Янгиликлар
Расмий
Муносабат
News

ДИҚҚАТ! ЯНГИ АКЦИЯ: “ПАРТИЯ ПАТРОНАЖИ”!

         Энди сиз партияга аъзо бўлиш истагида ҳудудий ташкилотларга келишингиз шарт эмас, балки биз сизнинг хонадонингизга бориб қўлингизга партия билетини топширамиз.           “Адолат” СДПнинг дастурий ғоялари манзур бўлса, эшигимиз сизлар учун доимо очиқ. Акция доирасида эса ушбу жараённи сизнинг хонадонингизда амалга оширамиз. Демакки, халқ вакиллари эшиги партия учун очиқ экан!          Партияга аъзо бўлмоқчимисиз? Ҳудудий Кенгашга ташриф буюриш учун вақт ёки имконингиз йўқми? Унда биз сизга пешвоз чиқамиз. Сайтимиз орқали онлайн ариза тўлдирсангиз бас. “Партия патронажи” хузурингизга боради, осонлик ва қулайлик асосида сафимизга қўшиласиз.          Ушбу акция дастлабки синов кўринишида “Адолат” СДП Тошкент шаҳар Кенгаши миқёсида амалга оширилади. Вакиллар билан боғланинг ва бизни ўз уйингизда кутинг!   Мурожаат учун телефон: 71 288-42-04 Электрон почта: toshkent.shaxar@mail.ru, adolat_info@mail.ru. Ижрочи: А.Аманов +998 90 900-12-44 ...

