Синовлар бизни янада бирлаштирди

Кейинги вақтда “Янги Ўзбекистон” деган ибора тез-тез тилга олинмоқда. Бу бежиз эмас. Мустақил давлатимиз ҳаётида янги бир давр бошланди. Ҳар бир соҳада ривожланиш. Ҳатто бир неча ойдан буён бутун дунё аҳлини ташвишга солган пандемияга қарамай тараққиёт йўлидан бораётганимиз, келажакка катта ишонч билан қараб дадил одимлаётганимиз бунинг тасдиғидир.

Давлатимиз мустақиллигининг 29 йиллиги кутиб олинган айни кунларда ортга назар ташласак, эришган ютуқларимиз бизни қанчалик қудратли кучга эга эканлигимизни кўрсатади. Ва ўз ўрнида Президентимиз мустақиллигимизнинг 29 йиллиги байрам тантанасидаги нутқида таъкидлаганларидек, “ Биз қандай таҳликали ва суронли даврларни бошимиздан кечирмайлик, қандай ютуқ ва натижаларга эришган бўлмайлик, мустақиллик ғояси, истиқлол руҳи бизга доимо тоғдек таянч бўлмоқда. Бугун чексиз ифтихор билан айта оламизки, донишманд халқимизнинг узоқни кўра олиши, бирдамлиги ва фидойи меҳнати билан барча синовлардан муносиб ўтиб келмоқдамиз”.

Узоққа боришга хожат йўқ. Охирги беш ой биз учун катта синов даври бўлди. Карантин даврида касалликка қарши курашиш баробарида юртдошларимизнинг бирдамлиги, жипслиги ва ҳар қандай вазиятда хеч бир фуқарони ёлғизлатиб қўймаслиги яна бир бор тасдиғини топди. Юртбошимизнинг  ташаббуси билан “Саховат ва кўмак” умумхалқ ҳаракати доирасида амалга оширилган ишларни сўз билан баҳолаб бўлмайди.  Аҳоли саломатлиги қанчалик муҳим вазифага айланган бўлса, иқтисодиётимизни тиклаш ва бандлик шунчалик долзарб аҳамият касб этди. Бу вазифаларни бир куч бўлиб уддалаш баробарида  мураккаб синовни енгиб ўтмоқдамиз.

Кези келганда андижонлик “адолатчилар” бу ҳаракатнинг фаол иштирокчиси бўлганини айтиш ўринли. Тиббиётчи сафдошларимиз оғир кунларда энг оғир нуқталарда бўлди. Даволаш ишлари билан бирга тарғибот тадбирлари ташкил этилди. Натижада фуқароларда ўз саломатлигига бўлган эътибор, шифокорларнинг кўрсатмаларига амал қилиш кучайди. “Ёш адолатчилар”дан ташкил этилган волонтёрлар энг чекка ҳудудларга ҳам кириб бориб, соғлом турмуш тарзини яратишга эришдилар. Президентимиз айтганларидек, халқимиз, давлатимиз уларнинг матонатини ҳеч қачон унутмайди.

Вазиятдан келиб чиқиб, бу йил Истиқлол тантаналари торроқ доирада, асосан оила даврасида нишонланди. Шунга қарамай қалбларда Мустақиллик нафаси жўш уряпти. Хали яна шодиёна кунлар, байрам тантаналари ҳаётимизни безайди. Янги Ўзбекистонни барпо этаётган халқимиз бунга муносиб.

Мадаминжон МАДАЗИМОВ,

Ўзбекистон “Адолат”  СДП Андижон

вилояти Кенгаши раиси