Nuqtai nazar: Sport — sog‘lom turmush tarzi kafolati

Mamlakatni dunyoga tez tanitadigan soha, bu — sport. Sport millat va irq tanlamaydi, u barchani o‘z atrofida birlashtiradi. Sport nafaqat aholi salomatligini mustahkamlaydi, balki sog‘lom avlodni tarbiyalashning asosiy mezonlaridan biri sanaladi.

Mamlakatimizda keyingi yillarda sport infratuzilmasini rivojlantirish, shu jumladan, qishloq va chekka hududlarda sport obyektlarini ko‘paytirish, bolalar va yoshlar o‘rtasida sport bilan shug‘ullanishni ommalashtirish bo‘yicha izchil islohotlar amalga oshirildi.

Ayniqsa, oxirgi yetti yilda yurtimizda sport sohasiga bo‘lgan e’tibor yana kuchayib, bolalar sportini rivojlantirish, yosh avlodning sport bilan muntazam shug‘ullanishi uchun keng imkoniyatlar yaratib berilmoqda. Zero, yoshlarning sog‘lom bo‘lishi, avvalo, ularning sport bilan shug‘ullanishlari bilan uzviylik kasb etadi.

O‘tgan davrda yangi-yangi bolalar sport inshootlari barpo etilib, bolalar sport maktablarining moddiy-texnik bazasi mustahkamlanayotgani tufayli keyingi paytda yosh sportchilarimiz nafaqat respublika, balki nufuzli sport o‘yinlarida jumladan, yozgi Olimpiada va Paralimpiadada, Osiyo o‘yinlarida, sport turlari bo‘yicha jahon va mintaqa chempionatlarida faxriy o‘rinlarni egallab kelmoqda.

Masalan, 2016 yilda Rio-de-Janeyroda, 2018 yilda Djakartada, 2021 yilda Parijda, 2023 yilda Xitoyda bo‘lib o‘tgan Olimpiada, Paralimpiadada, shu jumladan yozgi va Osiyo o‘yinlarida sportchilarimiz boks, kurash, yengil va og‘ir atletika (para), badiiy gimnastika, karate, shaxmat, para kanoye, para dzyudo yo‘nalishlarida nufuzli o‘rinlarni olib bayrog‘imizni ko‘kka ko‘tarib kelmoqda.

Milliy terma jamoa a’zolari 50 ta xalqaro turnir va musobaqalarda, 49 ta Jahon va 26 ta Osiyo chempionatlarida ishtirok etib, jami 598 ta (193 ta oltin, 161 ta kumush 244 ta bronza) medallarni qo‘lga kiritdi.

2022 yil davomida respublikada 10 dan ortiq nufuzli xalqaro sport tadbirlari yuqori saviyada o‘tkazildi. Shu bilan birga, Olimpiya va Paraolimpiya sport turlariga kirmaydigan Shaxmat sporti ham yurtimizda rivojlanib ommalashtirilib borilmoqda. Bu sa’y-harakatlar orqali mamlakatimiz vakillari xalqaro nufuzli chempionatlarda yetakchi o‘rinlarni egallayotgani e’tiborga molik.

Xususan, Shaxmat bo‘yicha O‘zbekiston milliy jamoasi Hindistonning Chennay shahrida o‘tkazilgan 44 shaxmat olimpiadasida tarixiy birinchi o‘rinni egallagani yurtimizga sport sohasida olib borilayotgan islohotlar natijasi, desak ayni haqiqat.

O‘zbekistonlik shaxmatchi Nodirbek Abdusattorov 2021 yilning 26-28 dekabr kunlari Varshavada bo‘lib o‘tgan tezkor shaxmat bo‘yicha jahon chempionatida shov-shuvli tarzda g‘olib bo‘ldi. Chempionlik yo‘lida u M.Karlsen, Yan Nepomnyashiy, F.Karuana, L.Aronyan va turnirning boshqa favoritlarini mag‘lub etdi. 2022 yilgi jahon chempionatida esa shaxmatchilarimiz ikkinchi o‘rinni egalladi.

Bular hali hammasi emas. Hozirgi kunda O‘zbekiston boks, shaxmat, dzyudo, kurash, og‘ir va yengil atletika va boshqa sport turlari bo‘yicha dunyo mamlakatlari yetakchilaridan biriga aylandi. Ayniqsa, yurtimizda mazkur sport turlariga bo‘lgan qiziqish yanada oshdi. Sohaga qaratilayotgan yuksak e’tibor tufayli sportchilarimiz xalqaro musobaqalarda yuqori o‘rinlarni egallab yurtimiz bayrog‘ini baland ko‘tarib kelmoqda.

Albatta, bunday natijalar o‘z-o‘zidan bo‘layotgani yo‘q. Bu mamlakatimizda jismoniy tarbiya va sportni rivojlantirishga davlat siyosati darajasida katta e’tibor qaratilayotgani samarasidir. “O‘zbekiston — 2030” strategiyasida bu boradagi ishlar ko‘lamini kengaytirish maqsadida jismoniy tarbiya va sport bilan shug‘ullanadigan yoshlar qamrovini kengaytirish ustuvor vazifa sifatida belgilangani e’tiborga molik.

Ushbu dasturiy hujjatda ommaviy sport tadbirlarini tashkil etish orqali yoshlar qamrovini 8 milliondan oshirish, sport bilan shug‘ullanishga jalb qilingan aholi ulushini 36 foizga yetkazish hamda jismoniy tarbiya va ommaviy sport bilan shug‘ullanishi uchun kamida 5 mingta mahallada sport maydonchalarini barpo etish masalalari o‘z ifodasini topganki, bu yurtimizda sportni yanada ommalashtirish bilan birga sportda ko‘plab yangi iste’dodlarni kashf qilish uchun keng imkoniyatlar yaratadi.

Muxtasar aytganda, yurtimizda jismoniy tarbiya va sportni ommalashtirish, aholi, ayniqsa, yoshlar o‘rtasida sog‘lom turmush tarzini targ‘ib qilish uchun zarur sharoitlar yaratish bo‘yicha muayyan ishlar qilinmoqda. Bularning barchasi yosh avlodning har tomonlama sog‘lom va barkamol bo‘lishi, yoshlar va bolalar o‘rtasida sog‘lom turmush tarzini shakllantirishga xizmat qiladi.

  Oydin ABDULLAYEVA,

Oliy Majlis Qonunchilik palatasi deputati