Батафсил
News

Меҳр ришталари билан боғланган кўнгил йўли

Жонажон Ўзбекистоним, мангу бўл омон! 1991 йил 31 август. Тарих ўзани миллий тақдиримизда туб бурилиш ясади. Халқимиз, мамлакатимиз ҳаётида энг улуғ, энг азиз кун сифатида мангуга муҳрланиб қолди. ...Мамлакатимизга ташриф буюраётган меҳмонларни кўп кузатаман. Улар таниқли сиёсатдонлар, давлат ва жамоат арбоблари, олим ва мутахассислар, оддий, аммо кўпни кўрган сайёҳлар. Юртимиз меҳмонлари мамлакатимиздаги ютуқларни ҳайрат ва ҳавас билан кўриб, ижобий хулосалар чиқармоқда.  Ўзбекистон айни кунларда улкан қурилиш ва ободонлаштириш майдонига айланган. Зеро, шаҳар кўринишини олаётган қишлоқларимиз сони ошиб бормоқда. Бундай шиддатли тараққиётни кўриб, буюк бобомиз Амир Темурнинг “Бизнинг кимлигимизни билмоқчи бўлсанг, биз қурган иморатларга боқ”, деган сўзлари қалбимиздан ўтади. Айниқса, шаҳар ва қишлоқларимизга кўрк бераётган ижтимоий иншоотлар, намунавий лойиҳалар асосида барпо этилаётган уй-жойлар, дам олиш масканлари, истироҳат боғлари, равон кўчалар-у йўллар турмуш тарзимиз нақадар яхшиланиб, ҳаётимиз фаровонлашиб бораётганидан далолатдир. Энг муҳими, юртимиз тинчлиги, Ватанимиз равнақи, халқимиз фаровонлиги йўлида олиб борилаётган саъй-ҳаракатлар натижасида мамлакатимизда тинчлик ва хотиржамлик барқарор, одамлар руҳиятида кўтаринки кайфият ҳукмрон. Бундай муваффақиятларнинг бош омили, аввало, давлатимиз сиёсатининг инсонийлик ва эзгулик тамойиллари билан уйғунлигидадир. Бинобарин, мамлакатимизда инсон манфаатлари ҳамма нарсадан устун. Муҳими, ҳар бир инсоннинг ҳуқуқ ва эркинликлари, шаъни, қадр-қиммати, турар жойи, мулки ва бошқа дахлсиз ҳуқуқлари қонунларимиз, Президентимиз ҳимоясида. Инсонийлик ва эзгулик қуруқ гап эмас. Энг аввало, Ватан равнақи ва тинчлиги, халқ фаровонлиги йўлида садоқат билан хизмат қилиш, халқимизни рози қилиш, айниқса, одамлар қалбига қулоқ солиш, кўнглига йўл топиш. Бугунги кунда бу борадаги ишлар кўлами янада кенгайди, янада муҳим паллага кўтарилди. Рақамларга мурожаат қиладиган бўлсак, жорий йилнинг биринчи ярмида мамлакат ялпи ички маҳсулоти 5,8 фоиз, саноат маҳсулотлари ишлаб чиқариш ҳажми 6,9 фоиз ўсди. Маҳаллий бюджетлар ихтиёрида 2,6 триллион сўмдан зиёд ёки ўтган йилнинг шу даврига нисбатан 1,5 баробар кўп маблағ қолдирилди. Бюджет даромадлари қарийб 51 триллион сўм ёки прогнозга нисбатан 109 фоизни ташкил этди. Яна шуни алоҳида таъкидлаш жоизки, бу йил табиат ҳам бизга қарашди. Бобо-деҳқонларимиз халқимиз дастурхони учун 7 миллион тоннадан ортиқ ғалла жамлаб, ҳаммамизни хурсанд қилди. Яна шуни алоҳида таъкидлаш жоизки, мана бу йил биз Мустақиллигимизнинг 28 йиллигини муносиб кутиб олиш тараддудидамиз. Халқимиз учун энг улуғ, энг азиз айём, эркин, обод ва фаровон ҳаёт қуриш йўлидаги барча ютуқ ва муваффақиятларимизнинг асосий манбаи бўлган Ватанимиз мустақиллигининг ўтган йигирма саккиз йилида амалга оширилган саъй-ҳаракатлар эвазига миллий тикланишдан миллий юксалиш сари одимлаяпмиз. Бу одимларимиз нафақат эришаётган ютуқларимиз, маънавиятимиз, дахлдорлигимиз, масъулиятимиз билан ўлчанади, албатта. Биз фақат эришган ютуқларимизга маҳлиё бўлиб қолмасдан, юрт тараққиётига ўз улушимизни қўшиш билан қувонишимиз керак. ...Ҳаммамизни тарбиялаган, вояга етказган – шу халқ. Барчамизга туз-насиба берган ҳам шу халқ. Бизга ишонч билдирган, раҳбар қилиб сайлаган ҳам айнан шу халқ. Шундай экан, биз, биринчи навбатда, ким билан мулоқот қилишимиз керак – одамларимиз билан. Ким билан бамаслаҳат иш тутишимиз керак – аввало, халқимиз билан. Шунда халқимиз биздан рози бўлади. Халқ биздан рози бўлса, ишимизда унум ва барака бўлади. Мамлакатимиз Президенти Шавкат Мирзиёев 2016 йилнинг 14 декабрида Олий Мажлис палаталарининг қўшма мажлисида шу сўзларни айтганида барчамизнинг кўнглимиз равшан тортди. Шеърият мулкининг султони Алишер Навоий: “Эл поясин англай десанг асрорини бил,  Кўнглидаги муддаосин изҳорини бил” деб айтганидек, давлатимиз раҳбари ишни кўнгилдан, халқ кўнглини тафтиш қилишдан бошлади. Кўнгил... Ҳа, қулоққа оддийгина эшитиладиган бу сўз замиридан қалб, дил, юрак каби тушунчалар ўрин олган. У билан тиллашиш, уни эшита билиш, унга қўл солиш нақадар муҳим иш эканлигини тезда ҳамма англай бошлади. Хўш, давлат раҳбари халқ кўнглига йўл топишни нимадан бошлади? Албатта, юзма-юз мулоқотдан. Уйма-уй, хонадонма-хонадон кириб боришдан. Одамларни қийнаётган муаммоларни аниқлаб, зудлик билан ҳал этишдан. Бу ишларни сўзда эмас, амалда бажариш барча даражадаги раҳбарларнинг асосий вазифаси этиб белгиланди. 2017 йил мамлакатимизда “Халқ билан мулоқот ва инсон манфаатлари йили” деб эълон қилинди. Унинг дастурига халқ давлат органларига эмас, давлат органлари халқимизга хизмат қилади, деган тамойил асос қилиб олинди. Бундан ташқари, 2016 йилнинг 28 декабрида Президентнинг “Жисмоний ва юридик шахсларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида”ги фармони қабул қилинди. Фармонга мувофиқ, Президентнинг Халқ қабулхоналари ва Виртуал қабулхонаси ташкил этилди. Ўз-ўзидан савол туғилади. Нима учун Президентнинг Халқ қабулхоналари ва Виртуал қабулхонаси ташкил этилди? Ахир халқнинг арзи ва шикоятларини кўриб чиқадиган давлат ва хўжалик бошқаруви органлари раҳбарлари, масъул мансабдор шахслар, маҳаллий ҳокимликлар вакиллари борку?! Гап шундаки, узоқ йиллар давомида халқ билан раҳбарлар ўртасидаги мулоқотлар сустлашиб, “хўжакўрсин”га айланиб қолганди. Одамлар орасидан кимдир бирор раҳбарга мурожаат қилиб келса, “шикоятбоз”, “аризабоз”га айланарди. Фуқаролар турли ташкилотлар ўртасида йиллаб сарсон бўларди. Одамларнинг ўз арзлари билан биринчи раҳбарлар қабулига кириши амримаҳол бўлиб қолганди. Айниқса, давлат органлари ва маҳаллий ҳокимиятларнинг темир панжаралар ортига бекиниб олганлиги одамларнинг ғашига тегиб, раҳбарларга бўлган ишончини сусайтирганди. Оқибатда давлат органлари билан халқ ўртасидаги масофа анчагина узоқлашиб қолганди. Ҳа, шу сабабли ҳам мамлакатимиз раҳбари Шавкат Мирзиёев ислоҳотларни инсон ҳуқуқларини тўлиқ рўёбга чиқаришдан, халқ билан давлат ўртасига ишонч кўпригини ўрнатишдан бошлади. Инсон ҳуқуқларининг уч ўзагидан бири бўлган Ўзбекистон фуқароларининг сиёсий ҳуқуқларини, айнан мурожаат қилиш ҳуқуқини амалга оширишлари учун кенг ва тенг шароитлар яратиш масалаларига алоҳида эътибор қаратди. Юртдошларимиз мурожаатларига – ўз фикр-мулоҳазалари, ўйлари, дард-ташвишлари, орзу-армонларига Президент даражасида эътибор қаратилаётганлиги ҳар биримиз учун муҳим аҳамият касб этмоқда. Пировардида, одамларнинг ҳаётга, давлатга, жамиятга, келажакка ишончи нафақат мустаҳкамланмоқда, ортиб ҳам бормоқда. Барчамиз ҳаётнинг мавжуд аччиқ ҳақиқатларига юзма-юз келиб, реал воқеликнинг шиддатли тўлқинида ёниб ишлаш мумкин эканига рўй-рост шоҳид бўлмоқдамиз. Буларнинг барчаси, аввало, муаммоларга тик қараб, уларни бир четдан ҳал қилишга киришилганидан, ватанпарварликдан, халқчилликдан, шижоат ва жасоратдан далолатдир. Тўғри-да. Президентимизнинг кўплаб қарор ва фармонларида ҳам ўз ифодасини топаётган масалалар аслида халқимизнинг қалбида сақлаб юрган орзулари эмасмиди?! Халқимиз ҳаётида муҳим из қолдирган Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш кечагина ўз йўлбошчисини йўқотган халқнинг кўнглига таскин берган бўлса, атоқли давлат арбоби ва адиб Шароф Рашидов таваллудининг 100 йиллигини нишонлаш тўғрисидаги саъй-ҳаракатлар ўзбек халқи ўз фидойи фарзандларини ҳеч қачон унутмаслигининг яна бир исботи бўлди. Очиғини айтиш керак, инсон кексайган сайин иззатталаб, меҳрталаб бўлиб қолади. Мана шундай кекса инсонларни қадрлаш, йўқлаш, уларнинг ҳолидан хабар олиб туришга, кечаги меҳнаткаш – бугунги нуроний-фахрийлар ҳурматини жойига қўйишга қаратилган чора-тадбирлар, “Меҳнат фахрийси”, “Маҳалла ифтихори” каби кўкрак нишонларини таъсис этиш ҳақидаги фармонлар кўпчиликнинг дилини яйратди. Бир пайтлар Ватан учун, халқ учун фидокорона меҳнат қилиб, кеча ёрдамга муҳтожлиги ҳақида кимга мурожаат қилишини билмай ўтирган уруш қатнашчилари, меҳнат фахрийлари иззат-икром топа бошлади. Шунингдек, иқтисодиётнинг тамал тошини қўядиган илм аҳли – академиклар, профессор-ўқитувчиларга алоҳида эътибор қаратилмоқда, улар эъзозланмоқда, заҳматли меҳнатлари муносиб қадрланмоқда. Ҳеч ким эътибордан, меҳрдан четда қолган эмас. Шу жумладан, ёшлар учун ҳам кенг ва тенг шароитлар яратилгани, кўпчилик ёшларни сарсон-саргардон қилиб қўйган нострификация муаммолари ўз ечимини топгани, олий таълим муассасалари сони сезиларли даражада ошгани, ўнлаб нуфузли хорижий таълим муассасалари бизнинг ёшлар учун эшигини мамлакатимизга келиб очгани, бир неча олий таълим муассасалари марказдан ҳудудларга, туман ва шаҳарларга кўчгани эътибор эмасми?! Тиббий соҳадаги ғамхўрликларни қаранг: тез тиббий ёрдам сифати, патронаж хизматлар, энг замонавий диагностика марказлари, хорижлик тажрибали мутахассисларнинг мамлакатимиз аҳолиси ичига кириб кўрсатаётган ёрдамлари, Тошкентдаги тажрибали мутахассисларнинг қишлоқ жойларига бориб, оддий одамларга кўрсатаётган малакали тиббий хизматлари... Ҳа, ана шундай тезкор шароитлар ва шиддатли юксалишлар билан ҳамоҳанг истиқлолимиз ҳам ҳар йили бир ёшга улғаймоқда. Бу улғайиш тинч-тотув ҳаётимиз, фаровон турмушимиз, буюк келажагимиз, истиқлол шарофати билан турмуш тарзимизга, хонадонларимизга кириб келаётган рўшноликлар, тўкин ризқ-насиба, дунёқарашимизда юз бераётган ўзгаришлар билан боғлиқ. Бу улғайишда, энг аввало, қадди бастимизнинг, ғурур ва шаънимизнинг тикланганини кўрамиз, миллатнинг эркка эришуви нақадар тотли, нақадар тароватли туйғу эканини ҳис этамиз, жаҳон ҳамжамияти сафларида ўзимизнинг муносиб ўрнимизни эгаллаганимиздан ҳақли равишда ифтихор қиламиз. Барчамиз миллий тараққиёт манфаатларини бутун вужудимиз, онг-шууримиз билан ҳимоя қилишга, ёмон кўзлардан, ғаразли ниятлардан асраб-авайлашга даъват этилганмиз. Бу даъват қалбимизда, имон-эътиқодимизда акс-садо беради, шу азиз Ватанга, шу мусаффо осмонга, киндик қонимиз тўкилган муқаддас тупроққа дахлдорлигимиздан қувват оламиз. Келажакка ишончимиз янада ортади. Кейинги йилларда мамлакатимизда юз бераётган оламшумул ўзгаришларни жаҳон ҳамжамияти, мутахассис-экспертлар жиддий кузатиб турибди. Йиллар ўтиб бормоқда, ортимиздан муносиб ўринбосарлар келмоқда. Бугун олий ўқув юртларига, Президент мактабларига имтиҳон топшираётган ёшларни кўриб, дилинг яйрайди. Мамлакатимизда “ижод” мактаблари, “Темурбеклар” мактаблари, Бухорода халқаро математика мактабининг ташкил этилгани ўзбек фарзандлари учун ҳам оламшумул қулайлик. Мустақил фикрига, қатъий ҳаётий позицияга эга бўлган, замонавий билимларни чуқур эгаллашга азму қарор қилган ёшларимизни тўғри йўлдан чалғитиб бўлмайди. Халқаро фан олимпиадаларида фарзандларимиз қўлга киритаётган шода-шода медаллар Истиқлол бизга мана шундай буюк маънавий бойликни ато этганидан далолат беради. Бу бойлик эрта индин янги-янги Навоий, Бухорий, Термизий, Ибн Сино, Хоразмий, Ҳабиб Абдуллаев, Эркин Воҳидов, Абдулла Орипов, Озод Шарафиддинов бўлиб майдонга чиқади. Бутун мамлакат катта қурилиш, бунёдкорлик майдонига айланди. Жаҳон давлатлари тарихида камдан-кам учрайдиган ҳодиса – ёш оилаларни, ногирон ва боқувчисиз қолганларни уй-жой билан таъминлаш сиёсати кўпчиликнинг ҳайратига сабаб бўлмоқда. Банклар ёш тадбиркорларни қўллаб-қувватламоқда. Бўш ётган иморатлар, фойдаланилмаётган ерлар ўз эгаларини топаётир. Чин дилдан қилинган меҳнат ҳисобига келган даромад одамларнинг турмуш тарзини ижобий маънода ўзгартирмоқда. Хорижий кузатувчилар Президент Шавкат Мирзиёевнинг янги сиёсати нафақат Ўзбекистонга, балки бутун Марказий Осиёга яхши маънода таъсир кўрсатаётганини таъкидламоқда. Чиндан ҳам, одамлар ўз меҳнатлари самараларидан баҳраманд бўлиш имкониятига эга бўлди. Жамият аъзоларининг, айниқса, ёшлар, хотин-қизларнинг ҳуқуқий онги ва маданияти ўсди. Ёшларда жамият ҳаётида фаол иштирок этиш, ижтимоий фаоллик, мамлакат, миллат тақдири учун кураш туйғуси, ватанпарварлик ҳисси кучайди. Яқиндагина миллий тараққиётга эришишнинг самарали йўлларини ахтараётган, жамият ҳаётини, иқтисодиётни, ҳуқуқ-тартибот тизимини, маданий-маърифий, таълим-тарбия соҳаларини янгилаётган мамлакатнинг қисқа муддат ичида жаҳон ҳамжамиятининг муносиб аъзосига айланишини, тараққий топган дунё давлатлари билан бўйлашишини, онгу шууримизда, турмуш тарзимизда шу қадар катта ўзгаришлар юз беришини, мамлакатнинг бугунги гўзал қиёфасини, ўғил-қизларимизнинг жаҳон майдонларида эришаётган оламшумул ғалабаларини ҳаммамиз ҳам тўла тасаввур қила олмаганмиз. Орзу-умидларимизнинг рўёбга чиқиши учун жуда кўп йиллар зарур бўлади, деб ўйлаганмиз. Не бахтки, бугун бу улуғ ғалабаларнинг барчасига гувоҳ бўлиб турибмиз, янгиланиш жараёнларида фаол иштирок этмоқдамиз. Мазмун-моҳияти ва амалий натижаларига кўра йиллар-йилларга уланиб бормоқда. Қатрада қуёш акс этади, деганларидек, кейинги икки ярим йил ичида ҳаётимизда юз берган улкан ўзгаришлар Ўзбекистонда янада баланд чўққиларни эгаллаш учун зарур бўлган илмий-техникавий, ижтимоий-сиёсий, маданий-маърифий потенциаллар мавжуд эканидан далолат беради. Бу шиддат асло сўнмайди. Шу заминда туғилиб ўсган, шу ватанни ватан деб, шу юртни юртим деб яшаётган юртдошларимизнинг бир қисми неча йиллар қалбида оғир бир дард билан яшади. Бу дард “фуқаросизлик” дарди эди. Давлатимиз раҳбари уларнинг ҳам қалбига йўл, дардига малҳам топди. Бугунги кунда Ўзбекистондек жаннатмонанд юртнинг фуқароси деган шарафли номга муяссар бўлиш дарди билан эзилиб ётган юракларни дард эмас, муҳаббат, Ватанга муҳаббат, унинг адолатпарвар раҳбарига бўлган муҳаббат эгаллади. Президентимиз ташаббуси билан олға сурилган муҳим ижтимоий-маънавий ташаббуслар, “Обод қишлоқ”, “Обод маҳалла”, “Ҳар бир оила – тадбиркор” дастурлари, мамлакатда энг яхши инвестицион муҳитни яратиш, туризм саноатини ривожлантириш, тадбиркорлик ҳаракатининг янада кенг қулоч ёйиши учун имкониятлар яратиш, бу билан жамиятда шаклланаётган янги мулкдорлар синфини мустаҳкамлаш, ҳар бир кишининг ўз истеъдодини тўла намоён этишига эришиш ҳаётимизни янада шукуҳли қилиши муқаррар. Бунга жиддий асослар мавжуд. Бугун мамлакатимизни 2035 йилгача ривожлантиришнинг стратегик режаси ишлаб чиқилмоқда. Очиғини айтсам, давлатимиз раҳбарининг ғайрат-шижоатига қараб, буюк бобомиз Алишер Навоийнинг мисралари ёдимга келаверади: Одами эрсанг демагил одамий, Ониким, йўқ халқ ғамидин ғами. Халқнинг ғамини еб, ташвишларини енгиллаштириш учун давлатимиз раҳбари “Биз катта марра олдик. Халқимиз олдида улкан масъулият бу. Одамлар катта ишонч билдиряпти. Буни оқлаш учун ҳалол-пок, садоқат билан меҳнат қилишимиз керак”, деб маҳаллама-маҳалла, уйма-уй юрибди. Бу айтишга осон. Ҳа, Президентимиз саъй-ҳаракатлари билан халқнинг қалбига йўл солди. Ва бу йўл оддий йўл эмас, меҳр ришталари билан боғланган кўнгил йўлидир. Кўнгил обод бўлса, юрт ҳам обод бўлади. Абдукамол РАҲМОНОВ, Ўзбекистон Ёзувчилар уюшмаси аъзоси ...

