Yangilangan konstitutsiya taraqqiyot tayanchi

2023-yil 30-aprel. Endi bu sana mamlakatimiz tarixida qoladi. Chunki shu kuni xalqimiz yangilangan Konstitutsiyaga oʻz munosabatini bildirdi. Mazkur huquqiy hujjat yurtimizning kelgusi taraqqiyoti uchun muhim tayanch va asos boʻlib qolish shubhasiz.

— Barcha partiyadoshlarimiz ushbu ulkan siyosiy ahamiyatga ega boʻlgan voqeaga daxldor ekanligimizdan nihoyatda baxtiyormiz, — deydi “Adolat” SDP Namangan viloyat Kengashi raisi Isroiljon Joʻrayev. Safdoshlarimiz referendumga tayyorgarlik koʻrishi va oʻtkazishida munosib ishtirok etdilar. Ayniqsa, targʻibot tadbirlari keng koʻlam kasb etib, ularga oʻng minglab aholi qatnashdi. Partiya xodimlari, deputatlar, faollarimiz yangilangan Asosiy qonun loyihasini ommaga atroflicha tushuntirib berdilar.Namanganlik “adolat”chilar referendum kuni ham qizgʻin ish olib bordilar. 277 ta uchastkada kuzatuvchilar faoliyat koʻrsatdi. Abbosbek Usmonxoʻjayev – ana shularning biri. Namangan shahar partiya kengashidagi “Yosh adolatchilar” qanoti yetakchisi, “Yoshlar parlamenti” aʼzosi.

— Men viloyat markazidagi 34-referendum uchastkasida kuzatuvchi boʻldim, — deydi A. Usmonxoʻjayev. – Xalqimiz Konstitutsiyani yangilash, gʻoyasini qoʻllab-quvvatlaganiga shohid boʻldim. Chunki yurtdoshlarimiz koʻtarinki kayfiyatda ovoz berish uchun keldilar ularning aksariyati bilan suhbatlashganimizda, mamlakatda amalga oshirilayotgan islohotlardan xursandliklarini bildirdilar. Oʻzbekistoning barcha mintaqalarida boʻlgani kabi Namanganda ham referendum muvaffaqiyatli yakunlandi.

Nurbek Abdullaev,

“Adolat” SDP Namangan viloyat kengashi matbuot kotibi.