Yosharayotgan diabetga yoʻl bermaymiz

Keyingi yillarda dunyo ahlini tashvishga solayotgan qandli diabet kasalligi yosharib borayotgani tashvishli. Uning oldini olish birgina tibbiyot xodimlarining qoʻlida emas. Agar barchamiz bir boʻlsak xastalikka yoʻl bermaymiz.

Butun dunyo diabetga qarshi kurash kuni munosabati bilan Oʻzbekiston “Adolat” SDP Andijon viloyati kengashi tomonidan tibbiyot xodimlari va jamoatchilik vakillari ishtirokida “Yosharib borayotgan qandli diabetga qarshi birgalikda kurashamiz!” mavzusida oʻtkazilgan davra suhbati shu mavzuga bagʻishlandi. Tadbir avvalida soʻz olgan “Adolat” SDP Andijon viloyati kengashi raisi oʻrinbosari Maloxatxon Musayeva har qanday kasallikni oldini olish insonning oʻz qoʻlida ekani, qandli diabet yosharib borayotgani va bu borada tushuntirish ishlarini kuchaytirish lozimligini taʼkidladi. Oʻz oʻrnida tibbiyot xodimlari zimmasidagi vazifalarga toʻxtaldi.

Davra suhbatida soʻz olgan soha xodimlari birinchi navbatda tibbiy madaniyatni yuksaltirish, kasallikka qarshi kurashishni oiladan boshlash zarurligiga yigʻilganlar eʼtiborini qaratdilar. Oʻz safida koʻplab tibbiyot xodimlarini birlashtirgan “Adolat” SDPning haftani bir kunini qandli diabetga qarshi kurashish kuni, deb eʼlon qilganini qoʻllab-quvvatladilar.

Tadbir qatnashchilari masalaning dolzarbligidan kelib chiqib bu borada birgalikda ish olib borishga qaror qildilar.

“Adolat” SDP Andijon viloyati kengashi

Matbuot xizmati.