Батафсил
News

Менда таклиф бор: Сифатсиз маҳсулотлар сотувига чек қўйиш зарур

Мамлакатимизда бозорларимизни сифатли маҳсулотлар билан таъминлаш юзасидан устувор ислоҳотлар амалга оширилмоқда. Айни пайтда дўконларимизда сифат жиҳатидан сертификатланган маҳсулотлар  сотувда бўлиб, бундан харидорлар ҳам мамнун. Аммо, айрим “тадбиркорлар” томонидан сифатсиз маҳсулотларни четдан олиб кириб, уларни ички истеъмол бозорларида сотиш ҳолатлари учраб турибди. Айниқса, ачинарлиси, мазкур маҳсулотлар умумтаълим мактаблари ҳамда мактабгача таълим муассасалари атрофида стол қўйиб, болани эътиборини ўзига жалб қиладиган ўрамларда ҳар хил ширинликлар, қандолат маҳсулотларини қуёш тиғида, чангдан очиқ ҳимояланмаган ҳолда сотиб ўтирганлигининг гувоҳи бўламиз.  Ёнидан ўтиб кетаётган боғча боласи ота-онага хархаша қилиб бўлса-да, хоҳлаган ширинликни олиб беришга кўндиради. Мактаб атрофидаги бундай “тадбиркорлар”нинг бозори чаққонлигини айтмасак ҳам бўлади. Шу юзасидан мен таклиф бермоқчи эдим. Жойлардаги мактабгача таълим муассасалари ҳамда умумтаълим мактаблари атрофида махсус рухсати бўлмаган озиқ-овқат, ширинликлар, қандолат маҳсулотлари сотилишини  чеклаш, уларга барҳам бериш мақсадга мувофиқ деб ўйлайман. Уй шароитида тайёрланган, қачон тайёрланганлиги номаълум сомса,  ширинликлар, салатлар сифат талабларига номувофиқлиги бир қарашдаёқ  кўзга яққол ташланади. Бу эса болажонларнинг соғлигига хавф туғдирмаслигига ким кафолат бера олади? Бундай сотувларни қонунан чеклаш имкони борми? Чунки, келажагимиз ворислари бўлган фарзандларимизнинг соғлиги ҳар недан устун. Унга бефарқ бўлмаслигимиз, лоқайдлик қилишга йўл қўймаслигимиз зарур, деб биламан. Дилфуза ЖЎРАЕВА,                                                                     “Оила” илмий амалий тадқиқот  маркази                                                                      Сурхондарё вилояти бошқармаси бошлиғи   Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP           ...

Батафсил
News

Демократия асоси нимада кўринади?

Бугун Ўзбекистон “Адолат” СДП Бухоро вилоят Кенгаши томонидан “Сайлов кодекси – демократия асоси”  мавзусида семинар ташкил этилди. Тадбир йиғилганларнинг сиёсий қарашлари ва фаоллигини, энг муҳими, кодекс тўғрисидаги тушунчаларини бойитди. Албатта, ҳар бир маърузачи ўз нутқида барчани сайловга тайёргарлик кўриш жараёнларида фаолликка чақирди. Айниқса, сайловда қонунийлик ва шаффофликни таъминлаган ҳолда юксак даражада сиёсий билимга эга бўлишимиз лозимлиги хусусида таъкидланди. Маълумки, жорий йилнинг декабрь ойида Олий Мажлис Қонунчилик палатаси ва маҳаллий Кенгаш депутатлигига сайловлар бўлиб ўтади. Бу борада эса жойларда сиёсий ўқувлар, учрашувлар, сайловолди дастур лойиҳалари муҳокамасига бағишланган тадбирлар ташкил этиб келинмоқда. Жумладан, Ўзбекистон “Адолат” СДП Бухоро вилоят Кенгаши томонидан олиб борилаётган сиёсий жараёнлардан асосий мақсад ҳам аҳолининг сиёсий фаоллигини ошириш, ҳуқуқий маданиятини шакллантириш, муаммоларининг аниқ ечимига эътибор қаратишдир.   Тадбир давомида сўзга чиққанлар сайлов кодексининг ҳар бир банди юзасидан ўз фикр ва мулоҳазаларини билдириб ўтишди. Маълумки, партия тизимида ҳисобот-сайлов конференциялари партия ташкилотлари раҳбар органлари ҳисобдорлигини таъминлаш ва сифат жиҳатидан янги таркибдаги раҳбар органларни сайлашга қаратилган. Шунингдек, партия ташкилотининг истиқболдаги устувор вазифаларини белгилаб олишда ҳисобот-сайлов конференциясининг қарори муҳим ҳисобланади.  “Сайлов кампанияси даврида партия ғояларини тарғиб қилишнинг замонавий усулари” мавзусида билдирилган фикр-мулоҳазалар оммавий ахборот воситалари ходимларининг эътиборини жалб этди. Албатта, маъруза давомида бўлажак сайлов партия ғояларини яна бир бор сайловчилар орасида кенг тарғиб қилиш, партиядан  кўрсатилган номзоднинг сайловолди дастури орқали электорат манфаатларини янада чуқурроқ ифодалаш, масъулиятни ҳис этиб, бўлғуси сайловларда муносиб иштирок этиш, берилган имкониятлардан тўлиқ ҳамда унумли фойдаланишга, сиёсий жараённинг муносиб ўтишига жиддий аҳамият қаратиш лозимлиги тўғрисида айтиб ўтилди.  Сайлов кодексининг қабул қилинганлиги ҳуқуқни қўллашда бир қатор қулайликлар яратди, бу эса сайлов жараёни ва уни ўтказиш тартиб-тамойиллари ва қоидаларини тўла қонунийлик, демократик ва шаффоф ўтказишда муҳим ҳуқуқий асос вазифасини бажаради. Семинар давомида айни шу масалалар борасида фикрлар билдирилди.   Моҳигул Абдуллаева, Ўзбекистон “Адолат” СДП Бухоро вилоят Кенгаши матбуот котиби    Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Менда таклиф бор: Саноатни деб, саломатликдан воз кечмайлик

Барчамизни қийнаётган аномал исиш, қишнинг қорсиз ўтиши глобал экологик муаммоларнинг биридир. Атмосфера ҳавосининг ифлосланиши ҳаво таркибига физик, кимёвий, биологик моддалар аралашуви ёки табиий ўзгаришларга учраши ҳисобланади. Бутунжаҳон соғлиқни сақлаш ташкилоти маълумотларига кўра, инсонлар орасида юзага келаётган онкологик касалликларнинг асосий қўзғатувчиларидан бири атмосфера ҳавосининг ифлосланишидир. Табиийки ишлаб чиқариш, саноат корхоналари, завод-фабрикалар атмосфера ҳавосининг турғун ифлослантирувчи манбалар ҳисобланади. Айнан шу ифлослантирувчи моддалар озон қатламининг емирилишига сабаб бўлади. Саноати ривожланган катта шаҳарлар ва саноат марказларининг  атмосфера ҳавосидаги чанг, тутун, қурум ва туманлар баъзи вақтларда қуёш нурларини тўсиб қўйиб ультрабинафша нурларининг ўтишига йўл бермайди. Бу эса ўз навбатида турли касалликларни, айниқса болаларда рахит касаллигини келтириб чиқаради. Ҳудудлардаги тоғ ва тоғ ён бағирларида арчазорлар, бодомзор ва ёнғоқзорлар шифобахш атмосфера ҳавосини тозалашда табиий дори воситаларидир. Ана шу бойликни асраб қолиш, кўпайтириш, саноатни ривожлантириш билан бирга унинг экологияга салбий таъсирини камайтириш масалалари олим ва тадқиқотчилар олдидаги муҳим вазифалардандир. Баходир УСМОНОВ, Ўзбекистон “Адолат” СДП Жиззах вилоят Кенгаши туманлараор ижрочи котиб Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP   ...

Батафсил
News

Фаол инвесторларга “Фахрий фуқаро” мақоми берилади

Рағбат ва эътибор ҳар бир киши ва унинг фаолияти учун зарур, албатта. Қай бир соҳани олманг, сиз фаолият юритаяпсизми, демак меҳнат қилаяпсиз. Бунинг учун рағбат бўлиши керак. Рағбат эса кишига ғайрат, шижоат, кўтаринки руҳ бағишлайди ва унинг ишида натижа, юксалиш бўлишини таъминлайди.  Ўзбекистон Республикаси Президентининг «Ўзбекистон Республикасида инвестиция муҳитини тубдан яхшилаш чора-тадбирлари тўғрисида» 2018 йил 1 августдаги Фармонини ижро этиш юзасидан Вазирлар Маҳкамасининг «Фахрий фуқаро» мақомини бериш тартиби тўғрисида қарорининг қабул қилиш замирида ана шундай рағбат ва унинг юксалиш прогнози турибди. Ушбу қарор Республикамизда инвестиция муҳитини янада яхшилаш учун қулай шароит яратишга хизмат қилиши шубҳасиз. Сабаби, қарорда «Фахрий фуқаро» мақоми чет эл фуқаролари ва фуқаролиги бўлмаган шахсларга берилиши кўзда тутилганлиги, шунингдек, уларни рағбатлантириш шакли, иқтисодиёт, фан, маданият ва санъат, таълим, соғлиқни сақлаш ва ижтимоий соҳанинг ривожланишига катта инвестиция киритганлиги, шунингдек, Ўзбекистон Республикасида хайрия (меценатлик) фаолиятини амалга ошираётганлиги учун миннатдорчилик ва ташаккур белгиси сифатида тақдим этилиши кўрсатилган. Чиндан ҳам қарор иқтисодиётимиз ривожига қўйилган яна бир муҳим қадам.   Вазирлар Маҳкамасининг 2019 йил 5 августдаги ушбу қарори мазмун-моҳиятини чуқур ўрганадиган бўлсак, хорижий инвесторлар учун катта янгилик ва имконият яратилганлигини кўриш мумкин. Хусусан, ушбу мақомни олган шахсга кўп марталик уч йиллик визани, унинг амал қилиш муддатини Ўзбекистон Республикаси ҳудудидан чиқиш заруриятсиз, шу жумладан, оила аъзолари (эр (хотини) ва вояга етмаган болалар) учун чекланмаган миқдорда узайтириш имконияти билан давлат божи тўланмасдан олиши мумкинлиги белгиланган. Бундан ташқари, вақтинча пропискани, шу жумладан, оила аъзолари (эр (хотини) ва вояга етмаган болалар) учун давлат божи тўланмасдан уч йилгача муддатда ички ишлар органларида расмийлаштириш ва узайтириш; шу жумладан, оила аъзолари (эр (хотини) ва вояга етмаган болалар) учун вақтинча прописка жойи бўйича Ўзбекистон Республикаси ҳудудида доимий прописка ва яшаш гувоҳномасини давлат божи тўланмасдан олиш каби жуда катта қулайликлар яратиб берилиши белгиланган. Ҳар қандай инвестор учун бу қарор баракали ва самарали фаолият юритиши учун айни муддао. Мамлакатимизда иқтисодиётни эркинлаштириш жараёнлари жадал суръатларда олиб борилаётгани маълум. Шу билан бирга  яратилаётган қулай инвестиция муҳити натижасида бугун юртимиз иқтисодиёти янги босқичларга кўтарилмоқда. Инвестициявий жозибадор, сармоя киритиш учун қулай ва ишончли мамлакатлар қаторида бизнинг мамлакатимиз инвесторлар эътиборида. Сўнги пайтларда инвесторларга яратилаётган имконият ва шароитлар таҳсинга лойиқ. Бунинг сафида ушбу қарор ҳам иқтисодий юксалишлар сари етаклаши шубҳасиз.  Шерзоджон КАРИМОВ, Ўзбекистон “Адолат” СДП Фарғона вилоят Кенгаши раиси Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Бухоро онлайн: Сайловолди дастурнинг таҳрирталаб бандлари санаб ўтилди

