Yoshlar Parlamentiga saylovning Toshkent shahar bosqichi boʻlib oʻtdi

“Adolat” SDP Toshkent shahar Kengashi tomonidan Oliy Majlis Qonunchilik palatasi huzuridagi Yoshlar parlamentiga saylovning 2-bosqichi, yaʼni Respublika bosqichiga saralab olish jarayonlari boʻlib oʻtdi.

Partiyaning Toshkent shahar Kengashida onlayn va oflayn konferensiya shaklida oʻtkazilayotgan mazkur jarayonda 15 nafar faol yoshlar oʻz saylovoldi dasturlari, takliflari bilan ishtirok etishdi.

Ishtirokchilar tomonidan siyosiy partiyaga taqdim etilgan hujjatlar roʻyxatida ariza anketa, shaxsni tasdiqlovchi hujjatlar nusxasi, nomzodning turli sohalarda erishgan yutuqlarini hamda ommaviy axborot vositalaridagi faolligini tasdiqlovchi materiallar, nomzodning partiyaning dasturiy maqsad va vazifalarini yoshlar orasida keng targʻib qilishga qaratilgan takliflari ifoda etilgan loyiha, yoshlarga oid davlat siyosati sohasida amalga oshirilayotgan islohotlarning mazmun-mohiyatini yoshlar orasida keng targʻib etish borasidagi ishlarini tasdiqlovchi hujjatlar, nomzodning yoshlarga oid davlat siyosatiga doir qonunchilikni takomillashtirishga qaratilgan saylovoldi dasturi kabilar oʻrin oldi.

Ochiqlik, oshkoralik, adolat mezonlari asosida oʻtkazilgan mazkur jarayonni bir qancha OAV vakillari bevosita yoritib bordi.

Tanlov jarayonida ishtirokchi yoshlar oʻzlari tayyorlagan dasturlarini belgilangan nizomga muvofiq hakamlar hayʼati aʼzolariga taqdim etishdi. Shuningdek, nomzodlarning siyosiy bilim va koʻnikmalari tekshiruvdan oʻtkazilib, savollarga javoblar berildi.

Hakamlar hayʼatining tegishli bayonnomasiga asosan shahar bosqichidan oʻtgan nomzodlar Respublika bosqichida ishtirok etishadi.

Mehriniso Yaqubova,

“Adolat” SDP Toshkent shahar Kengashi matbuot kotibi.