Yurtimiz va jamiyatimiz kelajagining porloqligi biz yoshlarga bogʻliq!

Hozirgi kunda davlatimizda amalga oshirilayotgan muhim oʻzgarish bu Konstitutsiyaviy oʻzgarishlardir. Kiritilayotgan oʻzgarishlarning barchasi xalqimiz manfaati uchun xizmat qiluvchi normalar ekanligini koʻrishimiz mumkin. Har bir davlatning, yurtning ertangi kuni yoshlarga bogʻliqdir.

Prezidentimiz, hamda Konstitutsiyaviy komissiya aʼzolari ham yoshlarning bunday oʻzgarishlarga boʻlgan fikrlariga alohida ahamiyat qaratishmoqda, turli xil davra suhbatlari oʻtkazilib kelinmoqda. Bularning barchasi biz yoshlarga berilayotgan katta imkoniyatlardan biridir, biz oʻz kelajagimizni qurishda oʻzimiz ham ishtirok etyapmiz. Bugungi kunda yoshlarga qaratilayotgan eʼtibor, berilayotgan imkoniyatlardan foydalanib jamiyatimiz rivoji uchun har bir yosh avlod hissa qoʻshish niyatida harakat qilayotganini koʻrishimiz mumkin. 

Har kuni ommaviy axborot vositalarida yoshlarimizning turli musobaqalarda qatnashib, gʻolib boʻlishayotganini, oʻz bilimlari bilan katta yutuqlarga erishayotganlarini, jamiyatimiz ijtimoiy hayotida oʻz oʻrinlarini topayotganlarini koʻrishimiz mumkin. Buning barchasi, biz kabi yoshlar uchun har bir sohada yaratilayotgan qulayliklardir. Biz hozirda oʻzimiz xohlagan kasb bilan shugʻullanishimiz, oʻz gʻoyalarimizni amalga oshirishimiz, oʻz biznesimizni boshlashimiz, biz uchun qiziqarli boʻlgan mashgʻulotlar bilan shugʻullanishimiz mumkin. 

Taʼkidlash joizki, davlatimiz tomonidan iqtidorli yoshlarni ragʻbatlantirishga ham alohida eʼtibor qaratilmoqda, koʻplab bilimga chanqoq yoshlarning oliy va undan keyingi taʼlimi moddiy tomondan taʼminlab berilmoqda, yoshlarni qoʻllab-quvvatlash uchun turli xildagi sovrinli tanlovlar oʻtqazib kelinmoqda.

Shu oʻrinda, prezidentimiz Shavkat Mirziyoyevning ushbu soʻzlarini keltirish oʻrinli boʻlar edi: “Yurtning yuksak ishonchi va umidini toʻla oqlash, unga munosib boʻlish dunyodagi eng ulugʻ baxtdir”.

Zuhra Togʻaymurodova,
Toshkent davlat yuridik universiteti talabasi