Партия Сиёсий ва Сайловолди дастурининг муҳокамасига бағишланган тадбир баҳс-мунозараларга бой бўлди.Тадбир давомида фаоллар ва иштирокчилар, электорат вакиллари томонидан қуйи бўғинда шаклланган таклифлари умумлаштирилган ҳолда билдирилди. Ўзбекистон “Адолат” СДПнинг Сайловолди дастури лойиҳасида ҳар бир соҳа ривожи ҳамда тараққиёти йўлида аниқ фикр-мулоҳазаларнинг қайд этилганлиги тилга олинди. Баъзи мавжуд муаммолар ва камчиликларнинг борлиги юзасидан ҳам тўхталиб ўтилди. Аввало, дастурнинг халққа яқин бўлиши лозимлиги ва ҳар бир фикр аниқ, содда ҳамда халқ тилида бўлиши зарурлигини таъкидлашди.  Дастур лойиҳаси билан танишгач, сўзга чиққанлар унда суд-ҳуқуқ тизимида энг муҳим вазифаларнинг қайд этилганлигини эътироф этишди. Аммо соҳани янада ривожлантириш ҳамда жамиятда ва ҳар бир инсон учун адолатни таъминлашда суд-ҳуқуқ тизимини кучайтириб бориш мақсадида никоҳдан ажратиш ишлари Хотин-қизлар қўмиатси ҳузуридаги ажратиш ишлари бўйича комиссия томонидан белгиланган тартибда кўриб чиқиш, Тергов соҳасида ягона марказлашган тизимни яратишга эътибор бериш таклифи қайд этиб ўтилди.   Жумладан, қуйидаги таклифлар кўриб чиқилди: тиббиёт тизимини яхшилаш, оилавий поликлиникаларда шароитларни янада кучайтириш, оилавий поликлиникаларда қизлар билан ишлаш тизимини йўлга қўйиш, ҚВПлардаги кадрлар салоҳиятини кучайтириш,  фуқароларни бепул тиббиёт аппаратларидан ўтказиш, туғуруқ комплексларида янги туғилган чақалоқларни овқатлантириш бўйича тиббий дарсларни ташкил этган ҳолда мутахассисларни жалб этиш ва чақалоқлар шифокорига бўлган эҳтиёжни қоплаш. Дастур муҳокамасида таълим, айниқса, мактабгача таълим тизимига бўлган эътиборни кучайтириш ҳамда мактабдан ташқари таълимни ривожлантириш масалалари ҳам ўртага ташланди. Жумладан, мактабгача таълим тизимида чет тиллари бўйича педагог кадрлар масаласига эътибор берган ҳолда штат бирлигини ажратиш зарурлиги таъкидланди. Тадбир давомида хотин-қизлар масаласи ҳам алоҳида тилга олинди. Айниқса, оилаларда учрайдиган зўравонликларнинг олдини олиш билан боғлиқ аниқ фикр ва мулоҳазаларнинг мавжуд эмаслиги тилга олиниб, бу борада партиядошлар томонидан таклифлар ўртага ташланди. Хусусан, аёллар ҳамда фарзандларга нисбатан оилаларда куч ишлатиш каби салбий ҳолатларга чек қўйилишини қонунийлаштириш зарурлиги таъкидланди. Никоҳ қурувчилар орасида тузиладиган никоҳ шартномасига бўлган эътиборни ошириш, бу борада ёшларнинг билими ва тасаввурини бойитиш масалалари ҳам ўртага ташланди. Албатта, муҳокамалар жараёнида тадбиркорликни ривожлантириш масаласи ҳам эътибордан четда қолмади. Хусусан, иштирокчилар дастурда жойларда бизнес мактабларини ташкил этган ҳолда иқтидорли ёшларни жалб этиш ва фаолиятини қўллаб-қувватлаган ҳолда уларга тақдим этиладиган имтиёзларни кучайтириш борасида ҳам таклифлар билдирилди. Партия айни шу муаммонинг ечимини топишда кўмакдош бўлиши зарурлиги айтиб ўтилди. Баҳс-мунозара, тортишув ва амалий таклифларга бой бўлган учрашувда билдирилган барча фикр-мулоҳазалар қўллаб-қувватланди, сайловолди дастурда эътиборга олиниши таъкидланди.  Шунингдек, жойларда бўлиб ўтаёган учрашувларда партиянинг мамлакат келажагига даҳлдор бўлган Сиёсий ва Сайловолди дастурини янада такомиллаштирилиши, содда, тушунарли, халқона тарзда шакллантириш учун танқидий муҳокамадан ўтказиш чора-тадбирлари давом этилаётганлиги қайд этилди. Моҳигул АБДУЛЛАЕВА, Ўзбекистон “Адолат” СДП Бухоро вилоят Кенгаши матбуот котиби   Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Менда таклиф бор: Шикоятчининг чўнтагига қаралмаса қанийди...

Ҳуқуқ-тартибот органларининг жамиятимизда тутган ўрни муҳим ҳисобланади. Шу жиҳатдан қаралганда уларнинг халқ орасида қанчалар холис ва беминнат фаолият юритиши долзарб ҳисобланса, бир томондан таъмагирлик ҳолатларининг учраб туриши кўнгилни хира қилади. Албатта, коррупция жамиятнинг турфа қатламлари орасида учраши мумкин. Аммо шу иллатга қарши курашадиган ҳуқуқ-тартибот органларининг бу ишга ўзи бош қўшиб турса-я! Шу боис бундай масъул ишда ўтирадиган ходимлар фаолияти қатъий назоратга олиниши зарур. Орган остонасига муаммолари юзасидан арз қилиб келган фуқаронинг чўнтагига қараб иш қиладиганлар ҳам топилади. Айниқса, органнинг қуйи тизимида бу каби ҳолатларга кўп бора дуч келганмиз. Жабрдийда киши ўз дардини айтиб шикоят қилса, муаммосини ҳал этишга кўмаклашиш ўрнига устидан кулиб ёлғончига чиқарганларни ҳам эътибордан қочирмаслик даркор. Албатта, беш бармоқ баравар эмас. Лекин юқоридаги ҳолатлар орамизда борлиги айни ҳақиқат. Биз бунга ҳозир кўз юмсак, кейин кеч бўлади. Уларнинг фаолияти давлат томонидан алоҳида қатьий назоратга олиниши зарур, деб ҳисоблайман. Ёқубжон МИРТОЖИЕВ, Гулистон туман Кенгаши раиси   Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP     ...

Батафсил
News

Мамлакатни ислоҳ қилиш ва ривожлантириш бўйича биринчи ярим йилликдаги натижалар ва истиқболдаги устувор вазифалар муҳокама қилинди

