Эҳтиёткор бўлайлик, азизлар

Коронавирус инфекцияси хавф солаётган бугунги кунда Ўзбекистон ҳукумати бутун халқимизни асраб-авайлаш учун барча чора тадбирларни кўрмоқда. Шахсан муҳтарам Президентимиз ҳам бу офатни мамлакатимиз ҳудудини тезроқ тарк этиши, халқимизни омон сақлаш учун керакли ёрдам ва касалланганларга барча керакли ёрдамни аямаслик юзасидан мутасаддиларга бот-бот топшириқ бераяптилар.

Бунинг исботи сифатида 2020 йилнинг 23 март куни Ўзбекистон Республикаси Вазирлар Махкамасининг “Коронавирус инфекцияси тарқалишига қарши қўшимча чора-тадбирлар тўғрисида”ги қарори эълон қилинди. Унда Ўзбекистон Республикасида аҳолининг санитария-эпидемиологик осойишталиги ва хавфсизлигини таъминлаш, коронавирус инфекцияси тарқалишининг олдини олишда мутасадди давлат ва хўжалик бошкаруви органлари ҳамда ташкилотларнинг мувофиқлаштирилган фаолиятини ташкил этиш, фуқароларнинг ҳаёти ва соғлигини мухофаза қилиш мақсадида аниқ чора-тадбирлар, қилиниши керак бўлган ишлар белгиланган.

Мамлакатимизнинг барча ҳудудларида коронавирусга чалинган фуқароларимизни тезроқ соғайиб кетишлари учун тиббиёт ходимлари кечаю-кундуз тиним билмасдан ишламоқдалар. Биз ўз атрофига 34 мингдан ортиқ партия аъзоларини бирлаштирган Ўзбекистон “Адолат” СДП вилоят Кенгаши ҳам айни пайтда барча юртдошларимизни тиббиёт ходимлари маслаҳатларига амал қилишга, кўча-кўйда тўпланмасликка, оммавий тадбирларда иштирок этмасликка даъват этамиз.

Шуни унутмаслик керакки, коронавирус ҳазиллашадиган инфекция эмас. Ҳалигача дунёдаги энг ривожланган давлатлар ҳам бу офатга қарши вакцина ярата олишмаяпти. Шуни ҳисобга олиб, мен халқимизни огоҳликка чақираман. Ҳаммамиз бирлашиб, бирдам бўлиб, ҳаракат қилсак, коронавирус чекиниши аниқ. Жаҳон соғлиқни сақлаш ташкилоти маълумотларига қараганда коронавирус инфекциясини юқтириб олган 1 нафар шахс 30 кунда 406 нафар кишини заҳарлаши мумкин экан. Шунинг учун ҳам мен халқимизни доимо санитария қоидаларига риоя қилишга чақираман. Хусусан, қўлларни ювиш, тиббий ниқобларни тақиш ва бошқаларга жиддий амал қилиш лозим.

Ўзбек халқи азал-азалдан ҳар қандай қийинчиликларни ҳам сабр-қаноат билан енгиб ўтган. Биз барчамиз бағри кенг, улуғ физилатларга эга ана шу халқнинг вакилимиз. Мен албатта ишонаман, халқимиз одоб аҳлоқ билан ҳамма айтилганларга амал қилиб, коронавирус инфекцияси тарқалиб кетишига йўл қўймайди. Барчамиз огоҳ бўлайлик, азизлар.

Рўйиддин РАУПОВ,

Ўзбекистон “Адолат” СДП

Қашқадарё вилоят Кенгаши раиси,

халқ депутатлари вилоят Кенгаши депутати