 yil toʻlishi bilan tarix zarvaraqlariga muhrlanadi. Ushbu buyuk neʼmatga erishish yoʻli naqadar murakkab boʻlgani, shunday dorilamon kunlarda yashayotganimizga shukronalar aytish, shu maʼnoda, mustaqillikning qadriga yetishimiz har birimiz uchun ham qarz, ham farzdir.

Bugungi musaffo osmonimiz, dunyo hamjamiyatida oʻzimizga xos mavqega ega boʻlishimiz, eng asosiysi, oʻzimizning ona tilimizda emin-erkin soʻzlab, oʻz taqdirimizni oʻzimiz belgilashimiz, koʻhna tariximiz, boy merosimiz, muqaddas dinimiz, urf-odat va anʼanalarimizning qayta tiklanishi mustaqillikning eng katta inʼomlaridandir, desak mubolagʻa boʻlmaydi.

Istiqlol yillarida iqtisodiy-ijtimoiy, siyosiy, umuman, barcha sohalarda, ayniqsa, oxirgi besh yillikda mamlakat taraqqiyoti, xalq manfaati yoʻlida olib borilgan islohotlar va erishilgan yutuqlar nafaqat xalqimiz, xalqaro hamjamiyat tomonidan ham alohida eʼtirof etilmoqda. Albatta, bunday yutuqlarga erishishimizning asosiy sababi barcha islohotlar zamirida xalq davlat idoralariga emas, balki davlat organlari xalqimizga xizmat qilishi kerakligi, odamlarning ertaga emas, bugun yaxshi yashashi muhimligi bosh shior etib olinganidir. Eng asosiysi, xalqimiz ijobiy oʻzgarishlarni oʻz hayotlarida his qila boshladi va shu sababdan davlatimiz tomonidan olib borilayotgan islohotlarni qoʻllab-quvvatlagan holda yagona maqsad yoʻlida mushtarak boʻlib odimlashda davom etmoqda.

Inson uchun hamisha uning huquqi, erkinligi va qonuniy manfaatlaridan muhim qadriyat boʻlmagan. Mamlakatimizda aynan bu borada keng koʻlamli demokratik islohotlar amalga oshirilmoqda. Hech kimga sir emas, bir necha yillar muqaddam Oʻzbekistonda inson huquqlari holati xalqaro hamjamiyat va tashkilotlar tomonidan qattiq tanqidga olinar, bu nafaqat yurtimiz nufuziga, balki mamlakatimiz iqtisodiy rivojiga ham salbiy taʼsir koʻrsatar edi.

Taʼkidlash lozim, mazkur yoʻnalish boʻyicha amalga oshirilgan chora tadbirlar, eng avvalo, Oʻzbekistonning ochiqlik siyosati, inson huquqlari boʻyicha faoliyat olib boradigan tashkilotlar bilan yaqindan hamkorlik oʻrnatish hamda mazkur sohada xalqaro hujjat meʼyorlarini milliy qonunchilikka bosqichma bosqich implementatsiya qilinayotgani oʻz mevasini bera boshladi.

Tarix zarvaraqlariga muhrlanayotgan soʻnggi besh-olti yil mamlakatimizda koʻpgina jabhalar qatorida soʻz va matbuot erkinligini taʼminlash, jurnalistlarni qoʻllab-quvvatlash borasida ham juda samarali yil boʻldi.

Dadil aytishimiz mumkin, bugun matbuotda biron-bir cheklov yoʻq. Aksincha, soʻz erkinligini taʼminlashda, qoʻllab-quvvatlash borasida yangidan-yangi imkoniyatlar yaratib berilmoqda. Ayniqsa, elektron ommaviy axborot vositalari, saytlar, Telegram kanallari shiddat bilan rivojlanmoqda. Jurnalist va blogerlarni qoʻllab-quvvatlash uchun Milliy masmediani qoʻllab-quvvatlash jamoat fondi samarali faoliyat olib bormoqda.

Mamlakatimizda matbuot va ommaviy axborot vositalariga koʻrsatilayotgan eʼtibor yildan-yilga oshib borayotgani, yurtimizda kechayotgan keng qamrovli tarixiy islohotlar mazmun-mohiyatini xalqimizga yetkazishda jurnalist masʼuliyati xususida soʻz yuritganda, mamnuniyat bilan ayta olamizki, ommaviy axborot vositalari bugungi real voqeliklarni ochiq-oydin yoritish bilan cheklanib qolmasdan, istiqbolda nimalar kutayotganini yaqqol tasavvur qilishimizga ham koʻmaklashmoqda va ertangi kunga ishonchimizni yanada mustahkamlashga xizmat qilmoqda.

Yuqorida sanab oʻtilgan eʼtiroflar birgina sohada erishilgan yutuqlarning bir qismi, xolos. Bu haqda boshqa sohalarda erishilgan va erishilayotgan natijalar haqida Vatanimiz mustaqilligining 32 yilligi arafasida uzoq gapirish mumkin. Eng muhimi, mamlakatimiz xalqi islohotlar natijalarini oʻtayotgan har bir kunida his qilib, tinch va osoyishta hayotiga shukrona keltirib yashamoqda. Zero, bosh maqsad odamlarni rozi qilishdir.

Rustam Hamrayev,

O‘zbekiston “Adolat” SDP

Surxondaryo viloyat Kengashi raisi.