Yoshlar davlat himoyasida

Bugun yurtimizda yoshlarni har jihatdan qo‘llab-quvvatlash davlat siyosati darajasiga ko‘tarilib, yangilanayotgan Konstitutsiyada ham ko‘plab soha va yo‘nalishlar qatorida yoshlar masalasiga alohida ustuvorlik berilgan. Partiya Denov tuman Kengashi hamda partiya tuman «Yoshlar adolatchilar qanoti” Kengashi tomonidan tumandagi 75-sonli umumta’lim maktabida Yangi Konstitutsiya loyihasi targ‘iboti yuzasidan davra suhbati tashkil etildi. Tadbirda partiya tuman Kengashi va “Yosh adolatchilar qanoti” Kengashi faollari, deputatlar, faxriy o‘qituvchilar, tuman IIB xodimlari, maktab pedagog-o‘qituvchilar, BPT faollari hamda yuqori sinf o‘quvchilari ishtirok etishdi.Unda so‘z olganlar asosiy e’tiborni “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasida yoshlarga oid qator normalar o‘z ifodasini topayotganiga qaratishdi.

Orif Qilichev, Xalq deputatlari Denov tuman Kengashi deputati:

-  Yangi tahrirdagi Konstitutsiyaning qabul qilinishi bilan davlat o‘z zimmasiga yana bir mas’uliyatni olmoqda. U ham bo‘lsa, davlat yoshlarni o‘z himoyasiga olishi masalasi. Yoshlar huquqlari aks etayotgan alohida moddaga ko‘ra, davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini ta’minlaydi. Ularning jamiyat va davlat hayotida faol ishtirok etishini rag‘batlantiradi. Shuningdek, davlat yoshlarning ma’naviy, intellektual, ijodiy, jismoniy va axloqiy jihatdan shakllanishi hamda rivojlanishi uchun, ularning ta’lim olishga, sog‘lig‘ini saqlashga, uy-joyga, ishga joylashishga, bandlik va dam olishga bo‘lgan huquqlarini amalga oshirish uchun shart-sharoitlar yaratib berishi belgilanmoqda. Yangilanayotgan Konstitutsiyada yoshlarning sifatli ta’lim olishi, ishga joylashishi, uy-joyga ega bo‘lishiga alohida e’tibor qaratilmoqda. O‘zaro qizg‘in tarzda kechgan suhbatda ishtirok etgan qatnashchilar mavzu doirasida o‘zlarini qiziqtirgan barcha savollarga mutaxassislardan batafsil javoblar olishdi. Yurtimizda kechayotgan Konstitutsiyaviy islohotlar jarayoniga befarq bo‘lmasdan, umumxalq referendumida faol ishtirok etishga chorlashdi.

Mashrab Anorov,

O‘zbekiston “Adolat” SDP Denov tuman “Yosh adolatchilar qanoti” Kengashi raisi.