Urganchlik Konstitutsiya bilimdonlari bellashdi

Avval xabar berganimizdek, partiya tashabbusi bilan yurtdoshlarimiz, ayniqsa yoshlarning eʼtirofiga sabab boʻlib kelayotgan “Konstitutsiya bilimdoni” koʻrik-tanlovi vohamiz boʻylab oʻz oʻrni va nufuziga ega boʻlib kelayotgani quvonarlidir.

Bugun Urganch shahar 2-son kasb-hunar maktabida boʻlib oʻtgan tanlovning Urganch shahar bosqichi har qachongidan ham samarali tashkil etildi. Tanlovga shahardagi texnikum va kasb-hunar maktablaridan ishtirokchilar va ularning ustozlari, hamkor tashkilotlardan tarkib topgan hakamlar hayʼati, keng jamoatchilik hamda partiya faollari, deputatlari ishtirok etishdi.Ishtirokchilar koʻrik-tanlov Nizomiga asosan, uchta yaʼni “Tanishtiruv”, “Savol-javob” hamda “Erkin mavzu” shartlari boʻyicha bellashdilar.

Tanlov shartlarini tegishli soha vakillaridan tarkib topgan hakamlar hayʼati aʼzolari xolisona baholab borishdi.

Tanlov shartlarini aʼlo darajada bajarib, barchani eʼtiborini tortgan Urganch shahar 2-son kasb- hunar maktabi oʻquvchisi Mushtariy Quranboyeva gʻolib deb topildi va koʻrik-tanlovning viloyat bosqichiga yoʻllanma oldi.

2-oʻrinni viloyat IT park oʻquvchisi Shahina Mengliyeva, 3-oʻrinni “Ibn Sino” texnikumi oʻquvchisi Mohichehra Ibodullayeva qoʻlga kiritishdi. Qolgan ishtirokchilar tanlovning faol ishtiroki uchun turli nominatsiyalarga ega boʻlishdi.

 Mushtariy Quranboyeva, tanlov gʻolibi:

– Koʻrik- tanlov oʻz ustimda yanada kuchliroq ishlashimga, partiya saylovoldi dasturi bilan yaqindan tanishishimga, Konstitutsiyamiz va boshqa hujjatlar toʻgʻrisidagi bilimlarimni mustahkamlashga imkoniyat yaratdi. Tanlov jarayonida doʻstlar orttirdim. Oʻz isteʼdodimga boʻlgan ishonchim yanada ortdi. Izlanishimni yanada davom qilib, tanlovning viloyat bosqichida ham nufuzli oʻrinni qoʻlga kiritishga harakat qilaman. Kelgusida partiyaning tadbirlarida faol ishtirok etishni maqsad qildim.

Bir soʻz bilan aytganda, partiya tomonidan tashkil etilayotgan bu kabi tadbir va koʻrik-tanlovlar yangi Oʻzbekistonimizni bilimli va vatanparvar yoshlar bilan birga qurishga xizmat qilishi shubhasizdir.

Zamira Abdullaeva,

“Adolat” SDP Xorazm viloyat Kengashi matbuot kotibi.