Yangi O‘zbekiston barkamol yoshlar qo‘lida

 Bugun  “Adolat” SDP Qashqadaryo viloyat va Qarshi shahar Kengashi tomonidan  Yoshlar markazi tadbirgohida “Yangi O‘zbekiston barkamol yoshlar qo‘lida” mavzuida tadbir bo‘lib o‘tdi. Unda yoshlar, ommaviy axborot vositalari vakillari, partiya faollari  qatnashdi. Tadbirda partiya viloyat Kengashi raisi, xalq deputatlari Qashqadaryo viloyat Kengashi deputati Ruiddin Raupov ma’ruza qildi.

- Davlatimiz rahbari boshchiligida  mamlakatimizda yoshlar uchun yaratilayotgan sharoit va imkoniyatlar ko‘lami nihoyatda katta ,-dedi Ruiddin Raupov.- O‘z maqsadlariga yetishda dadil va doim yangilik sari intiluvchi navqiron  yoshlar bizning faxrimiz va g‘ururimizdir. Ular hamisha  bizga kuch beradi, iftixor bag‘ishlaydi. Prezidentimizning mamlaktimiz mustaqilligining 32 yillik bayramiga tayyorgarlik ko‘rish va uni yuqori saviyada o‘tkazish to‘g‘risidagi qarorida ham yoshlarga yaratib berilayotgan katta imkoniyatlar, ayniqsa so‘nggi yillarda yoshlar bandligini ta’minlash, ularni turli yo‘nalishdagi tadbirkorlikka jalb qilish, iqtidorli o‘g‘il-qizlarimizni har tomonlama qo‘llab-quvvatlash borasida anchagina ishlar qilinganligi e’tirof etilgan.

- Ajdodlarimiz istiqlolni bir umr orzu qilib yashadilar,-dedi xalq deputatlari viloyat Kengashi deputati Dilrabo Temirova.- Albatta mustaqillikka yo‘qotishlar, qurbonlar evaziga erishildi. Istiqlol bergan ne’matlardan bugun har bir yurtdoshimiz bahramand bo‘layotir. Shuning uchun ham hozirigi dorilomon kunlar, ozodlikni asrab istiqbolga farzandlarimizga yetkazish har birimizning vazifamizdir. Yangi O‘zbekiston yoshlar qo‘lida. Biz kelajagi buyuk davlatni albatta yoshlarimiz fidoiyligisiz, ularning bevosita ishtirokisiz tasavvur eta olmaymiz.

Tadbirda boshqa so‘zga chiqqanlar ham mustaqillik yillarida yoshlarning ta’lim olishi, kasb-hunar egallashi, bandligini ta’minlash, orzu istaklarini ro‘yobga chiqarish uchun katta ishlar qilinganini ta’qidlashdi. Shuningdek yangilangan Konstitutsiyamizda ham yoshlarning huquq va manfatlari himoyalangan.

Tadbir savol-javob asosida tashkil etilgani bois yoshlar o‘zlarini qiziqtirgan barcha masalalar yuzasidan tegishli javoblarni olishdi.

                                                                     Gulnoza Radjabova,

“Adolat” SDP  Qashqadaryo viloyat Kengashi raisi o‘rinbosari