Yoshlar korrupsiyasiz jamiyat tarafdori!

Korrupsiya zamonaviy dunyoda jamiyat va davlat manfaatlariga bevosita daxldor boʻlgan xavfli ijtimoiy hodisalardan biridir. Bugungi yoshlar ushbu illatga qarshi kurashuvchiga aylanishi zarur.

Korrupsiyaga qarshi kurashish bir qancha qiyinchiliklar tugʻdiradi, chunki bunda ikkala tomon ham aybdor boʻlib, ongli ravishda oʻz manfaatlarini koʻzlagan holda jinoyatni amalga oshiradi. Bu holatda qonun nafaqat oluvchi tomonidan, balki pora beruvchi tomonidan ham buziladi. Bugungi kunga qadar korrupsiya rivojlanishini cheklaydigan koʻplab qonunlar qabul qilingan, ammo bu vaziyatda insonning maʼnaviy qadriyatlari ham katta rol oʻynaydi. Korrupsiyaning oldini olish, unga barham berishda faqat davlat va hukumatning kuchi bilangina erishib boʻlmaydi. Shuning uchun mazkur ijtimoiy illatga qarshi butun jamiyat, barcha fuqarolar kurashmogʻi zarur.

Muhtaram Prezidentimiz davlat boshqaruvining eng birinchi kunlaridanoq imzolagan qonuni yaʼni 2017 yildagi “Korrupsiyaga qarshi kurash toʻgʻrisida”gi qonun Prezidentimizning davlat boshqaruvi yoʻlidagi muhim qarorlaridan biri boʻlib, korrupsiya faoliyatiga qarshi murosasiz kurashishga qaratilgan edi. Soʻngi yillarda korrupsiya bilan bogʻliq jinoyatlarga qattiq jazo turlarini qoʻllash ustida ham birqancha ishlar amalga oshirilib, korrupsiya jinoyatini sodir etgan beruvchi va oluvi orasidagi tafovut teng boʻlib birxil javobgarlik belgilandi.

Oʻzbekiston “Adolat” SDP ham oʻz dasturida mazkur korrupsiya holatlarni keltirib chiqaruvchi birqancha omillarga toʻxtalib oʻtgan edi. Yaʼni, davlat daromadiga undiriladigan barcha toʻlovlar jarimalar, davlat bojlari, yigʻimlar va boshqa majburiy undiruvlar toʻlaligicha davlat byudjetiga tushmayotganligi va ushbu undiruvlar faqat davlat byudjetiga undirilishini va soʻngra, qonun hujjatlariga muvofiq taqsimlanishi zarurligini taʼkidlagan. Aks holda, ushbu davlat bojlari va boshqa majburiy undiruvlar parlament nazorati doirasidan chetda qoladi va ayrim davlat organlari tomonidan maqsadsiz foydalanishga, ichki korrupsiyaning rivojlanishiga sabab boʻlishi mumkinligi taʼkidlangan.

Korrupsiya illati inson huquqlarining buzilishi, mamlakat taraqqiyoti va jamiyat ravnaqiga jiddiy taʼsir etar ekan korrupsiyaga qarshi kurashish, bu illatni barcha soha va jabhalardan siqib chiqarish, yurtimizni korrupsiyadan xoli hududga aylantirish birgina davlat idorasi yoki jamoat tashkilotining vazifasi emas, balki, shu davlat fuqarosi, jamiyat aʼzolarining masʼuliyati hisoblanadi. Shunday ekan barchamiz ushbu illatning avj olishiga, huquq va manfaatlarimizning buzilishiga yoʻl qoʻymasligimiz lozim.

Dinmuxammed BEGJANOV,

Oʻzbekiston “Adolat” SDP

Qoraqalpogʻiston Respublikasi Kengashi

“Yoshlar qanoti” raisi