Yangilanayotgan Konstitutsiya — taraqqiyot kafolati

Bugun Xalqimiz, xalqaro hamjamiyat “Yangi Oʻzbekistonga – yangilangan Konstitutsiya” lozimligini eʼtirof etmoqda. Zero, har qanday islohot kuchli konstitutsiyaviy-huquqiy asosga tayansagina, koʻzlangan ezgu maqsadga va ulugʻvor vazifalarga, samarali natijalarga erishadi. Huquqiy soha rivoji islohotlar shiddatidan ortda qolsa – bu jamiyat va davlat inqiroziga olib kelishi mumkinligini jahon davlatlari tarixidan ham koʻrishimiz mumkin. Bugungi kunda yurtimizda ayni shu maqsadda Konstitutsiyaviy islohotlar oʻtkazilmoqda.

Shu munosabat bilan “Adolat” sotsial-demokratik partiyasi tomonidan respublikamizning har bir hududlarida davra suhbatlari, uchrashuvlar, maʼnaviy-maʼrifiy tadbirlar tashkil etilmoqda.

Mana shunday tadbirlardan biri “Adolat” SDP Jizzax viloyat Kengashi tomonidan Jizzax politexnika institutining tadbirlar zalida tashkil etildi. “Konstitutsiyaviy islohotlar – inson shaʼni va qadr-qimmati uchun” mavzusida boʻlib oʻtgan ushbu tadbirda partiyaning Siyosiy Kengashi raisi Bahrom Abduhalimov, partiyaning viloyat, shahar va tuman Kengashlari xodimlari, institutining professor oʻqituvchi va talabalari, xalq deputatlari viloyat, tuman va shahar Kengashlari deputatlari, soha mutaxassislari, keng jamoatchilik hamda OAV vakillari ishtirok etishdi.

Tadbirni ochib berish uchun soʻzga chiqqan partiyaning viloyat Kengashi raisi Orif Shukurov Konstitutsiyaga kiritilayotgan oʻzgartirish va qoʻshimchalar Yangi Oʻzbekistonda amalga oshirilayotgan islohotlarning davomiyligini taʼminlashda mustahkam huquqiy poydevor boʻlishi, har bir yangi norma, avvalambor, inson va uning huquqlarini kafolatlashga qaratilgani boʻyicha oʻz fikr-mulohazalarini bildirib oʻtdi.

Shundan soʻng soʻzga chiqqan partiya Siyosiy Kengash raisi Bahrom Abduhalimov tomonidan yangi tahrirdagi Konstitutsiya xalqimiz uchun gʻoyat ahamiyatli boʻlib, adolatli jamiyat qurish yoʻlidagi ulkan qadam ekanligi, Bosh Qomusimizning mamlakatimiz hayotida tutgan oʻrni, unga kiritilayotgan yangi qoʻshimcha va oʻzgarishlar xalqimizning turmush farovonligiga, inson qadrining yuksalishiga xizmat qilishi, qolaversa, inson huquq va erkinliklarini taʼminlash davlatning oliy majburiyati etib belgilanayotgani taʼkidlab oʻtildi. Mazkur norma butun Konstitutsiya mazmuniga singdirilganligi, inson huquq va erkinliklari qonunlar, davlat organlari va ular mansabdor shaxslari faoliyatining mazmun-mohiyatini belgilab berishi eʼtirof etildi.

Darhaqiqat, yangilanayotgan Konstitutsiyada insonga eʼtibor, uning qadrini ulugʻlash, har bir fuqaroga gʻamxoʻrlik qilish masalasi davlat va jamiyatning asosiy burchi ekanligi mustahkamlanib qoʻyilmoqda. Qolaversa, insonlarni farovon yashashlari, kambagʻallikni qisqartirish, bandlikni taʼminlash, ishsizlikdan himoya qilish boʻyicha davlat oʻziga qator yangi majburiyatlar olishi koʻzda tutilgan.

Shuningdek, davra suhbatida soʻz olgan tadbir ishtirokchilari tomonidan Yurtboshimiz boshchiligida xalqimiz yangidan-yangi marralarni zabt etayotgani, koʻz oʻngimizda mamlakatimiz jahonga yuz tutayotgani, mazkur oʻzgarishlarni nafaqat biz, balki chet elliklar ham eʼtirof etayotgani, eng muhimi, yurtdoshlarimizning dunyoqarashi yangilanib, ular ham islohotlarning faol ishtirokchisiga aylanayotgani eʼtirof etildi.

Qizgʻin munozaralar ostida oʻtgan mazkur tadbirda ishtirokchilarning savollariga tashkilotchilar tomonidan batafsil javoblar berildi.

“Adolat” SDP Jizzax viloyat Kengashi
Matbuot xizmati