Bolalarni zoʻravonlikning barcha shakllaridan himoya qilamiz

Joriy yilning toʻqqiz oyida qarindoshlar, jumladan, yaqinlar tomonidan bolalarga nisbatan 166 ta zoʻravonlik holatlari qayd etilgan. Albatta bu raqamlar ish huquqni muhofaza qilish idoralariga yetib borgan va qayd etilgan maʼlumotlar, deya aytish mumkin. Keyingi yillarda afsuski, bolalarning sogʻligʻiga, ruhiyatiga va hatto, or –nomusiga boʻlgan tahdid va tajovuzlar soni ortib boryapti.

Oʻzbekiston “Adolat” SDP Fargʻona viloyat Kengashi tomonidan “Bolalarni zoʻravonlikning barcha shakllaridan himoya qilish toʻgʻrisida”gi Oʻzbekiston Respublikasi qonuni loyihasi mazmun- mohiyatidan aholining barcha qatlamlari xabardorligini oshirish maqsadida targʻibot tadbirlarini amalga oshirib kelyapti.

Fargʻona politexnika instituti qoshidagi Akademik Litseyda pedagoglar jamoasi va oʻquvchilar ishtirokida targʻibot tadbiri tashkil etildi.

Unda “Adolat” SDP viloyat Kengashi raisi Shahnoza Gʻaniyeva, Fuqarolik ishlari boʻyicha Fargʻona viloyati sudining sudyasi Mohira Musaxonova, Fargʻona shahar Kengashi deputati Bunyod Ahmadaliyev, Fargʻona shahar IIOFMB, 2-son IIB xodimi Husanboy Homidovlar ishtirok etdilar.

Soʻzga chiqqanlar mazkur hujjat bilan bolalarga nisbatan zoʻravonlik shakllariga taʼrif berilib, ularni sodir etishni taqiqlash hamda qonunga binoan taʼqib qilishning huquqiy asoslari mustahkamlanayotganligi, bolalarni zoʻravonlikdan himoya qilishning umumiy chora-tadbirlari, zoʻravonlikdan jabrlangan bolalarning huquqlari haqida toʻxtalib oʻtdilar.

Oʻquvchilar oʻzlarining qiziqtirgan savollariga mutaxassislar tomonidan atroflicha javob oldilar.

“Adolat” SDP

Fargʻona viloyat kengashi Matbuot xizmati.