Barchamizni el-yurt manfaati birlashtiradi

Shu yilning 9 iyul kuni bo‘lib o‘tgan muddatidan ilgari saylovda O‘zbekiston Prezidenti etib yangidan saylangan Shavkat Mirziyoyev Oliy Majlis palatalarining qo‘shma majlisida qasamyod qabul qilib, o‘z lavozimiga kirishdi.

Prezident saylovida faol ishtiroki bilan yurtdoshlarimiz o‘z taqdiri, ona Vatanimiz kelajagiga daxldorlikni his etib, o‘z konstitutsion huquqlarini amalga oshirdilar. Saylov natijalariga ko‘ra, O‘zbekiston Liberal-demokratik partiyasidan O‘zbekiston Respublikasi Prezidentligiga nomzod — Shavkat Mirziyoyev 87,05 foiz ovoz bilan O‘zbekiston Respublikasi Prezidenti etib saylandi.

Aytish joizki, mazkur saylov mamlakatimizda 30 aprel kuni o‘tkazilgan umumxalq referendumida yakdillik bilan qabul qilingan yangi tahrirdagi Konstitutsiya asosida o‘tkazilgan ilk Prezidentlik saylovi sifatida ham tarixda qoladi.

Prezident saylovi O‘zbekistonning mutlaqo yangi siyosiy-huquqiy muhiti, yangi ijtimoiy-iqtisodiy sharoitida, yuksak tashkiliy saviyada, milliy hamda xalqaro qonunchilik norma va talablariga to‘liq rioya etilgan holda o‘tkazildi.

Alohida qayd etish kerak, so‘nggi yillarda mamlakatimizda demokratik islohotlarni chuqurlashtirish va fuqarolik jamiyatini rivojlantirish borasida tizimli ishlar amalga oshirildi. Xususan, xalq hokimiyatchiligi institutini mustahkamlash, adolat va qonun ustuvorligini ta’minlashga katta e’tibor qaratilib, siyosiy partiyalar, fuqarolik jamiyati institutlari, mahalla va ommaviy axborot vositalarining mavqei oshdi.

Ushbu yangilanishlarning zamirida, avvalo, xalqimiz farovonligini ta’minlash, ularni hayotdan rozi qilish, kelajakka ishonchini mustahkamlash kabi mushtarak maqsadlar mujassam.

Davlatimiz rahbarining tantanali marosimdagi nutqida ta’kidlanganidek, biz turli siyosiy partiyalarga mansub bo‘lishimiz, turli g‘oya va qarashlar tarafdori bo‘lishimiz mumkin. Demokratiya degani ham aslida shu. Ammo mohiyat e’tibori bilan qaraganda, barchamizning, butun O‘zbekiston xalqining maqsadi bir. Bizning barchamizni Vatan, el-yurt manfaati birlashtiradi.

Prezident o‘z ma’ruzasida “Yangilangan Konstitutsiyamizda muhrlangan ustuvor maqsad va vazifalarni amalga oshirish kelgusi faoliyatimizning asosiy ma’no-mazmunini tashkil etadi”, — deya ta’kidlab o‘tdi.

Darhaqiqat, joriy yilning 30 aprel kuni bo‘lib o‘tgan referendumda xalqimiz alohida faollik, katta ishonch bilan yangi tahrirdagi O‘zbekiston Respublikasi Konstitutsiyasini qo‘llab-quvvatlab ovoz berdi. Albatta, buning zamirida katta hayotiy haqiqat, xalqimiz orzu qilgan yangi hayotni qurish maqsadi mujassam. Endilikdagi vazifa — yangi tahrirdagi Konstitutsiyani so‘zsiz va to‘liq amalga oshirish, unda mustahkamlangan ustuvor prinsiplarni taraqqiyot maqsadlariga hamohang tarzda ro‘yobga chiqarish, davlat organlarining faoliyatini yangicha konstitutsiyaviy-huquqiy sharoitlarda yo‘lga qo‘yish, fuqarolar o‘z hayotida xalq Konstitutsiyasi ruhini yaqqol his etib turishini amalda ta’minlashdan iborat.

Xulosa o‘rnida aytganda, bugun Yangi O‘zbekiston ulkan yangilanishlar va bunyodkorlik ishlari mamlakatiga aylanib bormoqda. Albatta, bu borada erishilgan yutuqlar bilan bir qatorda, mavjud muammo va kamchiliklar, yechimini kutayotgan masalalar ham ko‘p. Shu boisdan barcha sohalarni takomillashtirishga qaratilgan islohotlarni amalga oshirish, bu borada yangi qonunlarni qabul qilish, amaldagi qonun hujjatlariga mamlakatimiz taraqqiyoti va xalqimiz farovonligini ta’minlashga xizmat qiluvchi yangi o‘zgartirishlar kiritishga doir vazifalar xalq vakillari sifatida biz, deputatlar zimmasiga ham katta mas’uliyat yuklaydi.

Endi barchamiz qo‘lni-qo‘lga berib, bir yoqadan bosh chiqarib xalqimizning farovon hayoti uchun, belgilangan vazifalarni ro‘yobga chiqarish maqsadida bor kuch va imkoniyatlarimizni, bilim va tajribalarimizni Vatanga muhabbat hamda yuksak fidoiylik bilan safarbar qilishimiz kerak bo‘ladi.

Inomjon QUDRATOV,
O‘zbekiston Respublikasi Oliy Majlisi
Qonunchilik palatasi deputati