Yoshlar taʼlimi masalasiga strategik ahamiyat berilmoqda

Prezidentimiz tomonidan mamlakat yoshlarining taʼlimi masalasiga alohida eʼtibor qaratayotgani barchamizga maʼlum.

Davlatimiz rahbari doimo oʻz chiqishlarida Oʻzbekiston yoshlarini kelajak bunyodkorlari deb atab, ularning mamlakat kelajagini belgilashdagi muhim ahamiyatini takror-takror taʼkidlaydi.

Bunga joriy yilning 11-sentyabrdagi “Oʻzbekiston – 2030” strategiyasi bilan tanishib chiqib yana bir bor amin boʻldim.

Xususan, 5 ta ustuvor yoʻnalish hamda 100 ta aniq maqsaddan iborat mazkur muhim hujjatda oliy̆ taʼlim muassasalari tashkiliy-boshqaruv faoliyatini takomillashtirish, ularning moddiy̆-texnik taʼminotini mustahkamlash masalasiga ham alohida eʼtibor qaratilmoqda. Ahamiyatlisi, mamlakatimizning 5 ta oliy oʻquv yurtini milliy ilmiy-tadqiqot universitetlariga aylantirish masalasi strategik maqsad sifatida koʻrilmoqda.

Aytish joizki, ayni masalada bir guruh oliygohlarni milliy ilmiy-tadqiqot universitetlariga aylantirish quyidagi bir qancha ijobiy va asosli afzalliklar, yutuqlarni taʼminlaydi:

1. Ilmiy tadqiqotlarning rivojlanishi — taʼlim muassasalarining milliy tadqiqot universitetlariga aylanishi ularning ilmiy bazasi va infratuzilmasini mustahkamlashni nazarda tutadi. Bu esa yangi kashfiyotlar, innovatsiyalar va milliy ilmiy tajribani rivojlantirish barobarida turli sohalar boʻyicha yanada chuqurroq tadqiqotlarni oʻtkazish imkoniyatini yaratadi.

2. Taʼlim sifatini oshirish — milliy tadqiqot universitetlari odatda yuqori darajadagi taʼlimni, shu jumladan chuqurroq tadqiqot dasturlari va talabalar uchun keng imkoniyatlarni taklif etadi. Bu esa taʼlim sifatining oshishiga va turli sohalarda yuqori malakali mutaxassislarni tayyorlash imkoniyatini yaratadi.

3. Isteʼdodlarni jalb qilish — taʼlim muassasalarini milliy tadqiqot universitetlariga aylantirish orqali turli mintaqalar va mamlakatlarning iqtidorli talabalari va olimlarini jalb qilishi mumkin. Bu orqali bilim va tajriba almashishni, shuningdek, xalqaro ilmiy hamkorlik dasturlari va qoʻshma ilmiy tadqiqotlar koʻlamining kengayishiga va oʻz navbatida milliy ilmiy muhitni rivojlantirishga olib keladi.

4. Innovatsiyalar va texnologiyalarni rivojlantirish — milliy tadqiqot universitetlari innovatsiyalar va yangi texnologiyalarni rivojlantirish markazlariga aylanadi. Bu milliy iqtisodiyotni rivojlantirish, ilmiy tadqiqotlarga sarmoya jalb qilish va yangi ish oʻrinlarini yaratish imkonini beradi.

5. Milliy taʼlim tizimi obroʻsini mustahkamlash va investitsiyalarni jalb qilish — taʼlim muassasalarini milliy tadqiqot universitetlariga aylantirish nafaqat oliygohlarning, balki butun oliy taʼlim tizimining mamlakat ichida ham, xalqaro hamjamiyati orasida ham obroʻsini mustahkamlaydi. Shuningdek, universitet infratuzilmasini rivojlanishi va ilmiy-tadqiqot ishlariga yanada koʻproq sarmoya jalb qilishga olib keladi.

Yuqoridagilardan kelib chiqqan holda, milliy taʼlim tizimining yangi bosqichga olib chiqish va yoshlarga ilmiy asoslangan yanada sifatli va zamonaviy bilimlarni berish boʻyicha saʼy-harakatlar yaqin orada oʻz mevasini berishni boshlaydi va yoshlarimiz Oʻzbekiston nomini butun dunyoga tarannum etadilar.

Ishonch bilan ayta olaman, davlatimiz rahbarining siyosiy irodasi, yoshlarga va ularning taʼlimiga boʻlgan eʼtibori tufayli biz yoshlar yaratilayotgan imkoniyatlardan unumli foydalanishga, oʻz ustimizda yana koʻproq ishlab, oʻqib, izlanib, bildirilgan yuksak ishonchga munosib boʻlishga bor kuch-gʻayratimizni safarbar etamiz.

Xasanxodja ABIDOV,
Oʻzbekiston Respublikasi Oliy Majlisi Qonunchilik Palatasi huzuridagi
Yoshlar Parlamenti aʼzosi, partiya faoli.