Huquqiy davlatning qonuniy poydevori

     Jamiyatda huquqiy madaniyatni yuksaltirish, jumladan yoshlarning bu borada bilimlarini oshirish Oʻzbekiston "Adolat" SDPning oʻz oldiga qoʻygan asosiy vazifalaridan biri.
     Bugun “Adolat” sotsial-demokratik partiyasi Qarshi shahar Kengashi tomonidan Oʻzbekiston Respublikasi Ichki ishlar vazirligi Qashqadaryo akademik litseyida Oʻzbekiston Respublikasi Konstitutsiyaning 31yilligi munosabati bilan “Vatan kelajagi yoshlar qoʻlida” loyihasi doirasida “Konstitutsiya bilimdoni” koʻrik-tanlovining Qarshi shahar bosqichi oʻtkazildi. Ishtirokchilar tanishtiruv, Oʻzbekiston Respublikasi Konstitutsiyasi sohadagi bilimlari, savol-javoblar va erkin mavzu shartlarida belgilangan qat’iy reglament tartibida bellashdilar. Tanlov shartlarini huquqshunoslardan tarkib topgan hakamlar hay’ati a’zolari xolisona baholab borishdi. Koʻrik-tanlovning yakuniy natijalariga koʻra 1-oʻrinni Ichki ishlar Qashqadaryo akademik litseyi oʻquvchisi — Ulugʻbeka Shaymardonova, 2-oʻrinni — Zufar Avazov, 3-oʻrinni — Sevinch Axmedova egallashdi. Tanlov shartlarini a’lo darajada bajarib, barchani e’tiborini tortgan Ichki ishlar Qashqadaryo akademik litseyi oʻquvchisi — Ulug’beka Shaymardonova gʻolib deb topildi va koʻrik-tanlovning viloyat bosqichiga yoʻllanma oldi.
     Tanlovning qolgan ishtirokchilari faol ishtiroki uchun turli nominatsiyalarga ega boʻlishdi.
- Ushbu ko’rik-tanlov orqali men oʻz ustimda yanada kuchliroq ishlashimga, partiya saylovoldi dasturi bilan yaqindan tanishishimga, Konstitutsiyamiz va boshqa hujjatlar toʻgʻrisidagi bilimlarimni mustahkamlashga imkoniyat yaratdi, - dedi tanlov gʻolibi Ulugʻbeka Shaymardonova. - Tanlov jarayonida doʻstlar orttirdim. Izlanishlarimni yanada davom ettirib, tanlovning viloyat bosqichida ham faol ishtirok etishga harakat qilaman. Partiyaning saylovoldi dasturlarini chin dildan qoʻllab-quvvatlayman .
     Bir soʻz bilan aytganda, partiya tomonidan tashkil etilayotgan bu kabi tadbirlar Yangi Oʻzbekistonimizni bilimli va vatanparvar yoshlar bilan birga qurishga xizmat qilishi muqarrar.
     Tadbir yakunida ishtirokchilar partiyaning esdalik sovgʻalari va faxriy yorliqlar bilan taqdirlandi.

Zumrad Bozorova,
Ichki ishlar Qashqadaryo akademik litseyi oʻqituvchisi.