Ўзбекистон Республикаси Президенти Шавкат Мирзиёев раислигида 14 август куни мамлакатимизни ижтимоий-иқтисодий ривожлантириш бўйича 2019 йилнинг биринчи ярмида амалга оширилган ишларни муҳокама қилиш ҳамда 9 ой ва йил якуни бўйича белгиланган прогноз параметрларига эришишни таъминлайдиган устувор вазифаларга бағишланган кенгайтирилган йиғилиш ўтказилди.  Унда Ўзбекистон Республикаси Олий Мажлиси палаталари раҳбарлари, Бош вазир ва унинг ўринбосарлари, Қорақалпоғистон Республикаси Жўқорғи Кенгеси Раиси, Тошкент шаҳри ва вилоятлар ҳокимлари, вазирликлар, идоралар, хўжалик бирлашмалари ва тижорат банклари раҳбарлари иштирок этди. Йиғилишда макроиқтисодий барқарорликни таъминлаш, ёқилғи-энергетика, қайта ишлаш саноати ва агросаноат тармоқларини модернизация қилиш, ҳудудларни комплекс ривожлантириш, тадбиркорликни қўллаб-қувватлаш, ижтимоий соҳаларни яхшилаш, аҳоли фаровонлигини ошириш бўйича кўрилаётган чора-тадбирлар натижалари чуқур таҳлил қилинди. Бундан буён Вазирлар Маҳкамаси комплекслари раҳбарлари, вазирлар, қўмиталар ва хўжалик бирлашмалари раислари ўзларининг иш услубини тубдан ўзгартириб, кўпроқ ҳудудларга, олис қишлоқларга бориб, пастдаги муаммоларни аниқлаш ва ҳал этишда ҳокимликлар, тадбиркорлар ва жойлардаги раҳбарларга амалий ёрдам бериши зарурлиги таъкидланди.  Бунда, ҳар бир комплекс раҳбари ўзининг вазирлари билан бирга ҳар чоракда вилоятларга бориб, тегишли соҳалардаги мавжуд муаммоларни ҳал этиши ва натижалари бўйича вилоят халқ депутатлари кенгаши ва фаоллари олдида ҳисобот бериши керак. Худди шундай, вилоятлар ҳокимлари ҳам ўз ўринбосарлари ва вилоят бошқармалари раҳбарлари билан бирга ҳар чоракда туманларга бориб, муаммоларни ҳал қилиб, туман халқ депутатлари кенгаши ва фаоллар олдида ҳисобот беради. Олий Мажлис палаталари ва Вазирлар Маҳкамасига раҳбар ва ҳокимларнинг пастга тушиб ишлаши ва ҳисобот бериши бўйича янги тизимни амалда жорий қилиш масъулияти юкланди. Йиғилишда макроиқтисодиёт, таркибий ўзгартиришлар, молия-банк тизими ва хусусий тадбиркорлик масалаларимуҳокама қилинди. Жорий йилнинг биринчи ярмида мамлакат ялпи ички маҳсулоти 5,8 фоиз, саноат маҳсулотлари ишлаб чиқариш ҳажми 6,9 фоиз ўсгани қайд этилди. Маҳаллий бюджетлар ихтиёрида 2,6 триллион сўмдан зиёд ёки ўтган йилнинг мос даврига нисбатан 1,5 баробар кўп маблағ қолдирилди. Бюджет даромадлари қарийб 51 триллион сўмни ёки прогнозга нисбатан 109 фоизни ташкил этди. Йиғилишда давлат бюджетининг даромадлари ва харажатлари мутаносиб бўлишини таъминлаш, маҳаллий бюджетларга қўшимча тушумлар резервларини топиш ва сафарбар қилиш бўйича кўрсатмалар берилди.   Банк тизимини тубдан ислоҳ қилиш, замонавий банк хизматларини жорий этиш ва уларнинг сифатини ошириш зарурлиги таъкидланди.  Давлатимиз раҳбари нархларнинг кескин ошиб кетишининг олдини олиш масаласига алоҳида эътибор қаратди.  Дастлабки 6 ойда инфляция 5,6 фоизни ташкил қилиб, прогноз кўрсаткичларидан ошмаган. Лекин тарифлар ва нархлар босқичма-босқич бозор механизмларига ўтаётгани боис мутасаддиларга инфляция ўсишининг олдини олиш бўйича зарур чоралар кўриш топширилди.  Маълумки, август ойи бошида ўтказилган йиғилишда кичик бизнес ва хусусий тадбиркорликни ривожлантириш масаласи атрофлича муҳокама қилиниб, бу борада янги тизим жорий этиш белгиланган эди. Иқтисодиёт ва саноат вазирлиги ҳузурида Кичик бизнес ва тадбиркорликни ривожлантириш агентлиги ташкил этилиб, унга Тадбиркорликни қўллаб-қувватлаш жамғармаси, тижорат банклари ва суғурта компаниялари бириктирилди. Йиғилишда ушбу янги тизимни жойларда жорий этиш орқали кенг аҳолини тадбиркорликка жалб қилиш, уларнинг бандлиги ва даромадини ошириш зарурлиги таъкидланди.  Саноатнинг иқтисодиётдаги ўрнини ошириш масаласига ҳам тўхталиб ўтилди.  – Охирги бир йилда ялпи ички маҳсулот таркибида саноат улуши 26 фоиздан 30 фоизга етган бўлса-да, бу биз бошлаган ислоҳотлар кўламига нисбатан ҳали етарли эмас, – деди Шавкат Мирзиёев.   Жорий йил охирига қадар Навоий кон-металлургия комбинатида 25 та, “Ўзэлтехсаноат”да 18 та, “Ўзавтосаноат”да 7 та, Олмалиқ кон-металлургия комбинатида 5 та инвестиция лойиҳаси бўйича янги қувватлар ишга туширилишини жадаллаштириш бўйича тавсиялар берилди.   Қарийб 100 хил турдаги кундалик истеъмол товарларини саноат кооперацияси орқали ишлаб чиқаришни йўлга қўйиш, корхоналар билан манзилли ишлаб, уларнинг қувватини оширишга кўмаклашиш зарурлиги таъкидланди.  Мамлакатимизда Фаол инвестициялар ва ижтимоий ривожланиш йили деб эълон қилинган жорий йилда сармоялар, аввало, тўғридан-тўғри хорижий инвестициялар жалб этиш ва ўзлаштириш бўйича кенг кўламли ишлар амалга оширилмоқда.  Биринчи ярим йилликда қарийб 86 триллион сўм, яъни ўтган йилнинг мос даврига нисбатан 1,6 баробар кўп инвестициялар ўзлаштирилгани бунга яққол мисолдир. Шунингдек, тўғридан-тўғри хорижий инвестициялар ўзлаштирилиши 2,7 баробар, халқаро молия институтлари маблағлари жалб этилиши 3,7 баробар ўсган. Алоҳида таъкидлаш жоизки, мамлакатимиз тарихида биринчи марта инвестициянинг ялпи ички маҳсулотдаги улуши 38 фоиздан ошди. Олдинги йилларда бу кўрсаткич 25 фоизга ҳам етмасди. 12 август куни ўтказилган видеоселекторда инвестициялар ва экспорт ҳажмини кўпайтириш юзасидан белгилаб берилган вазифаларни ўз муддатида ва сифатли бажарилишини таъминлаш кераклиги яна бир бор қайд этилди.  Ёқилғи-энергетика соҳаси ва саноатнинг базавий тармоқларини ривожлантириш бўйича тизимли ислоҳотлар амалга оширилмоқда. Ушбу тармоқда ягона давлат сиёсатини олиб борувчи Энергетика вазирлиги ташкил қилинди. Йиғилишда бу соҳани изчил ривожлантириш, тобора ўсиб бораётган ички эҳтиёжни қондириш учун хомашё базасини мунтазам кенгайтириб бориш кераклиги қайд этилди.  Электр энергияси ишлаб чиқариш ва етказиб беришда йўқотишларни камайтириш, энергия ресурслари учун ҳисоб-китоблар тизимини тартибга солиш, дебитор қарздорликни қисқартириш бўйича аниқ топшириқлар берилди.   Кимё саноатида янги маҳсулотлар ишлаб чиқарадиган 4 та корхонани йил якунигача фойдаланишга топшириш, 31 та инвестиция лойиҳаси бўйича ишларни тезлаштириш муҳимлиги таъкидланди.  Автомобилсозлик, қишлоқ хўжалиги машинасозлиги, электротехника саноатини янада ривожлантириш, бутловчи қисмлар ишлаб чиқаришни маҳаллийлаштириб, маҳсулотлар таннархини пасайтириш, ишлаб чиқариш ва экспорт ҳажмини ошириш бўйича қўшимча вазифалар белгилиб берилди.  Шундан сўнг ҳудудларни комплекс ривожлантириш ва коммуникациялар инфратузилмасини яхшилаш масалалари кўриб чиқилди.   Ҳисобот даврида уй-жойлар, йўл-логистика ва ижтимоий инфратузилма объектлари қуриш бўйича кўплаб ишлар амалга оширилди. Хусусан, “Обод қишлоқ” дастури доирасида 159 тумандаги 478 та қишлоқ янгича қиёфа касб этди, уларга ичимлик суви, газ ва электр тармоқлари тортилди. Шунингдек, 3,6 минг километр автомобиль йўлларида қурилиш-таъмирлаш ишлари бажарилди. Бу борадаги ишларни давом эттириб, аҳолининг уй-жойга бўлган эҳтиёжини қондириш, ижтимоий шароитларни яхшилаш масалаларига яна бир бор эътибор қаратилди.  Йил якунига қадар 10 мингта уй-жой ва 111 та кўп қаватли уйларни қуриб битказиш, 1 минг 200 километр ичимлик ва оқова сув тармоқларини қуриш ва реконструкция қилиш, уларнинг сифати ва нархларини алоҳида назоратга олиш зарурлиги таъкидланди.  Транспортда йўловчи ва юк ташиш сифатини ошириш масаласи муҳокама қилинар экан, мутасаддиларга 10 минг километрлик республика ва маҳаллий йўлларни қуриш ва таъмирлаш, халқаро юк ташишларга ихтисослашган транспорт-логистика қўшма корхоналарини тузиш, Бухоро, Қарши, Нукус ва Термиз халқаро аэропортларини “очиқ осмон” режимига ўтказиш, “Навоий қуруқлик порти”ни ташкил этиш бўйича топшириқлар берилди.  Қурилиш материаллари ишлаб чиқариш ҳажмини ошириш, шаҳарсозлик нормалари ва лойиҳалаштириш жараёнларини такомиллаштириш, атроф-муҳитни муҳофаза қилиш юзасидан ҳам вазифалар белгиланди.  Йиғилишда аграр ва озиқ-овқат соҳаларини ривожлантириш борасидаги натижалар ҳам таҳлил қилинди.  Кейинги уч йилда бу соҳани барқарор ривожлантириш, маҳсулотлар ишлаб чиқаришни кўпайтириш бўйича кўплаб қарорлар ва дастурлар қабул қилинди. Фермерлар манфаатдорлиги ва даромадларини оширишга қаратилган иқтисодий механизмлар жорий этилди. Бугунги кунда истеъмол маҳсулотларининг 70 фоизи иқтисодиётнинг ушбу тармоғида яратилмоқда. 180 турдан зиёд қишлоқ хўжалиги маҳсулотлари 80 та мамлакатга экспорт қилиниб, жами экспорт тушаётган даромаднинг 20-25 фоизини таъминламоқда. Иқтисодий фаол аҳолининг 27 фоизи ушбу соҳада банд. Ҳозиргача 94 туманда 76 та пахта-тўқимачилик кластери ташкил этилган. Бу йилги ғалла ҳосили 7 миллион тоннадан ортди. 15 минг гектар интенсив боғлар ва 11 минг гектар токзорлар барпо этилди.  Йиғилишда бу борадаги ишларни изчил давом эттириш, куз ойларида қўшимча сабзавотлар экиш, туманларнинг табиий иқлим шароитидан келиб чиқиб, ҳосилдорликни ошириш чора-тадбирлари ҳам белгиланди. Маҳсулотларни йиғиш, сақлаш, қайта ишлаш, қадоқлаш ва экспорт қилиш бўйича инфратузилмани ривожлантириш масаласи кўрилар экан, жорий йил охиригача қуввати 150 минг тонна бўлган 12 та логистика маркази ва сиғими 143 минг тонна бўлган 224 та музлаткичли омборхонани ишга тушириш зарурлиги қайд этилди.  Ғаллачилик кластерлари, чорвачилик, парранданчилик ва балиқчилик комплекслари ташкил этиш, сувни тежовчи технологияларни кенг жорий қилиш бўйича ҳам аниқ чора-тадбирлар белгиланди. Ижтимоий соҳаларни ривожлантириш масалаларига ҳам тўхталиб ўтилди.   Мамлакатимизда таълим, соғлиқни сақлаш, туризм, спорт ва илм-фан соҳалари, хотин-қизлар ва ёшлар масалаларига алоҳида аҳамият қаратилмоқда.  Жумладан, халқ таълими, соғлиқни сақлаш соҳаларини узоқ муддатли ривожлантириш бўйича концепциялар қабул қилинди. Ижтимоий соҳа ходимларининг иш ҳақи ўртача 1,5-2 баробарга оширилди.  Ўтган даврда 14 та янги олий таълим муассасаси, жумладан 6 та маҳаллий ва 8 та хорижий олий таълим муассасаси филиали фаолияти йўлга қўйилиб, 40 та янги таълим йўналиши ҳамда 41 та янги мутахассислик ташкил этилди. Қабул квоталари ўтган йилга нисбатан 20 фоизга кўпайтирилди. Туризм соҳасини жадал ривожлантириш бўйича кўрилган чоралар натижасида 6 ойда юртимизга 3 миллион нафардан ортиқ хорижий турист ташриф буюрди. Бу – ўтган йилга нисбатан 30 фоизга кўпдир.  Шунингдек, ўтган йилнинг шу даврига нисбатан 28 фоиз кўп туризм хизматлари экспорт қилинди. Хотин-қизлар тадбиркорлигини ривожлантириш мақсадида 100 миллиард сўм ажратилди. Жорий йилнинг 6 ойи давомида ушбу маблағларнинг 41 фоизи ўзлаштирилиб, хотин-қизлар томонидан 1 минг 755 та лойиҳа амалга оширилди ва 2 минг 240 та иш ўрни яратилди.  Йиғилишда ижтимоий соҳаларни янада ривожлантириш, хизматлар қамрови ва сифатини ошириш бўйича қўшимча вазифалар белгилаб берилди.  – Барча давлат идоралари ва корхоналарида тизимли ишлаш, қатъий тартиб-интизом, қабул қилинган қарорларни сўзсиз бажариш, тадбиркорларни ҳар томонлама қўллаб-қувватлаш ва амалий ёрдам бериш ислоҳотларимизнинг натижадорлигини таъминлашда асосий омил бўлиши зарур ва шарт, – деди Президент. Муҳокама қилинган масалалар бўйича Бош вазир ва унинг ўринбосарлари, вазирлик ва идоралар, хўжалик бирлашмалари, ҳудудлар раҳбарлари амалга оширилган ишлар самарадорлиги, 9 ой ва йил якуни бўйича кутилаётган натижалар, бу борадаги устувор вазифаларни бажариш юзасидан ҳисобот берди. Йиғилиш якунлари бўйича тегишли чора-тадбирлар белгиланди.  Манба: Ўзбекистон Республикаси Президенти Матбуот хизмати ...

