“Адолат” СДП қай жиҳатлар билан “ягона партия” саналади?

Бугун сўнгги натижалар билан якунига етган сайлов “Адолат” СДП учун сиёсий ҳаётдан сабоқ берувчи мактаб ҳамда ғоялари ила курашувчи майдон вазифасини ўтади. Сайловлар партиямизнинг аҳоли ўртасида танилувчанлигини оширди, хайрихоҳларини кўпайтирди.  

Аввал ҳам таъкидлаганимиздек, биз бунданда юқорироқ натижа кутгандик. Сайловолди ташвиқот бошланган кундан эътиборан биз парламентда энг кўп ўринни олиш сари олға интилдик. Номзодларимиз ва фаолларимизни шу мақсад атрофида бирлаштирдик.  

Меҳнатларимиз бесамар кетмади. “Адолат” СДП энг кўп ўсишга эга бўлган партияга айланди. Тарихда илк бор учинчи ўринга кўтарилиб, депутатлар сони бўйича иккита сиёсий партияни ортда қолдирди. Адолат” СДП – ўзбек парламенти тарихидаги ҳар сайловда ўсишга эришаётган ягона партия.

“Адолат” СДП таркибида энг кўп аёл депутатлар сайланган партия сифатида ҳам ажралиб турибди. Олий Мажлис Қонунчилик палатасига сайланган 24 та депутатнинг 13 нафари аёллардир. Бу сайловолди дастуримизда устувор саналган вазифа – аёлларнинг сиёсий фаоллигини ошириш, сиёсий жараёнларда пассив кузатувчи эмас, фаол иштирокчига айлантиришнинг амалий ифодасидир.

Чинданда янгиланган парламентда фракциямиз ҳар жиҳатдан муваффақиятли шаклланди. Қуйи палатага 5 нафар рус миллатига мансуб депутат сайланган бўлса, улардан 3 нафари “Адолат” СДПга тегишли. Сайланган депуталарнинг 3 нафари тожик миллатига мансуб, шундан 1 таси фракциямиз аъзосидир. Ягона қирғиз миллатига мансуб депутат ҳам айнан бизнинг партиядан сайланди.

Партиямиз сайловларда блогерларни номзод сифатида жалб этиш амалиётини қўллади ва блогерни маҳаллий Кенгаш депутати лавозимига сайланишига эришди.

Ушбу ютуқларимиз келгуси 5 йилликдаги фаолиятимиз ривожига салмоқли хисса қўшишига умид қиламиз! Халқнинг ишончидан миннатдормиз!

“Адолат” СДП Матбуот хизмати