Toshkent shahrida renovatsiyaning mustahkam qonunchilik asoslari boʻlmaguncha uning asosida yangi qurilishlarni amalga oshirmaslik tarafdorimiz

Rasmiy munosabat     

Normativ-huquqiy hujjatlar loyihalari muhokamasi regulation.gov.uz portaliga “2024-yilda Toshkent shahar Chilonzor tumanini Xitoy tajribasi asosida, shu jumladan yangi yondashuvlar, innovatsion va “yashil texnologiyalar” hamda boshqaruvda zamonaviy usullarini qoʻllagan holda kambagʻallikdan chiqarish toʻgʻrisida”gi hukumat qarori loyihasi joylashtirildi.

Albatta, poytaxtimiz tumanlari rivojlangan davlatlar tajribasi asosida yanada obod etilishi, ularda innovatsion, “yashil texnologiyalar”ning va zamonaviy usullarning joriy etilishi, tadbirkorlik hamda turizm salohiyatining ortishi barchamizni quvontiradi.

Oʻzbekiston “Adolat” sotsial-demokratik partiyasi faollari, ekspertlari tomonidan mazkur qaror loyihasi atroflicha oʻrganilib, tahlil etilganida unda rejalashtirilayotgan ayrim masalalar yuzasidan savollar yuzaga keldi.

Taklif etilayotgan qaror loyihasiga koʻra, Chilonzor tumani hududidan Doʻmbirobod, Kichik halqa yoʻli, Dilxush 2-tor koʻchasi kesishmalari oraligʻida joylashgan yoʻl boʻyidagi aholi xonadonlari va xizmat koʻrsatish obyektlarini renovatsiya asosida koʻp qavatli qilib qayta qurish hamda birinchi qavatida yangi zamonaviy xizmat koʻrsatish obyektlarini tashkil etish rejalashtirilmoqda.

Renovatsiyaning mustahkam huquqiy asosi, xususan, uni amalga oshirishning qatʼiy talab va tartiblari, uy-joy mulkdorlari huquqlariga rioya etish kafolatlari boʻlmasdan turib, bu borada loyihalarning amalga oshirilishi jismoniy va yuridik shaxslarning manfaatlariga putur yetkazishi mumkin.

Shu sababli, Oʻzbekiston “Adolat” sotsial-demokratik partiyasi mazkur qaror loyihasini renovatsiyaga oid qonunchilik asoslari mavjud emasligini  hamda keng jamoatchilik, shu jumladan Chilonzor tumani aholisi bilan har tomonlama muhokama qilib, ularni fikrini inobatga olgan holda takomillashtirish maqsadga muvofiq, deb hisoblaydi.

Oʻzbekiston “Adolat”
sotsial-demokratik partiyasi
Matbuot xizmati