Yangilangan Konstitutsiyamiz yoshlar nigohida

Konstitutsiya-Bosh qonunimiz. Uni oʻrganish har birimizning fuqarolik burchimiz. Oʻzbekiston “Adolat” SDP tomonidan anʼanaviy ravishda oʻtkazib kelinayotgan “Konstitutsiya bilimdoni” koʻrik-tanlovi ham ayni shu maqsadga qaratilgan.

Amaldagi yilda yangilangan Konstitutsiyamiz asosida oʻtkazilayotgan mazkur tadbir bu yil yoshlarda katta qiziqish uygʻotmoqda. Koʻrik-tanlovning Andijon mashinasozlik instituti qoshidagi akademik litseyda oʻtkazilgan Andijon shahar bosqichi ishtirokchi-oʻquvchilar bilan birga ularning ustozlari va ota-onalari uchun ham oʻziga xos bilimlar sinovi boʻldi.

Tadbir avvalida soʻz olgan Oʻzbekiston “Adolat” SDP Andijon viloyati kengashi raisi oʻrinbosari Maloxatxon Musayeva respublikamizda navqiron avlodni har jihatdan sogʻlom va barkamol insonlar etib tarbiyalash, ularning siyosiy-huquqiy madaniyati, ijtimoiy faolligini oshirishga alohida eʼtibor qaratilayotganini, Konstitutsiyamizni oʻrganishga boʻlgan eʼtibor fuqarolarning huquqiy madaniyatini oshirishga xizmat qilishligini taʼkidladi.

Belgilangan shartlarni bajarishda ishtirokchilar Konstitutsiyamizni hayotimizdagi oʻrni va ahamiyatiga doir bilim va tushunchalarini sinovdan oʻtkazdilar. Bosh Qonunimizga oʻz munosabati va sahna madaniyatini koʻrsatdilar. Amaldagi yilda kiritilgan oʻzgarishlarni ham chuqur oʻrganganliklari tadbirga tashrif buyurganlar tomonidan olqishlandi.

Koʻrik-tanlov yakunida ishtirokchilar orasidan gʻolib aniqlandi. Bunday sharaf Andijon mashinasozlik instituti qoshidagi akademik litsey oʻquvchisi Madina Joʻraboyevaga nasib etdi. Endi u viloyat bosqichida ishtirok etadi.

“Adolat” SDP Andijon viloyati kengashi

Matbuot xizmati.