Yangi Oʻzbekiston yoshlari yurtga tayanch boʻladi, yorqin kelajakni taʼminlaydi

Dunyo tahlilchilari Prezidentimizning Birlashgan Millatlar Tashkiloti 78-sessiyasidagi maʼruzasi ahamiyatini yuqori baholashmoqda. Ayniqsa, davlatimiz rahbari tomonidan global va mintaqaviy ahamiyatga ega masalalar va ularning yechimi aniq maʼlumotlar asosida koʻrsatib oʻtilgani jahon jamoatchiligining eʼtiborini Oʻzbekistonga qaratdi. Hozirgacha BMTning 6ta rezolyutsiyasi Oʻzbekiston tashabbusi bilan qabul qilingani ham xalqaro umum-eʼtirof etadigan gʻoyat muhim masala hisoblanadi.

Prezidentimiz Markaziy Osiyo mamlakatlari aholisini jiddiy qiynab kelayotgan Orol dengizi muammosini oʻrtaga koʻndalang qoʻygani ham qizgʻin muhokamalarga sabab boʻldi. Bundan tashqari, maʼruzada tinchlik va taraqqiyot haqida fikr yuritilgani, iqlim oʻzgarishlari, ularni jahon jamoatchiligi ishtirokisiz hal etish mushkulligi ham bor gap. Yangi Oʻzbekistonda huquqiy ijtimoiy va dunyoviy davlat barpo etish uchun eng avvalo mamlakat tarixida ilk bor umumxalq referendumi boʻlib oʻtdi. Yangi Oʻzbekistonning yangi Konstitutsiyasi qabul qilindi. Davlatimiz rahbari tashabbusi bilan Oʻzbekiston -2030 strategiyasi ishlab chiqildi. Kambagʻallikni qisqartirish uchun keng qamrovli ishlar amalga oshirilyapti.

Prezidentimizning xalqaro tashkilot minbaridan turib “Oʻzbekistonda xalq paxta qulligidan ozod etildi” deya baralla aytgan gaplari chin maʼnoda tahsinga sazovordir. Mamlakatimizda majburiy mehnatga barham berildi. Xotin-qizlarning huquqiy himoyasi, gender tengligi masalasi davlat siyosatining ustuvor yoʻnalishlaridan biriga aylandi. Shu oʻrinda davlatimiz rahbari dunyo jamoatchiligi eʼtiborini iqlim oʻzgarishlari, bioxilma-xillik, atrof muhit ifloslanishi, masalasiga qaratib, bu kabi muammolarni birgalikda, hamkorlikda bartaraf etishga chaqirdi. Oʻzbekiston yashil taraqqiyot tarafdori ekanligini eʼtirof etdi.

Prezidentimiz davlatimiz siyosatining eng muhim boʻgʻinlaridan biri sifatida yoshlar masalasiga qayta-qayta murojaat qiladi. Maʼruzada ham Oʻzbekiston tashabbusi bilan Markaziy Osiyo yoshlari oʻrtasida turli yoʻnalishlarda tadbirlar oʻtkazib kelinayotganini alohida taʼkidladi. Oʻzbekistonda yoshlar kelajagi davlat rahbarining doimiy eʼtiborida ekanligini amaliy ifodasi sifatida Shavkat Miromonovichni Amerikada taʼlim olib faoliyatini davom ettirayotgan Oʻzbekistonlik yoshlar bilan uchrashuvi, ularning takliflarini diqqat bilan eshitib, tegishli vazirliklarga zarur topshiriqlar bergani koʻpchilikni toʻlqinlantirdi. Shuningdek, davlatimiz rahbari oʻzi uchun ajratilgan qarorgohda juda koʻplab xalqaro kompaniyalar rahbarlari bilan muloqot uyushtirib, Oʻzbekistonga investitsiya kiritishga qulay muhit yaratilganini uchrashuv davomida tushuntirib oʻtgani ham yaxshi samara berdi. Juda koʻplab investorlar Prezidentimiz bilan samimiy muloqotdan soʻng, vatanimizga sarmoya kiritadigan boʻlishdi.

Oʻzbekiston mustaqil taraqqiyot yoʻlidan dadil odimlamoqda. Yaqin kelajakda jahon savdo tashkilotiga aʼzo boʻlib, barcha jabhada yuksalishlar kuzatiladi. Buning uchun istiqboli porloq Yangi Oʻzbekiston yoshlari yurtga tayanch boʻladi, yorqin kelajakni taʼminlaydi.

                                                    Ruiddin Raupov,

 “Adolat” SDP Qashqadaryo viloyat Kengashi raisi,

xalq deputatlari viloyat Kengashi deputati.