SUZUK OTA HAQIDA KITOB NASHR ETILDI

O‘zbekiston “Adolat” SDP Faxriylar Kengashi raisi, Xalqaro ekologiya, inson va tabiat xavfsizligi fanlari akademiyasining akademigi Kamoljon Shodimetovning muallifligida “Suzuk ota izidan” asari  nashrdan chiqdi.

Unda muallif, xalqimizning maʼnaviy qadriyatlaridan joy olgan o‘tmish ulamolari, ularni xotirlab qurilgan inshootlar qatoridan joy olgan, Toshkentdagi va Qozog‘istonning Chimkent shahri(Sayram)da Suzuk ota maqbaralari va masjidi majmuasi haqida, uning Islom dinini targ‘ib etishdagi faol ishtiroki yog‘och o‘ymakor ustasi sifatida elga tanilgani  hamda “hunarmandlar piri” sifatida tan olingani, Amir Temur bobomiz unga katta hurmat-ehtirom bildirib, maqbara va masjid qurdirgani xususida yozadi.

Ushbu asar bu muqaddas qadamjoga tashrif buyurgan har bir ziyoratchi,  sayyoh, tadqiqotchida tug‘ilishi tabiiy bo‘lgan savollarga javob beradi, ajdodlarimiz merosi va ularning bugungi dorilomon zamonlarda qadrlanishiga doir maʼlumotlarga qiziqishi bor har bir kitobxonga foydali manba bo‘lib xizmat qiladi.

Xoja Ahmad Yassaviyning suyukli nabirasi Suzuk ota (Mustafoqul) hazratlarining Toshkent shahri mahallalarining birida qarovsiz qolib kelgan maqbarasi O‘zbekiston davlat rahbari Shavkat Mirziyoyevning tashabbuslari bilan yirik majmuaga aylantirilganidan so‘ng keng jamoatchilik orasida ulamoning nomiga va faoliyatiga qiziqish va eʼtibor kuchayganligi maʼlum.

Vaholanki, Suzuk ota nomi bilan bog‘liq boshqa qadamjolar borligi, ularning tarixini o‘rganish masalasiga yana ham aniqlik kiritilishiga kitob muallifi asosiy eʼtiborini qaratgan.

Uning o‘giti (g‘oyasi) da "ilmli bo‘l, lekin bir hunar egasi bo‘l” deyilgan. U o‘z g‘oyasiga sodiq, amal qilib, faol hayoti davomi barcha tadbirkor, hunarmandlarga ibrat ko‘rsatgan. Shuning uchun ham, u yashagan mahallaga “Suzuk ota” nomi qo‘yilgan.

 Suzuk ota majmuasini ochilish marosimiga tashrif buyurgan   Prezidentimiz Shavkat Mirziyoyev – Hunarmandchilik – halol kasb.  Bugungi kunda eng katta vazifamiz – ish joylari yaratish. Hunarmandlarga sharoit yaratsak, ham o‘zini boqadi, ham boshqalarni ish bilan taʼminlaydi. Shogirdlar tarbiyalasa, qancha yoshlar hunarli bo‘ladi, o‘z tadbirkorligini ochib, daromad topadi, - degan edi.

Ushbu Suzuk ota ilmiy-ommabop kitob keng ommaga mo‘ljallangan.

O‘zbekiston “Adolat” SDP  Matbuot xizmati