Yosh avlod kamoloti yo‘lida

Yoshlarning komil inson bo‘lib voyaga yetishi mamlakatning porloq kelajagi garovi. Albatta, yosh avlod tarbiyasi masalasi bugun har qachongidan ham dolzarb ekanligini unutmagan holda, bu borada xotin-qizlarning o‘rni alohida ekanligini ham taʼkidlab o‘tishimiz darkor. Zero, jismonan barkamol, maʼnaviy-maʼrifiy, ruhan yuksak bo‘lgan ayollarimiz, onalarimiz  jamiyatimizga har qachongidan ham keraklidir.

Chunki bola xoh qiz, xoh o‘g‘il bo‘lsin, asosan, ona yonida bo‘ladi, uning hayot haqidagi tasavvurlari ona tarbiyasi tufayli shakllanadi va ko‘pgina xususiyatlari unga ona suti bilan o‘tadi. Ona farzandini  homilalik davridayoq tarbiyalashni boshlaydi.    

Axborot makonida maʼnaviy terror avj olayotgan pallada onalarning sog‘lom fikri, dunyoqarashi maʼrifati millat uchun nihoyatda ahamiyatlidir. Bugun qurol-yarog‘dan ko‘ra mafkuraviy urushlar, maʼnaviyatga tahdidlar kuchayib borar ekan, bu tahdidlar taʼsiridan jamiyatni asrash vazifasi oilalardan boshlanmog‘i kerakligi asosiy masalaga aylandi. Vaholanki, onalar tom maʼnoda Vatan, millat,  o‘zligimiz himoyachilaridir.  Bu jihatlar ular tarbiya qilayotgan farzandlar sadoqati, mehnati, fidokorligida namoyon bo‘ladi.

Alisher Navoiy hazratlari ayollarga “Mahbub ul-qulub” asarining o‘ttiz yettinchi “Kadxudolig‘ sifati va xotunlar zikrida” degan faslida “Muvofiq tushsa kadbonu, davlat va jamiyatg‘a bo‘lmoqdurur hamzonu” deya taʼrif beradilar. Yaʼni, kadbonu, uyning bekasi muvofiq – risoladagiday bo‘lsa, davlat va jamiyat bilan yonma-yon, yelkama-yelkadir. Davlat va jamiyat oldida bugungi zamonaviy ayolning masʼuliyati, vazifalari ortib borayotganligi bejiz emas.

Farzandining, nafaqat farzandining, jamiyatdagi barcha farzandlarimizning yot g‘oyalar taʼsiriga berilmasligi, aldovlarga uchmasligi, to‘g‘ri yo‘ldan toymasligi uchun millat onalarining zimmasidagi masʼuliyat zalvorlidir. Bejiz Vatan so‘zi Ona so‘zi bilan uyqash emas. Har tong uyg‘onib ko‘rgan qadrdon uyini, quvonch-la kutib olgan, har go‘shani gulga bezagan ona yurt bahorini, tansiq mevalar tutgan mehri qaynoq yozini, oltin kuzini, sokin uyqularga cho‘mgan oppoq qishlarining qiyosi yo‘q.  Va uning har mujdasi ona bilan bog‘liqdir. 

 Qolaversa, eng avvalo, millat onalari o‘zlarini chuqur isloh qilishlari,  adolat,  tenglik, to‘g‘rilikni hayotiy pozitsiyaga aylantirmog‘i zarur. Zero, Ona suti bilan kirgan ishq – Vatanga muhabbat haqiqiy bo‘ladi! Demak, oilada, jamiyatda ayolning  maqomi baland bo‘lsa, millatning ko‘ksi osmon bo‘ladi. Ayolga munosabatimiz bizning kimligimizni anglatadi, kelajagimizni belgilaydi.

O‘z o‘rnida bu jihatlar O‘zbekiston  “Adolat” sotsial demokratik partiyasining saylovoldi dasturi loyihalarida  o‘z aksini to‘la topganligi partiya maqsad hamda vazifalarining hayotiy va xalqchil ekanligidan dalolatdir.

Muhiba Bababekova,

Xalq deputatlari Samarqand shahar Kengashi deputati