Yoshlar qalbiga ilm-fan ziyosini singdirish –davr talabi

“Adolat” SDP Qamashi tuman Kengashi va tuman xalq taʼlimi boʻlimi tomonidan   Yoshlar agentligi tadbirgohida “Taʼlim sifatini oshirish-Yangi Oʻzbekiston taraqqiyotining yagona yoʻli” mavzusida davra suhbati boʻlib oʻtdi. Tadbirda partiya faollari, pedagoglar, yoshlar vakillari qatnashdi. Savol-javoblar asosida oʻtgan davra suhbatida xalq deputatlari Qamashi tuman Kengashi deputati Saodat Otaqulova soʻzga chiqdi.Mamlakatimizda Prezidentimiz boshchiligida taʼlimga juda katta eʼtibor berilyapti,- dedi Saodat Otaqulova.- Shuning uchun ham yangi Oʻzbekiston taʼlim tizimida islohotlar davom etayotgani va faollashayotganini hammamiz koʻrib his qilib turibmiz. Birigina viloyatimizda bugun mingdan ziyod maktablar, 10 dan ortiq Oliy taʼlim dargohlari faoliyat yuritmoqda. Maktabgacha taʼlim muassasalariga oʻgʻil-qizlarni 100 foiz qamrab olish choralari koʻrilyapti. Mustaqilligimizning 32 yilligi arafasida yangi maktablar qurilib, taʼlim tizimida islohotlarini davom ettirish, oʻqituvchi va murabbiylar mavqe hamda nufuzini oshirish boʻyicha keng qamrovli ishlar amalga oshirilyapti. Ayniqsa, oʻqituvchilar obroʻsi va nufuzini yuksaltirishni mamlakatimizning asosiy qonuni – Yangi konstitutsiyamizga muhrlab qoʻyilishi davlatimizda taʼlim sohasiga yuksak eʼtibor qaratilayotganligi ifodasidir.

- Yangi Oʻzbekiston taraqqiyotining yagona yoʻli ilm va maʼrifatdir,- dedi davra suhbatida Toʻqboy mahalla fuqarolar yigʻini raisi Yigitali Moʻminov.- Darhaqiqat, ilm va maʼrifat,taʼlim ustuvor boʻlgan jamiyatda maʼnaviyat yuksaladi, davlat har tomonlama taraqqiy topadi, inson qadri ulugʻlanadi. Bunga eltadigan asosiy va yagona toʻgʻri yoʻl esa taʼlim va tarbiyadir. Shu tufayli ham mamlakatimizda keyingi yillarda taʼlim sohasi tubdan isloh qilinmoqda. Qisqa vaqt ichida sohada keng koʻlamli ishlar amalga oshirilib, yuksak natijalarga erishildi. Oʻqituvchilar majburiy noqonuniy ishlarga jalb etilmayapti. Pedagoglarning qadri oshdi, ularni moddiy ragʻbatlantirishning yangi tizim va mexanizmlari ishlab chiqilib   joriy etilmoqda. Prezidentimiz oʻqituvchilarning oylik ish haqlarini ming dollarga yetkazish choralarini koʻryaptilar. Joriy yildan eʼtiboran boshlangʻich sinf oʻquvchilari mutlaqo yangi metodika asosida yaratilgan darsliklar boʻyicha oʻqitilmoqda. Davlatimiz rahbari tashabbusi bilan oʻgʻil qizlarimiz maktabda ona tili va chet tillarini puxta oʻzlashtirib, kompyuterda ishlashni oʻrganishyapti. Yoshlar kasb-hunarga, sanʼat va madaniyatga yanada koʻproq jalb etilmoqda.  Oʻquvchilarda erkin va kreativ fikrlash, jamoada ishlash va muloqot koʻnikmalari shakllantirilmoqda.   Bu yil maktab taʼlimi xalqaro taʼlim dasturlari asosida tubdan isloh qilinib, darsliklar yangilandi.

Tadbirda oʻsib kelayotgan yosh avlod qalbiga ilm-fan ziyosini singdirib, ularni el-yurtga munosib insonlar etib tarbiyalash muhimligi xususida alohida eʼtirof etildi. Shuningdek, soʻzga chiqqanlar oʻgʻil-qizlarimizni xalqimizga yot va ongi uchun zararli boʻlgan salbiy taʼsirlardan himoya qilish yoʻllari xususida oʻz takliflarini bildirdilar. Har qanday sharoitda ham millat va davlat taraqqiyotini dunyo hamjamiyatiga koʻrsatishga qodir boʻlgan yosh avlodni tarbiyalash har bir ota-ona, taʼlim muassasasi, xonadon va mahalla zimmasidagi ham qarz, ham farz ekanligi alohida qayd etildi.

                                          Nurmuhammad Mirzayev,

                                                        Partiya faoli.