Батафсил
News

Ўзбекистон Республикаси Иқтисодиёт ва саноат вазирлиги ҳузурида кичик бизнес ва тадбиркорликни ривожлантириш агентлиги фаолиятини ташкил этиш тўғрисида Ўзбекистон Республикаси Президентининг қарори

Ўзбекистон Республикаси Президентининг 2019 йил 13 августдаги “Хусусий мулкни ҳимоя қилиш ва мулкдорлар ҳуқуқларининг кафолатларини кучайтириш, тадбиркорлик ташаббусларини қўллаб-қувватлаш борасидаги ишларни ташкил қилиш тизимини тубдан такомиллаштириш бўйича қўшимча чора-тадбирлар, шунингдек, тадбиркорлик субъектларининг молиявий ресурслар ва ишлаб чиқариш инфратузилмасидан фойдаланиш имкониятларини кенгайтириш тўғрисида”ги ПФ–5780-сон Фармонига мувофиқ: 1. Ўзбекистон Республикаси Иқтисодиёт ва саноат вазирлиги марказий аппарати тузилмасига иқтисодиёт ва саноат вазирининг ҳудудларни, шу жумладан, Сирдарё вилоятини комплекс ривожлантириш масалалари бўйича ўринбосари лавозимини қиcқартириш ҳисобига Ўзбекистон Республикаси иқтисодиёт ва саноат вазирининг ўринбосари – Иқтисодиёт ва саноат вазирлиги ҳузуридаги Кичик бизнес ва тадбиркорликни ривожлантириш агентлиги директори лавозими киритилсин. 2. Ўзбекистон Республикаси Иқтисодиёт ва саноат вазирлиги ҳузуридаги Кичик бизнес ва тадбиркорликни ривожлантириш агентлиги бошқарув ходимларининг чекланган умумий сони 28 нафардан иборат бўлган (кейинги ўринларда – Агентлик) тузилмаси 1-иловага мувофиқ тасдиқлансин. 3. Белгилаб қўйилсинки: Агентлик директори икки нафар ўринбосарга, шу жумладан, Ўзбекистон Республикаси Вазирлар Маҳкамаси томонидан белгиланган тартибда лавозимга тайинланадиган ва лавозимдан озод этиладиган биринчи ўринбосарга эга; Агентлик директорининг ўринбосари бир вақтнинг ўзида Тадбиркорлик фаолиятини қўллаб-қувватлаш давлат жамғармасининг ижрочи директори ҳисобланади (кейинги ўринларда – Жамғарма); Агентлик фаолиятини молиялаштириш манбалари Ўзбекистон Республикаси Давлат бюджети маблағлари ва қонун ҳужжатларида тақиқланмаган бошқа манбалар ҳисобланади; Агентлик кичик бизнес ва тадбиркорликни ривожлантириш соҳасидаги лойиҳаларни амалга ошириш учун халқаро молия институтлари ва хорижий ҳукумат молиявий ташкилотлари маблағларини жалб қилиши мумкин; Қорақалпоғистон Республикаси Иқтисодиёт ва саноат вазирлиги, вилоятлар ва Тошкент шаҳар иқтисодиёт ва саноат бош бошқармалари тузилмаларида Иқтисодиёт ва саноат вазирлигининг ўрнатилган умумий бошқарув ходимларининг чекланган сони доирасида Савдо-саноат палатасининг ҳудудий бошқармалари, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил аппаратининг ҳудудларда фаолият юритаётган ходимлари билан ўзаро яқин ҳамкорликда ишлайдиган, бошқарув ходимларининг штат бирлиги 49 нафардан иборат кичик бизнес ва тадбиркорликни ривожлантириш бўлимлари ташкил этилади. 4. Агентлик: Ўзбекистон Республикаси Молия вазирлиги, Марказий банки ва Савдо-саноат палатаси билан биргаликда номолиявий ёрдам турларини ҳамма соҳаларда кенгайтириш, шу жумладан, бизнес юритиш асослари ва соҳадаги қонун ҳужжатлари, тадбиркорлик фаолиятининг хавф-хатарларини баҳолаш кўникмаларини ўргатиш орқали тадбиркорларнинг кичик бизнес ва тадбиркорликни ривожлантириш дастурларида мувофиқлашган тарзда иштирок этишини, уларнинг малакасини ошириш, стажировкалар ва бошқалар ташкил этилишини таъминласин; тижорат банклари билан биргаликда икки ой муддатда фойдаланиладиган ускуналарнинг техник хусусиятлари, ўзини қоплаш муддати, маҳаллий хом ашё билан таъминланиши, сарфланадиган материаллар ҳисоб-китоби ва бозорлар, шу жумладан, хорижий бозорлар баҳосини ўз ичига олган электрон каталогини шакллантирсин, кейинчалик салоҳиятли лойиҳалар ва бизнес ташаббусларини танлаб олиш жараёни самарадорлиги ва сифатини ошириш мақсадида улар Агентлик ва тижорат банкларининг веб-сайтларига жойлаштирилсин. 5. Жамғармани бошқариш кенгашининг Жамғарма Ижро этувчи дирекциясига ўз маблағлари ҳисобидан молиялаштириладиган 7 нафар бошқарув ходими штат бирлигини қўшимча ажратиш тўғрисидаги таклифига розилик берилсин. Жамғарманинг ижро этувчи директорига Жамғарманинг ўз маблағлари ҳисобидан уларнинг хизматларига ҳақ тўлаган ҳолда малакали хорижий мутахассисларни жалб қилиш ҳуқуқи берилсин. 6. Кичик бизнес ва тадбиркорлик субъектлари, шунингдек, аҳолининг ижтимоий ҳимояга муҳтож қатламларининг Жамғарма маблағлари ҳисобидан молиявий ёрдам олиш ҳақидаги аризаларини кўриб чиқиш бўйича электрон ҳужжат айланиш схемалари 2 ва 3-иловаларга мувофиқ маъқуллансин. 7. Ўзбекистон Республикаси Бандлик ва меҳнат муносабатлари вазирлиги, Савдо-саноат палатаси, “Маҳалла” хайрия жамоат фонди Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Агентлик билан биргаликда бир ой муддатда Жамғарма ҳисобидан лойиҳалари бўйича молиявий ёрдам кўрсатиладиган аҳолининг ижтимоий ҳимояга муҳтож қатлами тоифаларининг рўйхатини тасдиқласин. 8. Ўзбекистон Республикаси Президенти ҳузуридаги Давлат бошқаруви академияси тизимли равишда кичик бизнес ва тадбиркорликни, аҳолининг ижтимоий ҳимояга муҳтож қатламларини қўллаб-қувватлаш ва рағбатлантириш соҳасида иқтисодиёт ва тадбиркорликни ривожлантириш масалалари бўйича туманлар ва шаҳарлар ҳокимларининг биринчи ўринбосарлари, бандлик ва меҳнат муносабатлари, иқтисодиёт ва саноат, Савдо-саноат палатаси, тижорат банкларининг туман бўлимлари раҳбарларининг билим ва кўникмаларини ошириш мақсадида ўқув курсларини, шу жумладан, масофадан туриб ўқитиш шаклидаги курсларни ташкил этсин. 9. Жамғарма қуйидагиларни назарда тутувчи “Тадбиркор” ахборот тизимини яратиш ва ишга туширишда буюртмачи сифатида белгилансин: тижорат банклари ва Жамғарма ўртасида электрон ҳужжат айланиши, шу жумладан, электрон рақамли имзо ёрдамида маълумот алмашиш; яратиладиган автоматлаштирилган дастурий таъминотни Ўзбекистон Республикаси Давлат солиқ қўмитаси, Давлат статистика қўмитаси, Адлия вазирлиги ҳузуридаги Давлат хизматлари агентлиги ва Ўзбекистон банклари ассоциациясининг ахборот тизимлари билан интеграциялаш; тижорат банкларининг кредитлари бўйича электрон рақамли имзодан фойдаланган ҳолда ишончнома ва кафолатлар, шунингдек фоиз харажатларини қоплаш учун компенсация бериш тўғрисида электрон шартномалар тузиш; тижорат банклари ва уларнинг мижозларига Жамғарманинг расмий веб-сайти орқали реал вақт режимида кредит буюртмаларини кўриб чиқиш ва уларнинг ижросини назорат қилиш имкониятини бериш. 10. Жамғарма: бир ой муддатда Ўзбекистон Республикаси Ахборот технологиялари ва коммуникацияларини ривожлантириш вазирлиги, Молия вазирлиги билан биргаликда ўзида лойиҳа қиймати ва тегишли ишларни молиялаштириш манбаларини акс эттирган ҳолда, “Тадбиркор” ахборот тизимини ташкил этиш, техник қўллаб-қувватлаш ва ривожлантириш бўйича техник ҳужжатларнинг ишлаб чиқилишини ҳамда Ўзбекистон Республикаси Президенти ҳузуридаги Лойиҳа бошқаруви миллий агентлиги ҳузуридаги “Электрон ҳукумат ва рақамли иқтисодиёт лойиҳаларини бошқариш маркази” давлат унитар корхонасига келишиш учун киритилишини; Ўзбекистон Республикаси Ахборот технологиялари ва коммуникацияларини ривожлантириш вазирлиги билан биргаликда ишларни молиялаштиришга амалдаги маблағ ажратилган санадан бошлаб 6 ой муддатда “Тадбиркор” ахборот тизимининг яратилиши ва ишга туширилишини таъминласин. Ўзбекистон Республикаси Инвестициялар ва ташқи савдо вазирлиги Молия вазирлиги билан биргаликда мазкур қарорнинг 10-бандида назарда тутилган чора-тадбирларни молиялаштириш учун халқаро молия институтлари ва бошқа донор ташкилотларнинг грантлари жалб этилишини таъминласин. 11. Ўзбекистон Республикаси Вазирлар Маҳкамаси бир ой муддатда Агентликнинг жойлаштирилишини таъминласин. 12. Ўзбекистон Республикаси Ахборот технологиялари ва коммуникацияларини ривожлантириш вазирлиги Агентликни зарур алоқа воситалари, шу жумладан, ҳукумат алоқаси билан таъминласин. 13. Ўзбекистон Республикаси Президентининг айрим ҳужжатларига 4-иловага мувофиқ ўзгартиш ва қўшимчалар киритилсин. 14. Ўзбекистон Республикаси Иқтисодиёт ва саноат вазирлиги: а) икки ҳафта муддатда белгиланган тартибда Агентлик ва Жамғарма ходимларининг штат жадвалини тасдиқласин; б) бир ой муддатда Ўзбекистон Республикаси Вазирлар Маҳкамасига: Агентлик ва Жамғарма тўғрисидаги низомларнинг лойиҳаларини; қонун ҳужжатларига мазкур қарордан келиб чиқадиган ўзгартиш ва қўшимчалар тўғрисида таклифларни киритсин; в) Адлия вазирлиги, Молия вазирлиги ва Савдо-саноат палатаси билан биргаликда икки ой муддатда Ўзбекистон Республикаси Савдо-саноат палатаси фаолиятининг самарадорлигини янада ошириш, шу жумладан, кичик бизнес ва тадбиркорликни ривожлантириш бўйича палатага хос бўлмаган функция ва вазифаларни тегишли органларга бериш юзасидан таклифларни Ўзбекистон Республикаси Вазирлар Маҳкамасига киритсин. 15. Мазкур қарорнинг ижросини назорат қилиш Ўзбекистон Республикасининг Бош вазири А.Н.Арипов зиммасига юклансин.   Ўзбекистон Республикаси Президенти                                                                   Ш.МИРЗИЁЕВ Тошкент шаҳри, 2019 йил 13 август ...

Батафсил
News

Ўзбекистон Президенти Осиё инфратузилмавий инвестициялар банки делегациясини қабул қилди

Ўзбекистон Республикаси Президенти Шавкат Мирзиёев 13 август куни Осиё инфратузилмавий инвестициялар банки президенти Цзинь Лицюнь бошчилигидаги делегацияни қабул қилди. Давлатимиз раҳбари меҳмонларни самимий қутлар экан, Ўзбекистон ва ОИИБ ўртасидаги ўзаро манфаатли ҳамкорлик ижобий суръат билан ривожланиб бораётганини мамнуният билан қайд этди. Банк мамлакатимизда амалга оширилаётган таркибий ислоҳотларни фаол қўллаб-қувватламоқда. Бугунги кунда Бухоро вилоятида сув таъминоти ва сув оқизиш тизимларини ривожлантириш, автомобиль йўлларни реконструкция қилиш бўйича умумий қиймати 1,3 миллиард доллардан зиёд бўлган илк инвестиция лойиҳаларини тайёрлаш ишлари якунига етмоқда. Қорақалпоғистон ва бошқа ҳудудларда ижтимоий, коммунал ва транспорт инфратузилмани модернизация қилиш, саноат корхоналари ва кичик инфратузилма лойиҳаларини молиялаштириш, шунингдек, минтақавий савдони ривожлантириш бўйича умумий қиймати 1,6 миллиард доллардан ортиқ истиқболли лойиҳалар ишлаб чиқилмоқда. Амалий ҳамкорликни кенгайтириш ва Осиё инфратузилмавий инвестициялар банкининг молиявий ресурсларини жалб қилган ҳолда янги дастурларни илгари суриш масалаларига бағишланган бугунги давра суҳбати муваффақиятли бўлгани алоҳида қайд этилди.   Самарали ҳамкорлик бўйича ўрта муддатли истиқболга мўлжалланган "йўл харитаси"ни ишлаб чиқиш ва қабул қилиш, шунингдек, шериклик салоҳиятини рўёбга чиқаришга қаратилган икки томонлама тадбирлар ўтказиш тўғрисида келишувга эришилди. ОИИБ президенти давлатимиз раҳбарига самимий қабул учун миннатдорлик билдирди ҳамда мамлакатимизда устувор лойиҳаларни амалга оширишни жадаллаштириш йўлида аниқ чоралар кўриш таклифини тўлиқ қўллаб-қувватлади. Цзинь Лицюнь мамлакатимиз ва бутун Марказий Осиё минтақасининг барқарор тараққиётини таъминлаш мақсадида банк Ўзбекистон билан кенг кўламли ҳамкорликни мустаҳкамлашга қатъий интилишини таъкидлади. Манба: Ўзбекистон Республикаси Президенти Матбуот хизмати ...

