E’tibor va e’tirof topgan o’zbek tili

  “Adolat” SDP Qashqadaryo viloyat Kengashi va yoshlar ishlari agentligi  tomonidan Qarshi shahridagi  “Mahallot” MFY tadbirgohida “Til millat iftixori” mavzuida tadbir bo’lib o’tdi. O’zbekiston Respublikasining “Davlat tili haqida” gi qonun qabul qilinganligining 34 yilligi munosabati bilan tashkil etilgan tadbirda partiya faollari bilan birgalikda o’qituvchilar, yoshlar, xotin-qizlar, ommaviy axborot vositalari xodimlar va keng jamoatchilik vakillari qatnashdi.

 Tadbirda “Adolat” SDP viloyat Kengashi  faoli, xalq deputatlari Qashqadaryo viloyat Kengashi deputati Dilrabo Temirova o’zbek tilining o’tmishi va bugungi kundagi nufuzi xususida ma’ruza qildi.

 -Har bir millat  tili – xalqlar va millatlarning asosiy muloqot manbaidir,-dedi Dilrabo Temirova.- Shuni ham alohida e’tirof etish kerakki til insonlarning o’z-o’zini anglashiga xizmat qiladi. Shuningdek  xalqlarni birlashtiradi ham. Shu bilan birgalikda  millat va elatlarning  urf-odat, an’ana va madaniyatlarni saqlaydi, rivojlantiradi,  avloddan-avlodga o’tishini ta’minlaydi. Shunday ekan, e’tibor va e’tirof topayotgan o’zbek tilimizning qadrsizlanishiga yo’l qo’yishiga hech kimning haqqi yo’q.

 -Darhaqiqat, tilimizning hozirjavobligi, serjiloligi barchamizni mamnun etadi,-dedi partiya faoli Dilafro’z Yovqochdieva.-  Qolaversa tilimiz  – mamlakatimiz  timsoli, qimmatbaho mulkdir. Shu tufayli ham til madaniyatiga amal qilinmasa, milliy madaniyatga dog’ tushishi  ehtimoli katta. Hamma joyda ham o’zbek tilining qoidalariga amal qilib ish yuritilayapti deb bo’lmaydi. Ayniqsa jamoat joylarda qad rostlagan bino va inshoatlar peshtoqidagi xorijiy tillarda hammaga ko’z-ko’z qilgandek yozuvlar hali xamon uchrab turibdi. Mutasaddilar bunday ko’ngilsiz xolatlarni oldini olishda kamarbasta bo’lishlari lozimdir.

Tadbirda Prezidentimiz sa’у harakati bilan  keyingi  yillarda Yangi O’zbekistonda barcha soha va tarmoqlar qatori  ona tilimiz qadri va nufuzini yanada oshirish borasidagi siyosat va amaliy ishlarimiz ham yangi bosqichga ko’tarilganligi e’tirof etildi.  Buning tasdig’i o’zbek tilining davlat tili sifatidagi maqomi va obro’-e’tiborini har tomonlama  oshirish bo’yicha qabul qilingan tarixiy farmon va qarorlar misolida ham  yaqqol ko’rish mumkin. Tadbirda  tilimizni yanada ravnaq toptirish, barcha jabhada uning  norma va qoidalariga qat’iy amal qilib, qadimiy tillardan hisoblangan o’zbek tilining nufuzini yanada oshirish yuzasidan tegishli tavsiyalar berildi.

Shoira XALIMOVA,

рartiya faoli