Yoshlar parlamentiga saylovning ikkinchi bosqichi boʻlib oʻtdi

Oʻzbekiston Respublikasi Oliy Majlis Qonunchilik palatasi huzuridagi “Yoshlar parlamenti” saylovlari Toshkent viloyatida ham nizom talablariga muvofiq shaffof va ochiq tarzda tashkil qilindi.

Yoshlarimizning mamlakat siyosiy hayotidagi faolligini oshirishda katta maktab vazifasini oʻtayotgan “Yoshlar parlamenti”ga oʻtkazilayotgan saylovning ikkinchi bosqichi Toshkent viloyatida ham qizgʻin kechdi.

Saylovlarning dastlabki bosqichida partiya mahalliy Kengashlaridagi hakamlar hayʼati aʼzolari unda qatnashish istagini bildirgan nomzodlarning hujjatlarini yaqindan oʻrganib, viloyat bosqichida koʻrib chiqish uchun saralab berishgandi.

Saylovning dastlabki bosqichida yaʼni, hujjatlar topshirish jarayonida tegishli okrugdan faol yoshlar roʻyxatga olindi.

Saylovning viloyat miqyosida oʻtkazilgan ikkinchi bosqichida nomzodlar saralab olindi. Aytish joizki, ushbu bosqichida ishtirok etayotgan “Yosh parlamenti”ga aʼzo boʻlish istagidagi nomzodlar orasidan munosiblarini saralab olish hakamlar hayʼatiga oson boʻlmadi. Odil hakamlar saylovda ishtirok etish uchun oʻz nomzodini koʻrsatgan har bir qatnashchini, uning jamiyat va davlat ijtimoiy-siyosiy hayotidagi faolligini, huquqiy va siyosiy bilimi, mustahkam siyosiy pozitsiyasiga egaligi, jamiyat ijtimoiy hayotidagi voqeliklarga befarq emasligi, tengdoshlariga ibrat namunasini koʻrsatayotganligi, qolaversa, partiya dasturiy gʻoya va maqsadlarini oʻz tengdoshlari orasida faol targʻib qilishdagi tashabbuslarini eʼtiborga olgan holda baholab borishdi.

Adolatpesha hakamlar nomzodlar tomonidan taqdim etilgan hujjatlar va taqdimotlar bilan tanisharkan, ularning qonunchilik sohasidagi bilim va tajribasi, qonunchilikni takomillashtirish boʻyicha asoslantirilgan takliflari, partiya faoliyatidagi faolligi, oʻz ortidan tengdoshlarini ergashtira olish salohiyati, davlat boshqaruviga doir bilimlari, siyosiy partiya faoliyatini huquqiy jihatdan tartibga soluvchi qonun hujjatlari, shuningdek, siyosiy partiyaning ustavi (nizomi), dasturiy maqsadlarini bilish darajasini inobatga olib, ulardan 3 nafarini saylovning Respublika bosqichida ishtirok etishga munosib deb topishdi.

Aytish joizki, mazkur saylovni oʻtkazishdan maqsad – yoshlarning huquqiy va siyosiy bilimlari, ongi va madaniyatini yuksaltirish, ularni Oʻzbekiston Respublikasi Konstitutsiyasi va amaldagi boshqa qonun hujjatlariga hurmat ruhida tarbiyalash, yoshlarda parlament faoliyatiga daxldorlik tuygʻusini shakllantirish, yoshlarda erkin fikrlash qobiliyati va nutq madaniyatini oʻstirish, ularning faol fuqarolik pozitsiyasini yanada mustahkamlash, parlamentda partiya manfaatlarini himoya qilish, partiyaning dasturiy maqsad va vazifalarini targʻib qilish, yoshlarni mamlakatimizdagi siyosiy jarayonlarga keng jalb etishdan iboratdir.

Oʻzbekiston “Adolat” SDP Toshkent viloyati Kengashi
matbuot xizmati.