Батафсил
News

ОТБ халқаро арбитражни ислоҳ қилишда ёрдам беради

Адлия вазирлиги ва Осиё тараққиёт банки Ўзбекистонда инвестиция муҳитини янада яхшилаш мақсадида халқаро арбитраж ислоҳотини ўтказади. Бунинг учун Адлия вазирлиги ОТБнинг $225 000 ҳажмидаги техник кўмагини жалб қилади. Ушбу кўмак: замонавий халқаро стандартларга мувофиқ “Халқаро тижорат арбитражи тўғрисида”ги Қонунни ишлаб чиқиш, жумладан халқаро экспертлар ва ОТБ томонидан қонун лойиҳасини ишлаб чиқишнинг турли босқичларида уни кўриб чиқиш ва хулосалар тақдим қилиш, шунингдек, Ҳукумат ва бошқа манфаатдор томонлар билан қатор маслаҳатлашувлар ўтказишга; хорижий арбитраж қарорларини ва улар билан боғлиқ халқаро арбитраж низоларини тан олиш ва ижро қилиш ҳақидаги процессуал кодексларга тегишли ўзгартиш ва қўшимчаларни ишлаб чиқишга; халқаро арбитраж ислоҳотини амалга оширишга кўмаклашиш мақсадида ҳуқуқни қўлловчи сифатида судьялар ва амалиётчи-ҳуқуқшуносларнинг ҳамда ҳуқуқдан фойдаланувчилар сифатида хусусий секторнинг салоҳиятини оширишга ёрдам беради. Техник кўмакни амалга ошириш мақсадида ОТБ етакчи халқаро маслаҳатчилар жамоасини жалб қилади. Мазкур лойиҳани амалга ошириш Ўзбекистонда халқаро тижорат низоларини ҳал қилишнинг муқобил механизмлари ривожланишига ҳамда янада жозибадор инвестицион муҳит шаклланинишига хизмат қилади. Манба: Norma.uz Подробн ...

Батафсил
News

Экспорт, инвестиция ва ишлаб чиқаришни маҳаллийлаштириш масалалари муҳокама қилинди

Ўзбекистон Республикаси Президенти Шавкат Мирзиёев раислигида 12 август куни иқтисодиёт тармоқлари ва ҳудудларнинг экспорт салоҳиятини ошириш ва улардан самарали фойдаланиш, инвестицияларни, аввало, тўғридан-тўғри хорижий инвестицияларни жалб қилиш ва ўзлаштириш, ишлаб чиқаришни маҳаллийлаштириш кўламини кенгайтириш масалаларига бағишланган видеоселектор йиғилиши ўтказилди.  Давлатимиз раҳбари бу масалаларга алоҳида эътибор қаратиб, доимий муҳокама қилиб бормоқда. Ушбу соҳаларга доир ҳужжатлар қабул қилиниб, зарур шарт-шароитлар яратилмоқда.   Хусусан, Ўзбекистон Республикаси Президентининг 2018 йил 20 декабрдаги “Экспортга кўмаклашиш ва уни рағбатлантиришни кучайтириш чора-тадбирлари тўғрисида”ги қарорига мувофиқ, Экспортни қўллаб-қувватлаш миллий тизими яратилди. Инвестициялар ва ташқи савдо вазирлиги ҳузурида Экспортни рағбатлантириш агентлиги ташкил этилди. Шунингдек, 205 номдаги товарларни экспорт қилишда транспорт харажатларининг 50 фоизини қоплаб бериш йўлга қўйилди. Бундай реал, амалий чора-тадбирлар албатта ўз натижасини бермоқда. Экспорт билан шуғулланадиган субъектлар сафига 2 мингта янги корхона қўшилди, экспорт географияси 42 та давлатга кенгайди, 59 турдаги маҳсулот биринчи марта экспортга йўналтирилди. Жорий йилнинг етти ойида товарлар ва хизматлар экспорти 7 миллиард 331 миллион долларни ташкил этган, бу ўтган йилнинг шу даврига нисбатан 23 фоиз кўпдир.  Йиғилишда “Ўзтўқимачиликсаноати” уюшмаси, “Ўзбекозиқовқатхолдинг” компанияси ҳамда Тошкент шаҳри, Фарғона, Андижон ва Тошкент вилоятларида экспортни кўпайтириш бўйича мавжуд имкониятлардан тўлиқ фойдаланилмаётгани кўрсатиб ўтилди. Мутасадди раҳбарлар экспортёрларнинг муаммолари билан тизимли шуғулланмаётгани, давлат томонидан яратилган имкониятларни тадбиркорларга етказиб, уларнинг ташқи бозорга чиқишига кўмаклашмаётгани танқид қилинди.  Инвестициялар ва ташқи савдо вазири бошчилигида ташкил этилган Ҳудудлар ва тармоқларнинг экспорт салоҳиятини ошириш бўйича Республика комиссияси корхоналар вакиллари ва тадбиркорлар билан учрашувлар ўтказиб, уларни экспорт фаолиятига жалб этиши, бу борадаги муаммоларини ҳал этиш, халқаро стандартларни жорий қилиш ва сертификациядан ўтказиш бўйича ёрдам бериши зарурлиги таъкидланди.  – Экспорт имкониятларимиз кўп. Хусусан, пахта толаси ва мева-сабзавотни қайта ишлаб, экспортбоп маҳсулотлар чиқариш мамлакатимизнинг ривожланиш нуқталаридан бири бўлиши керак. Шу орқали экспортни кўпайтирамиз ва янги иш ўринларига эга бўламиз, – деди Шавкат Мирзиёев.   Маълумки, юртимизда етиштирилган қишлоқ хўжалиги маҳсулотлари бутун дунёда қадрланади. Бу тайёр “бренд” экспорт учун катта имкониятдир.  Президентимизнинг шу йил 29 июль куни қабул қилинган “Қишлоқ хўжалиги маҳсулотларини чуқур қайта ишлаш ва озиқ-овқат саноатини янада ривожлантириш бўйича қўшимча чора-тадбирлар тўғрисида”ги Қарори мазкур имкониятдан самарали фойдаланиш, аграр соҳага замонавий технологияларни жорий қилишга қаратилган.   Унга кўра, 2019-2021 йилларда умумий қиймати қарийб 1 миллиард доллар бўлган 45 та агрологистика комплекси, қайта ишлаш бўйича 205 та янги қувват, 36 минг гектар интенсив боғ ташкил этиш режалаштирилган. Йиғилишда шу борадаги ишларнинг ижросига ҳам тўхталиб ўтилди. Белгиланган чора-тадбирларни муддатида бажариш ва бунинг ҳисобига мева-сабзавот экспортини 2021 йилда 2 баробар ошириш зарурлиги таъкидланди. Такрорий майдонларга экспортбоп экинлар экиш, айниқса, дуккакли маҳсулотларни экспортга кўпроқ чиқариш муҳимлиги қайд этилди.  Хорижга ташрифлар ҳамда халқаро кўргазмалар доирасида имзоланган экспорт шартномаларининг бажарилиши, октябрь ойида “Ўзбекистонда ишлаб чиқарилган” номли халқаро кўргазма ўтказилишига оид масалаларга ҳам эътибор қаратилди.     Экспортёрларнинг хориждаги савдо уйлари устав капитали миқдорини ошириш юзасидан таклифлар билдирилди. Инвестиция иқтисодиётнинг ҳаракатлантирувчи кучи. Мамлакатимизда фаол инвестиция сиёсати юритилиб, иқтисодиёт тармоқлари ва ҳудудларга тўғридан-тўғри хорижий сармоялар йўналтирилаётгани натижасида кўплаб лойиҳалар амалга оширилмоқда.   Масалан, жорий йилнинг биринчи ярмида 85 триллион 775 миллиард сўм инвестиция ўзлаштирилган, бу ўтган йилнинг шу даврига нисбатан 1,6 баробар кўпдир. Асосий капиталда тўғридан-тўғри хорижий инвестициялар улуши 2,5 баробарга ошиб, 1,7 миллиард долларга етган. Давлат кафолати бўлмаган хорижий кредитлар эса 3,7 баробар кўпайган. Ўзлаштирилган тўғридан-тўғри хорижий сармояларнинг қарийб 75 фоизи ҳудудий лойиҳаларга тўғри келмоқда. Бу кўрсаткичлар қайд этилар экан, энди асосий эътиборни йилнинг қолган даврида кўзда тутилган инвестицияларни тўлиқ ўзлаштиришга қаратиш зарурлиги таъкидланди.  Тўғридан-тўғри хорижий инвестицияларни ўзлаштириш суст кечаётган тармоқлар раҳбарлари мавжуд ҳолат сабаблари ва бу борадаги ишларни жадаллаштириш режалари тўғрисида ҳисобот берди.  Вазирлар Маҳкамасига 2019 йилги Инвестиция дастурига мувофиқ, умумий қиймати 4,2 миллиард доллар бўлган 145 та лойиҳа бўйича саноат объектларини муддатида ишга тушириш юзасидан топшириқлар берилди. “Навоийазот” акциядорлик жамиятида поливинилхлорид ва азот кислотаси ишлаб чиқариш, Муборак газни қайта ишлаш заводида суюлтирилган газ ишлаб чиқаришни кенгайтириш, Тўрақўрғон, Тахиатош ва Навоий иссиқлик электр станцияларида янги буғ-газ ускуналарини ўрнатиш, Тошкент металлургия заводини қуриш лойиҳалари шулар жумласидандир. Таҳлилларга кўра, охирги ўн йилда ишга туширилган қирққа яқин йирик корхона қувватларидан тўлиқ фойдаланилмаяпти.  Вазирлар Маҳкамаси, Инвестициялар ва ташқи савдо вазирлиги, Иқтисодиёт ва саноат вазирлигига инвестиция дастурлари доирасида ишга туширилган корхона ва объектлар фаолиятини таҳлил қилиб, кам қувватда ишлаётганларини лойиҳа параметрларига олиб чиқиш бўйича кўрсатмалар берилди.  Йиғилишда 2020-2022 йилларга мўлжалланган Инвестиция дастурини шакллантириш масаласи ҳам муҳокама қилинди. Ушбу дастурга, аввало, олий даражадаги ташрифлар доирасида имзоланган 650 га яқин келишувларга мувофиқ ишлаб чиқилган аниқ лойиҳаларни, шунингдек, нефть-газ хомашёсини чуқур қайта ишлаш, муқобил энергетика, машинасозлик, электр техникаси, қурилиш материаллари, агросаноат каби юқори технологияли тармоқлардаги лойиҳаларни  киритиш зарурлиги кўрсатиб ўтилди. Видеоселекторда яна бир муҳим соҳа – маҳаллийлаштиришни кенгайтириш масаласи атрофлича таҳлил қилинди.  Маҳаллий хомашёни чуқур қайта ишлаш асосида юқори қўшимча қиймат яратиш ва импорт ўрнини босувчи маҳсулотлар ишлаб чиқариш иқтисодиёт барқарорлигининг муҳим омилидир. Шу боис мамлакатимизда маҳаллийлаштиришни ривожлантириш, корхоналар ўртасида саноат кооперациясини кенгайтиришга зарур шароит яратилмоқда.  Лекин айрим тармоқ ҳамда ҳудудларда маҳаллийлаштириш бўйича ишлар ўз ҳолига ташлаб қўйилгани танқид қилинди.  – Шунча шароит яратяпмиз, технологиялар олиб келяпмиз. Жойлардаги раҳбарлар эса ўзини қийнамай, маҳаллийлаштириш устида ишлаш ўрнига осонгина импорт қилишга ўрганган, – деди Президентимиз. Юртимизда молибденнинг 1,1 фоизи, табиий газнинг 12 фоизи, рухнинг 21 фоизи, миснинг 25 фоизи, мева-сабзавотларнинг 20 фоизи, ип-калаванинг 46 фоизи қайта ишланмоқда, холос. Агар бу хомашёлар чуқур қайта ишланса, қўшилган қийматни 5 бараваргача ошириш мумкинлиги қайд этилди.  Вазирлар Маҳкамасига барча тармоқ ва ҳудудлар корхоналарида маҳаллийлаштирилган товар ишлаб чиқариш ҳажмини келгуси икки йилда камида 20 фоизга ошириш, импорт улуши юқори бўлган товарларни маҳаллийлаштириш бўйича дастур тайёрлаш вазифаси қўйилди. Ҳисоб палатаси таркибида маҳаллийлаштиришни кенгайтириш масалаларини таҳлил қиладиган бўлинма ташкил этиш зарурлиги таъкидланди.  Видеоселекторда тармоқлар ҳамда ҳудудлар раҳбарларининг ҳисобот ва таклифлари эшитилди. Манба: Ўзбекистон Республикаси Президенти Матбуот хизмати ...

