Yoshlarni yot, salbiy gʻoyalardan asrash – zamon talabi

“Adolat” SDP Toshkent shahar Kengashi tomonidan Toshkent yuridik texnikumida Oʻzbekiston Respublikasida taqiqlangan diniy nashida, maʼruzalarni yoshlar oʻrtasida tarqalishining oldini olish maqsadida din ulamolari bilan ochiq davra suhbati tashkil etildi.

Tadbirda Oʻzbekiston “Adolat” SDP Siyosiy Kengashi Markaziy apparati xodimlari, partiyaning Toshkent shahar Kengashi, deputatlari, Uchtepa tumani bosh imom xatibi, Toshkent davlat yuridik universiteti va Toshkent Xalqaro Islom Akademiyasidan vakillar, partiya faollari, Yuridik texnikum talabalari hamda OAV xodimlari ishtirok etishdi.

Dastlab, tadbirni ochib bergan “Adolat” SDP Siyosiy Kengashi Markaziy apparati vakillari ishtirokchilarni jamiyatda huquqiy madaniyatni yuksaltirish borasida amalga oshirilayotgan islohotlarda faol boʻlishga chorladi. Jamiyatimiz ravnaqi uchun zarur boʻlgan ilmlarni olish har bir yosh yigit-qizning zimmasidagi burchlaridan biri ekanligi taʼkidlandi.

Darhaqiqat, bugungi kunda xalqimiz hayotida huquqiy islohotlarni amalga oshirish dolzarb ahamiyat kasb etib bormoqda. Bunda ayniqsa, yoshlar ongini turli zararli gʻoyaviy xatarlardan asrash asosiy vazifalardan biri boʻlib turibdi. Har bir farzandning shaxsiyati oilada shakllanganidek, oila barkamol avlod poydevori hamdir. Shunday ekan oilada farzandlarni axloqiy-huquqiy jihatdan mukammal qilib tarbiyalash, ayniqsa, adolat, burch, vatanparvarlikni shakllantirish, ona Vatanni sevish hissini uygʻotish oʻta muhim hisoblanadi.

Konstitutsiyamizda biron fuqaroni biron dinga majburlab kiritish taqiqlangan, har bir inson haq-huquqi, erkinligi xususida “Hamma uchun vijdon erkinligi kafolatlanadi”, deb aniq-ravshan koʻrsatilgan. Har bir inson xohlagan diniga eʼtiqod qilish yoki hech qanday dinga eʼtiqod qilmaslik huquqiga ega. Diniy qarashlarni majburan singdirishga yoʻl qoʻyilmaydi. Diniy bagʻrikenglik tamoyili Konstitutsiyamizning barcha moddalarida oʻz aksini topganligi qayd etilgan.

Xalqimizning xohish va istaklaridan kelib chiqqan holda “Inson qadri uchun” tamoyilini bosh dasturamal qilib fuqarolarimiz uchun eng maqbul islohotlarni amalga oshirish mamlakatimizda demokratik jarayonlarning yanada jadallashuviga xizmat qiladi. Bunda har bir fuqaro oʻz huquq va majburiyatlarini chuqur anglagan holda jonbozlik koʻrsatayotgani boʻlgʻusi tinch, obod kelajakka daxldorlik tuygʻusi mustahkam ekanini koʻrsatmoqda. Oʻzbekiston hududida yashovchi har bir fuqaroning manfaatlari, haq-huquq va burchlari qonunimiz doirasida aniq belgilab qoʻyilgan.

Tadbirda ishtirok etgan Toshkent shahar Uchtepa tuman bosh imom xatibi Дониёр Файзуллаев oʻz soʻzida yuqoridagi fikrlarni tasdiqlar ekan, yoshlarning ongini yot diniy qarashlardan asrash, dinni joylarda toʻgʻri targʻib etish lozimligiga urgʻu berdi. Zero, bugungi davr har jihatdan ogoh boʻlishni taqozo etmoqda. 

Bugungi huquqiy islohotlar jamiyatning turli ijtimoiy qatlamlariga mansub fuqarolarning ijtimoiy, shaxsiy, iqtisodiy, siyosiy, ekologik, madaniy huquqlari va manfaatlarini taʼminlab, ishonchli himoya qilishga qaratilgan huquqiy normaga aylanmoqda. Shu bois, yoshlarimiz oʻz huquqlari oldidagi majburiyatlarini ham unutmasliklari lozim. Yot gʻoyalar taʼsiriga tushib qolmaslik uchun oʻz gʻoyaviy immunitetlarini shakllantirishlari hamda mustahkamlashlari kerak.

Tadbir davomida soʻz olganlar huquqiy islohotlar mohiyati, burch va erkinliklar toʻgʻrisida oʻz fikr-mulohaza va takliflarini bildirib oʻtdilar.

Mehriniso YAKUBOVA,
“Adolat” SDP Toshkent shahar Kengashi
matbuot kotibi