Qandli diabetga qarshi kurashish– davr talabi

Aholi orasida soʻnggi yillarda keskin koʻpayib borayotgan noinfeksion (yuqumli boʻlmagan) kasalliklardan biri bu qandli diabet kasalligidir.

Oʻzbekiston “Adolat” sotsial-demokratik partiyasi saylovoldi va gʻoyaviy dasturlarida aholi salomatligi – ulkan boylik, jamiyatning barqaror rivojlanishi garovi ekanligi, sogʻliqni saqlash sohasidagi ustuvor maqsadlarimiz – aholiga barcha darajada (respublika, viloyat, tuman, qishloq) tibbiy xizmatlar koʻrsatilishini taʼminlash ustuvor vazifa sifatida belgilab olingan. Partiyaning bu boradagi “Salomatlik yoʻlida birlashaylik” loyihasi doirasida muntazam tadbirlar oʻtkazib kelinadi.

Ana shunday tadbirlardan biri Navoiy viloyat markazidan 250 km olis boʻlgan Tomdi tumanida tashkil etildi. “Adolat” SDP tuman Kengashi tashabbusi bilan tuman Markaziy poliklinikasida “Qandli diabetga qarshi kurashish haftaligi” munosabati bilan 40 yoshdan oshgan aholi tibbiy koʻrikdan oʻtkazildi.

Ahamiyatlisi, qandli diabet – yuqumli boʻlmagan kasalliklarning toʻrtta asosiy turidan biridir. Xalqaro diabet federatsiyasi maʼlumotlariga koʻra, dunyo boʻylab 425 milliondan ziyod odam ushbu kasallikdan aziyat chekmoqda va ularning aksariyati 2-toifa diabet bilan ogʻrigan bemorlardir. Oʻzbekistonda qandli diabet bilan kasallanganlar soni 245 mingdan koʻproq boʻlib, ulardan 2,3 mingdan koʻpi bolalar, 879 nafari esa oʻsmirlardir. Ayniqsa pandemiya asoratlari natijasida bolalarning ushbu kasallik bilan ogʻrishi koʻpayib bormoqda.

Shu boisdan “Qandli diabetga qarshi kurashish haftaligi” munosabati bilan qandli diabet kasalligi bilan kasallangan bemorlarni holidan xabar olish va kasallikni oldini olish maqsadida aholi orasida keng targʻib qilinishi muhim ahamiyatga ega boʻldi. Bu kabi tadbirlarning partiya tomonidan butun respublikamiz miqyosida anʼanaviy tarzda oʻtkazilishi aholi salomatligini yanada yaxshilanishiga xizmat qilishi shubhasizdir.

“Adolat” SDP Navoiy viloyat Kengashi Matbuot xizmati.