Yoshlar yot g'oyalardan asrash - barchamizning burchimiz

“Adolat” SDP Markaziy apparati va Toshkent shahar Kengashi tomonidan Yangihayot tumanidagi 329-maktabda Oʻzbekiston Respublikasida taqiqlangan diniy nashida, maʼruzalarni yoshlar oʻrtasida tarqalishining oldini olish maqsadida din ulamolari bilan ochiq davra suhbati tashkil etildi.

Tadbirda Oʻzbekiston “Adolat” SDP Siyosiy Kengashi hamda Markaziy apparati xodimlari, Toshkent shahar Kengashi xodimlari, deputatlar, Toshkent shahar Yangihayot tumani hokimligi xodimlari vakillari, Din ishlari boʻyicha Yangihayot tumani vakillari, partiya faollari, maktab oʻquvchilari va OAV xodimlari ishtirok etishdi.

Dastlab, davra suhbatini kirish soʻzini ochib bergan “Adolat” SDP Siyosiy Kengashi rais oʻrinbosari Abdukamol Rahmonov barchani huquqiy madaniyatni yuksaltirish boʻyicha bilimlarini oʻstirish va mustahkamlash borasidagi ishlarda faol boʻlishga chorladi. Jamiyatimiz ravnaqi uchun zarur boʻlgan ilmlarni olish har bir yosh yigit-qizning zimmasidagi burchlaridan biri hisoblanishi haqida toʻxtalib oʻtdi.

Darhaqiqat, bugungi kunda xalqimiz hayotida huquqiy islohotlarni amalga oshirish dolzarb ahamiyat kasb etib bormoqda. Bunda ayniqsa, yoshlar ongini turli zararli gʻoyaviy xatarlardan asrash asosiy vazifalardan biri boʻlib turibdi. Har bir farzandning shaxsiyati oilada shakllanganidek, oila barkamol avlod poydevori hamdir. Shunday ekan oilada farzandlarni ahloqiy-huquqiy jihatdan mukammal qilib tarbiyalash, ayniqsa, adolat, burch, vatanparvarlikni shakllantirish, ona vatanni sevish hissini uygʻotish oʻta muhim hisoblanadi.

Konstitutsiyamizda biron fuqaroni biron dinga majburlab kiritish taqiqlangan, har bir inson haq-huquqi, erkinligi va kafolatlangani xususida “Hamma uchun vijdon erkinligi kafolatlanadi deb aniq-ravshan koʻrsatilgan. Har bir inson xohlagan diniga eʼtiqod qilish yoki hech qanday dinga eʼtiqod qilmaslik huquqiga ega. Diniy qarashlarni majburan singdirishga yoʻl qoʻyilmaydi”. Diniy bagʻrikenglik tamoyili Konstitutsiyamizning barcha moddalarida oʻz aksini topganligi qayd etilgan.

Xalqimizning xohish va istaklaridan kelib chiqqan holda “Inson qadri uchun” tamoyilini bosh dasturamal qilib, fuqarolarimiz uchun eng maqbul islohotlarni amalga oshirish mamlakatimizda demokratik jarayonlarning yanada jadallashuviga xizmat qiladi. Bunda har bir fuqaro oʻz huquq va majburiyatlarini chuqur anglagan holda jonbozlik koʻrsatayotgani boʻlgʻusi tinch, obod kelajagiga daxldorlik tuygʻusi mustahkam ekanini koʻrsatmoqda. Oʻzbekiston hududida yashovchi har bir fuqaroning manfaatlari, haq-huquq va burchlari qonunimiz doirasida aniqlanib, belgilab qoʻyilgan.

Huquqiy islohotlar jamiyatning turli ijtimoiy qatlamlariga mansub fuqarolarning ijtimoiy, shaxsiy, iqtisodiy, siyosiy, ekologik, madaniy huquqlari va manfaatlarini taʼminlab, ishonchli himoya qilishga qaratilgan huquqiy normaga aylanishi lozim. Shuningdek, ular oʻz huquqlari oldidagi majburiyatlarini ham unutmasliklari lozim. Turli yot gʻoyalar taʼsiriga tushib qolmaslik uchun doimo ogoh boʻlish muhimdir.

Tadbir davomida soʻz olganlar huquqiy islohotlar mohiyati, burch va erkinliklar toʻgʻrisida oʻz fikr-mulohaza va takliflarini bildirib oʻtdilar.

“Adolat” SDP Toshkent shahar Kengashi
matbuot xizmati