Карантин ҳали тугамади

Бутун ер юзида одам танламасдан қурқинчли рақамларда намоён бўлаётган коронавирусга оид статистикалар одамни ҳушёрликка ундайди. Бу касаллик билан ҳазиллашиб бўлмаслигини англаб етишимизни истаяпти. Бу кўрсаткичларни кўриб хулоса қилишимиз зарур.

Пандемия инсоният бошига жуда катта кулфатларни солмоқдаки, мамлакатимизда ўзимиз ва яқинларимиз саломатлиги, юртимиз тинчлиги йўлида давлатимиз раҳбари бошчилигида оқилона сиёсат олиб борилаётганига шукр қилишимиз лозим.

Бугунги кун ҳолатига АҚШда 2 миллиондан ортиқ, Бразилияда эса бир миллонга яқин киши ушбу касалликка чалинган бўлса, учинчи ўринни банд этиб келаётган Россияда эса шу кунгача беш юз мингдан зиёд  киши коронавирус юқтириб олди. Бу рўйхатнинг давомида Ҳиндистон, Буюк Британия, Испания, Перу, Италия, Чили, Эрон каби мамлакатларни учратиш мумкин. Айтиш керакки, ушбу вирус кириб бормаган мамлакатлар саноқлигина қолди ва бу бизни ҳушёр бўлишга, ўзимизни ўзимиз эҳтиёт қилишга, карантин қоидаларини унутиб қўймасликка ундайди.

Азиз юртдошлар, карантин қоидалари юмшатилди деб бепарволикка берилмайлик, қўлларни 20 сония совунлаб ювиш, ниқоб билан юриш, 2 метр масофа сақлаш, фарзандларимизни уйда олиб ўтириб, уларга маънавий мулк бўладиган китоблар, эртаклар, зарур кўникмалар бериш, атрофимиздаги одамларни бу хавфдан огоҳ қилиш, карантин қоидаларига риоя қилиш каби зарур нарсаларни унутмайлик.

Ўзимизни қанча эҳтиёт қилсак, оила аъзоларимиз ва яқинларимиз саломатлигини асраган бўламиз. Қадимдан халқимиз “Бойликнинг боши соғлиқ”, “Касалликни даволагандан кўра олдини олган маъқул” деб бекорга айтишмаган. Келинг, бу гапга риоя қилайлик. Уйда карантин қоидаларига риоя этган ҳолда, ўз саломатлигимизни сақлаб қолайлик, зарурат бўлмаганда кўчага чиқмайлик.

Тозагул ХОЛИҚОВА,

Халқ депутатлари Самарқанд вилоят Кенгаши депутати