“O‘ZBEKISTON — 2030” STRATEGIYASI yangi muvaffaqiyatlarga zamin yaratadi

Joriy yilning 30 aprelida Umumxalq referendumi orqali Bosh qomusimizning yangi tahriri maʼqullandi. Bu bilan Yangi O‘zbekiston taraqqiyotida tub burilish yasaldi, deb baralla aytish mumkin. Negaki Konstitutsiya barcha muvaffaqiyatlarimiz, mamlakatimizning ijtimoiy-iqtisodiy, siyo­siy ravnaqining huquqiy asosidir. 

Prezidentimiz 2023 yil 11 sentyabrda imzolagan “O‘zbekiston — 2030” strategiyasi to‘g‘risida”gi farmoni amalga oshirilayotgan islohotlarimizning ko‘lamini kengaytirish barobarida yangidan-yangi tashabbus­larga turtki bo‘ladi.

Zero, “O‘zbekiston — 2030” strategiyasi bir necha muhim yo‘nalishlarda amalga oshiriladi. 

Ayniqsa, jamiyatda qonun ustuvorligini taʼminlash, odil sudlovga erishish, iqtisodiyotning asosiy drayveri bo‘lgan tadbirkorlikni yana-da rivojlantirish, ijtimoiy sohada islohotlarni “inson manfaati eng ulug‘ maqsad” tamoyili asosida amalga oshirish kabi masalalar ustuvor etib belgilanmoqda.

Strategiyaning joriy yilning o‘zidayok amalga oshirilishi islohotlarning surʼatini yana-da tezlashtirishga xizmat qiladi. Prezident qarorlariga asosan, jumladan, strategiyaning qonun ustuvorligini taʼminlash, xalq xizmatidagi davlat boshqaruvini tashkil etish yo‘nalishi doirasida hamda davlat xizmatlarini ko‘rsatishda aholiga yana-da qulayliklar yaratish va ortiqcha sansalorliklarga barham berish maqsadida 2024 yil 1 yanvardan boshlab yo‘l harakati xavfsizligi sohasida davlat xizmatlarini ko‘rsatishda, shu jumladan, avtomototransport vositalarini davlat ro‘yxatidan o‘tkazishda avtomototransport vositasining oldi-sotdi shartnomalari va boshqa notarial tasdiqlangan bitimlarni “Notarius” avtomatlashtirilgan axborot tizimidan olish amaliyoti yo‘lga qo‘yiladi va ariza beruvchilardan mazkur hujjatlarni talab qilish taqiqlanadi. 2024 yil 1 martdan eʼtiboran esa notarial idoraga kelmasdan, shu jumladan, chet eldan turib, mol-mulkdan foydalanish bilan bog‘liq bitimlarni (mulk huquqini bosh­qa shaxsga o‘tkazishdan tashqari) elektron raqamli imzodan foydalangan holda videokonferensaloqa orqali rasmiylashtirish tartibi yo‘lga qo‘yiladi.

Qolaversa, 2024 yil 1 yanvardan bosh­lab bosqichma-bosqich barcha shahar va tumanlarda “Mahalla byudjeti” tizimi joriy etilishi mahalla institutini yana-da takomillashtiradi. Bunda tuman va shahar byudjetlariga tushadigan soliq tushumlarining bir qismi mahallalarning ijtimoiy-iqtisodiy muammolarini hal qilish jamg‘armalariga yo‘naltiriladi. Tashabbusli byudjet amaliyotini va mahallalarning moliyaviy mustaqilligini yana-da kengaytirish maqsadida 2024 yilda jamoatchilik fikri asosida shakllantiriladigan loyihalarni moliya­lashtirish uchun davlat byudjetidan 10 trillion so‘m ajratilib, shundan “Obod qishloq” va “Obod mahalla” das­turlari uchun kamida 4 trillion so‘m yo‘naltiriladi. 

Bundan tashqari, 2024 yil yakuniga qadar qonunda belgilangan asoslarda tezkor-qidiruv va tergov harakatlariga sanksiya berish masalasi alohida tergov sudyalari tomonidan ko‘rib chiqish tartibi joriy etiladi. Tadbirkorlik sohasida javobgarlikni yana-da liberallashtirish maqsadida 2024 yil 1 yanvardan boshlab birinchi marta jinoyat sodir etgan shaxsni, agar u sud maslahatxonaga kirguniga qadar soliqlar va yig‘imlar, shu jumladan, penyalar va boshqa moliyaviy sanksiyalar tarzida davlatga yetkazilgan zararning o‘rnini to‘liq qoplasa, javobgarlikdan ozod qilish, tadbirkorlik subyektlariga nisbatan qo‘zg‘atilgan har bir jinoyat ishi bo‘yicha tergov hamda sud jarayonida tegishli mansabdor shaxs jinoyat ishi materiallarini ish yurituviga qabul qilgan vaqtdan boshlab tadbirkorni himoya qilishga Biznes ombudsman, Savdo-sanoat palatasi, shuningdek, tadbirkorlik subyekti aʼzo hisoblangan boshqa tashkilotni jamoat himoyachisi sifatida jalb etish (xabar qilish) tartibi joriy etiladi. 

Yana bir gap. “O‘zbekiston — 2030” strategiyasining qonun ustuvorligini taʼminlash, xalq xizmatidagi davlat boshqaruvini tashkil etish yo‘nalishi bo‘yicha 2023 yilga mo‘ljallangan amaliy tadbirlar rejasi, 2023-2024 yillarga mo‘ljallangan maqsadli ko‘rsatkichlar hamda 2023 yilda ishlab chiqiladigan normativ-huquqiy hujjatlar loyihalari ro‘yxati tasdiqlanadi.

Shuni alohida taʼkidlashni istardimki, parlament aʼzosi sifatida farmonda belgilanganidek, bolalarni maktabgacha taʼlim va tayyorlov guruhlari bilan to‘liq qamrab olish, 100 foiz maktabgacha taʼlim tashkilotlarini toza ichimlik suvi va zamonaviy sanitariya-gigiyena infratuzilmasi bilan taʼminlash, olis va chekka hududlarda joylashgan 715 ta umumiy o‘rta taʼlim muassasalari o‘quvchilari uchun bepul avtobuslarni yo‘lga qo‘yish, umumiy o‘rta taʼlim muassasalarini toza ichimlik suv va zamonaviy sanitariya-gigiyena, infratuzilmasi bilan to‘liq taʼminlash, 700 ga yaqin nomdagi yangi darsliklar, mashq daftarlari, pedagoglar uchun metodik qo‘llanmalar va mobil ilovalar yaratish, yangi avlod darsliklari asosida planshetlar uchun 1 000 ta multimedia dasturlarini yaratish, taʼlim tashkilotlariga har yili 500 nafar “til egalari” bo‘lgan xorijiy mutaxassislarni jalb etish singari vazifalar qayd etilgani eʼtirofga molik.

Albatta, mazkur ezgu ishlar jarayonida parlament aʼzolarining bevosita vazifasi, birinchi navbatda, rejalashtirilgan normativ-xuquqiy hujjatlarni qabul qilishda joylarga chiqqan holda mahalliy kengash deputatlari bilan birgalikda mazkur tadbirlarning bajarilishini tahlil qilish va monitoringini tizimli tashkil etish hisoblanadi. Ayni masʼuliyatli vazifani bekamu ko‘st ado etishimizga ishonaman.

Narimon UMAROV,

O‘zbekiston Respublikasi Oliy Majlisi 

Senatining sud-huquq masalalari va 

korrupsiyaga qarshi kurashish qo‘mitasi raisi