Yangilangan Konstitutsiya – jamiyat taraqqiyotining mustahkam huquqiy asosi

Yangilanayotgan Konstitutsiya loyihasi boʻyicha oʻtkaziladigan referendumga tobora oz muddat qolmoqda. Namanganda ham bu muhim siyosiy tadbirga puxta tayyorgarlik koʻrilmoqda. Aholi oʻrtasida olib borilayotgan targʻibot ishlarida “Adolat”chilar ham faol qatnashmoqdalar.

— Targʻibotchilarni zarur materiallar va qoʻllanmalar bilan taʼminlash diqqat markazida turibdi, — deydi partiya viloyat kengashi raisi Isroiljon Joʻrayev. – Chunki busiz taʼsirchanlikka va samaradorlikka erishib boʻlmaydi. “Adolat” gazetasining har bir yangi soni targʻibotchilar qoʻliga bormoqda. “Yangilangan Konstitutsiya: 100 savolga 100 javob” kitobi ham ularga juda qoʻl kelmoqda. Olimlar, ekspertlar bilan uchrashuvlar nazoratchilar bilimlarni mustahkamlashga koʻmaklashmoqda.

Yaqinda partiyamiz faollari va targʻibotchilardan iborat katta bir guruh viloyat markazida tashkil etilgan “Davlat hokimiyatini tashkil etish tizimini yanada isloh etishning konstitutsiyaviy-huquqiy asoslarini takomillashtirish” mavzusidagi xalqaro davra suhbatida ishtirok etdi.

Unda Oliy Majlis Qonunchilik palatasi deputatlari, Senat aʼzolari, xalqaro ekspertlar, olimlar, sudyalar, mahalliy kengashlar deputatlari hamda OAV vakillari ishtirok etdi.

Taʼkidlanganidek, soʻnggi yillarda mamlakatimizda jamiyat hayotining barcha jabhasida tub oʻzgarishlar, izchil va keng koʻlamli islohotlar amalga oshirilyapti.

Yangilanayotgan Konstitutsiyamizda mamlakatimizning uzoq muddatli taraqqiyoti, xalqimizning ertangi farovon hayoti uchun mustahkam huquqiy asos hamda ishonchli kafolat sifatida Oʻzbekiston “suveren, demokratik, huquqiy va ijtimoiy davlat” ekanligi hamda ushbu prinsipial qoidalarni oʻzgartirish mumkin emasligi alohida belgilab qoʻyilmoqda.

“Adolat” SDP Namangan viloyat Kengashi
matbuot xizmati.