Zamonaviy kadrlar yangi Oʻzbekistonning kelajagi

Bugun biz yashayotgan jamiyatga yangi fikr, islohotlarni amalga oshirishga qodir yangi avlod kadrlari kerak. Chunki ular bilan ertangi taraqqiyot uchun mustahkam zamin yaratishga erishamiz. “Adolat” SDP Andijon viloyat kengashi tomonida “Zamonaviy kadrlar-yangi Oʻzbekistonning kelajagi” mavzusida tashkil etilgan davra suhbatida shu mavzuda soʻz yuritildi.

Taʼkidlanganidek, har qanday mamlakatning kelajagi yosh avlod   bilan bogʻliq. Yoshlar siyosati davlat taraqqiyotining davomiyligini taʼminlashga qaratilgan barcha strategiyalarda namoyon boʻladi. Bu mamlakat yoshlarining huquq va manfaatlarini himoya qilish, bilim olishi va munosib kasb tanlashi uchun qulay shart-sharoit yaratishni taqozo etadi.

Keyingi yillarda respublikamizda bu borada samarali siyosat olib borilyapti. Natijada iqtidorlilar safi kengayib, barcha sohalarda yigit-qizlarning faolligi koʻzga tashlanmoqda. Zamonaviy kasb egasi boʻlish bugun har bir maktab bitiruvchisining orzusi.

Islombek Bektoshev, “Mard oʻgʻlon” Davlat mukofoti sohibi:

- Biz- bugunning yoshlari baxtlimiz. Oʻqishimiz, oʻzimiz yoqtirgan kasbni tanlashimiz uchun barcha imkoniyatlar yaratilgan. Bu albatta, tashabbusga, izlanishga boshlaydi. Keyingi yillarda tengdoshlarimizning dunyo maydoniga chiqayotgani, yangi-yangi ixtirolarning muallifiga aylanayotgani, har bir soha rivojida sezilarli hissasi borligi quvonarli. Men ham tibbiyot yoʻnalishida izlanishdaman. Maqsadim — zamonaviy tibbiy xizmat koʻrsatish barobarida xalqimizga xizmat qilish.

Tadbir yakunida ishtirokchilar oʻzlarini qiziqtirgan savollarga javob oldilar.

“Adolat” SDP Andijon viloyat kengashi

Matbuot xizmati.