Qandli diabetga qarshi kurashish haftaligi

     Jahon sog‘liqni saqlash tashkiloti (JSST) ma’lumotiga qaraganda, qandli diabet kasalligidan dunyo bo‘yicha 500 millionga yaqin inson aziyat chekar ekan.
     JSST va Xalqaro diabetga qarshi kurash federatsiyasi tomonidan 14 noyabr — Xalqaro diabetga qarshi kurash kuni (World Diabetes Day), deb belgilangan.
     O‘zbekiston “Adolat” SDPning dasturida ham aholining salomatligini asrash, mamlakatimizda tibbiy xizmat ko‘rsatish darajasini jahon andozalariga javob beradigan darajaga yetkazish, jamiyatimizda sog‘lom turmush tarzini keng targ‘ib qilish, aholining reproduktiv salomatligini asrash, “Sog‘lom oila — sog‘lom jamiyat” konseptual g‘oyasini amalga oshirish kabi ustuvor maqsadlarga alohida e’tibor qaratilgan.
     Shunga muvofiq, tarzda bugun partiyaning Toshkent shahar Kengashi hamda Respublika ixtisoslashtirilgan endokrinologiya ilmiy-amaliy tibbiyot markazining (RIEIATM) Toshkent shahar filiali hamkorligida “Qandli diabetga qarshi kurashish haftaligi” jadal sur’atlar bilan boshlab yuborildi. Xususan, poytaxtimizning “Uchuvchilar” mahallasida istiqomat qiluvchi fuqarolar ixtiyoriy ravishda tibbiy ko‘rikdan o‘tishga taklif qilindi. Soha mutaxassislari ishtirokidagi tekshiruvlar natijasiga ko‘ra 4 nafar 60 yoshdan oshgan keksa onaxonlarimizda qandli diabet mavjudligini aniqlandi va ularga davolanishlari uchun zarur tavsiyalar berildi.
     Tadbir jarayonida O‘zbekiston “Adolat” SDP Toshkent shahar Kengashi raisi Mukarram Dadaxo‘jayeva mahalla ahli bilan sog‘lom turmush tarzi borasida suhbatlashar ekan, partiyaning aholi salomatligini asrashga qaratilgan loyihalari yuzasidan tushunchalar berib o‘tdi. Mahalla ahli bilan o‘zaro ochiq muloqot tarzida o‘tgan tadbir jarayonida faollik ko‘rsatgan ishtirokchilarga partiyaning esdalik sovg‘alari topshirildi.
     Aytish joizki, mazkur haftalik tadbirlaridan ko‘zlangan asosiy maqsad — partiya faollari, deputatlar hamda soha vakillari ishtirokida qandli diabet kasalligini oldini olish yuzasidan davra suhbatlari o‘tkazish, qolaversa, bemorlar holidan xabar olishdir.
     Joriy yilning 17 noyabr kuniga qadar davom etishi rejalashtirilgan ushbu haftalik mamlakatimizda qandli diabet kasalligi bilan kasallangan bemorlarga amaliy yordam berish, aholiga kasallik kelib chiqishi sabablari va omillari haqida ma’lumotlarni yetkazish, kasallikni oldini olishga qaratilgan tadbirlar tashkil etish va aholining turmush hamda ovqatlanish tarzini o‘zgartirish orqali bemorlar sonini qisqartirish choralarini ko‘rishga qaratilgan.
     Haftalik dasturidan ko‘ngilli fuqarolarimizning qondagi qand miqdorini o‘lchash va ularga salomatligi haqida soha mutaxassislarining zarur maslahatlarini berish ham nazarda tutilgan.

Muzaffar Muhammadnazar,
“Adolat” SDP Matbuot xizmati xodimi.