Yangilanayotgan Konstitutsiya: poytaxtda yashashni istaysizmi, marhamat!

Kechagidek yodimda. Oliygohni tamomlagach oʻz yoʻnalishimda izlanishni, ilm olishni davom ettirish maqsadida Toshkentda yashashga qaror qilgandim. Ota-onam menga qarshi chiqmasalar-da bu muammo ekani, viloyatlardan borganlar uchun poytaxtda yashashga osonlik bilan ruxsat berilmasligini aytdilar. Shunga qaramay maqsadim yoʻlida chekinmadim. Biroq ana shu turarjoy masalasi, yaʼni “propiska” deganlari meni ikki yil qiynadi, rejalarim oldida kuchsizga aylandim.

Qarangki, yangi tahrirdagi Konstitutsiyamizda bu muammo yechimini topmoqda. 32-moddada qayd etilganidek, “Qonuniy asoslarda Oʻzbekiston Respublikasi hududida boʻlib turgan har kim mamlakat boʻylab erkin harakatlanish, turar va yashash joyini tanlash huquqiga ega, bundan qonunda belgilangan cheklovlar mustasno”.

Yuqoridagilardan koʻrinib turibdi, endi poytaxtda yashashni istovchilarga toʻsiq boʻlmaydi. Farzandlarimiz uchun istagan joyida yashash va maʼlum bir mashgʻulot bilan shugʻullanish imkoniyati yaratilmoqda. Shunday ekan, barchamiz 30-aprelʼ kuni boʻladigan referendumda faol ishtirok etib, qonun loyihasini qoʻllab-quvvatlaymiz.

Maloxatxon Musayeva,
“Adolat” SDP Andijon viloyat kengashi raisi oʻrinbosari.