Батафсил
News

Ўзбекистон халқига Қурбон ҳайити табриги

Муҳтарам ватандошлар!   Халқимиз бутун мусулмон уммати билан биргаликда катта шоду хуррамлик ила кутиб олаётган Қурбон ҳайити билан сизларни, гўзал диёримиздаги барча мўминларни чин қалбимдан самимий табриклаб, энг эзгу тилакларимни билдираман.   Асрлар давомида эл-юртимизнинг маънавий ҳаётида беқиёс ўрин эгаллаб, жамиятимизда ўзаро ҳурмат, меҳр-оқибат ва бағрикенглик тамойилларини янада мустаҳкамлаб келаётган ушбу қутлуғ байрам барчамизга муборак бўлсин!    Мана шундай шукуҳли ва саодатли айёмда ҳаммамиз аввало Аллоҳ таборака ва таолога беадад шукроналар айтишимиз табиийдир.   Сиз, азизларга яхши маълумки, Ўзбекистонда сўнгги йилларда миллий-диний қадриятларимизни тиклаш ва ривожлантириш, эътиқод эркинлигини таъминлашга алоҳида эътибор қаратилмоқда, турли миллат ва элатлар ўртасида тотувлик, аҳиллик ва ҳамжиҳатлик муҳити тобора юксалиб бормоқда.    Айниқса, халқимизнинг ислом маданияти ва цивилизациясига қўшган улкан ҳиссасини мамлакатимиз ва дунё жамоатчилигига етказиш, табаррук қадамжоларни обод қилиб, зиёратгоҳларга айлантириш, буюк аждодларимизнинг илмий-маънавий меросини чуқур ўрганиш ва тарғиб этиш борасида бошлаган хайрли ишларимиз илму маърифатнинг қадрига етадиган эл-юртимиз ва халқаро ҳамжамият томонидан тўлиқ қўллаб-қувватланмоқда.    Фуқароларимиз учун яратилган янги имконият ва шароитлар туфайли ушбу мўътабар ва улуғ айём кунларида Маккаи мукаррамада муқаддас ҳаж амалларини адо этаётган 7 мингдан зиёд ватандошларимиз бугунги тинч-осойишта, эркин ҳаёт учун Парвардигори оламга ҳамду санолар айтиб, юртимизга равнақ, халқимизга хайр-барака сўраб, дуои фотиҳалар қилишмоқда.    Ҳожиларимизнинг барчасини самимий муборакбод этиб, уларнинг она диёримизга соғ-саломат қайтиб келишларини тилаймиз. Улар ўзларининг ибратли фазилатлари, жамият ҳаётидаги фаол иштироки билан ёш авлодимизни эл-юртга садоқатли ва фидойи, ҳидоят йўлидан борадиган ҳалол ва пок инсонлар этиб тарбиялашга муносиб ҳисса қўшадилар, деб ишонамиз.   Яратганнинг неъматлари зиёда бўлаётган ва шукроналик ҳислари қалбларимизни нурафшон қилаётган ушбу айёмда узоқ ва яқин ҳудудларда жойлашган барча мусулмон мамлакатларининг халқларини, хорижий дўст ва ҳамкорларимизни қутлаб, уларга тинчлик, бардавом тараққиёт ва фаровонлик ёр бўлишини тилаймиз.   Қадрли юртдошлар!   Қурбон ҳайитининг мамлакатимизда мустақиллик байрами арафасида кенг нишонланиши халқимизнинг руҳи ва кайфиятини янада кўтармоқда.   Айни шу кунларда эл-юртимизга хос бўлган меҳр-мурувват, шафқат ва саховат туйғулари яққол намоён бўлиб, барчамизни эҳтиёжманд, кам таъминланган ва боқувчисини йўқотган оилалар, ногиронлар, ёлғиз кексаларнинг ҳолидан хабар олиш, уларга моддий ва маънавий ёрдам кўрсатиш, зиёратгоҳлар, муқаддас қадамжолар ва қабристонларни обод қилиш каби савобли ишларга даъват этмоқда.    Бундай хайрли амаллар мамлакатимизда ижтимоий ҳаётнинг турли соҳаларида рўёбга чиқарилаётган, инсонни азиз ва мукаррам деб билишга, жамиятимизда қонун ва адолат устуворлигини таъминлашга қаратилган ислоҳотларимизга ҳар томонлама уйғун ва ҳамоҳангдир.   Биз уларнинг замирида ислом динининг инсонпарварлик моҳияти ва қудратини кўрамиз, буюк маънавий мерос ворислари эканимиздан ҳақли равишда фахрланамиз.   Ҳурматли ватандошлар!   Барчангизни Қурбон ҳайити байрами билан яна бир бор чин юракдан муборакбод этаман.   “Дилинг – Аллоҳда, қўлинг – меҳнатда бўлсин”, деган олижаноб эътиқод билан яшаётган халқимиз доимо омон бўлсин!   Жонажон Ватанимиз, хонадонларимиздан хотиржамлик, аҳиллик, файзу барака ҳеч қачон аримасин!   Эзгу интилиш ва ишларимизда Яратганнинг ўзи ҳамиша мададкор бўлсин!     Шавкат Мирзиёев   Ўзбекистон Республикаси Президенти ...

Батафсил
News

Ўзбекистон Республикаси Президенти Администрацияси ва Вазирлар Маҳкамаси АХБОРОТИ

Маълумки, республикамизнинг қатор ҳудудларида эски бино ва иморатларни реконструкция қилиш, ҳудудларни ободонлаштириш, олис қишлоқ ва туманлар қиёфасини ўзгартириш бўйича комплекс чора-тадбирларни амалга ошириш жараёнида айрим вилоятлар раҳбарлари ва масъул шахслари томонидан фуқаролар ва тадбиркорларнинг кўчмас мулк объектларини бузиш ва ер участкаларини олиб қўйиш билан боғлиқ мулкий ҳуқуқлари қўпол равишда бузилиши қайд этилди.  Давлатимиз раҳбари томонидан қурилиш ва бузиш ишларида йўл қўйилган хатолар ҳамда аҳоли ва мулк эгалари билан келишилмаган ҳолда амалга оширгани учун Қашқадарё, Фарғона ва Хоразм вилоятлари ҳокимлари фаолияти кескин танқид қилинди.  Рўй берган ҳодисалар доирасида бино ва иморатлар эгаларининг ҳуқуқлари ва қонуний манфаатлари кафолати янада мустаҳкамланишини таъминлаш, аҳолининг фаровон турмуш кечириши учун зарур шароитлар яратиш, бузиш ва келтирилган зарарни қоплаш механизмларини тартибга солиш мақсадида жорий йил 3 август куни Президентимизнинг «Фуқаролар ва тадбиркорлик субъектларининг мулк ҳуқуқи кафолатланишини сўзсиз таъминлаш бўйича қўшимча чора-тадбирлар тўғрисида»ги фармойиши қабул қилинди.   Мазкур ҳужжат билан Бош вазир раҳбарлигида бир ой муддатда ер участкаларини олиб қўйиш ва мулкдорларга етказилган зарарларни қоплаш тартибини белгиловчи ҳукумат қарори қабул қилингунига қадар амал қиладиган тегишли жойлаштириш ишларини амалга ошириш тартиби тасдиқланди.   Бош вазир ўринбосари раҳбарлигида Республика мувофиқлаштирувчи ишчи гуруҳи тузилиб, у икки ҳафта давомида республика бўйича фуқаролар ва тадбиркорлик субъектларига етказилган зарар миқдорини хатловдан ўтказади, бозор нархидан келиб чиққан ҳолда унинг реал баҳосини белгилайди, шунингдек, аҳолидан қарздорликни узишнинг аниқ манбаларини белгилаб беради.   Жойларга чиққан ҳолда вазиятни ўрганиш, шунингдек, республикамизнинг айрим ҳудудларида қонунга хилоф хатти-ҳаракатлар ва мансабдор шахсларнинг ўзбошимчаликлари оқибати таҳлили натижалари аниқ таклифлар билан Ўзбекистон Республикаси Президенти Шавкат Мирзиёевга киритилди.   Шу билан бирга Президентимиз топшириғига мувофиқ, йўл қўйган қўпол хатолари ва мансаб ваколатларини суистеъмол қилгани учун Фарғона вилояти Риштон тумани хокими, иқтисодиёт ва қурилиш масалалари бўйича ҳоким ўринбосарлари, ҳоким ва унинг қурилиш бўйича ўринбосари, Қашқадарё вилояти Яккабоғ тумани ҳокими, унинг қурилиш бўйича ўринбосари, туман прокурори ва Урганч шаҳар ҳокими ўринбосари эгаллаб турган лавозимидан озод этилди.   Қопланиши керак бўлган зарар миқдори, жабр кўрган аҳолини моддий ва маънавий жиҳатдан тўлиқ қўллаб-қувватлаш таъминланишини ҳисобга олган ҳолда вилоят ҳокимлари ва бошқа масъул шахсларнинг эгаллаб турган лавозимидан дарҳол озод этилиши улар учун вазиятдан чиқишнинг энг осон йўлидир. Бу борада амалга оширилиши керак бўлган ишлар учун масъулият ва машаққат энди уларнинг ишини давом эттирувчилар зиммасига тушади.   Шуни инобатга олиб, давлатимиз раҳбари томонидан тегишли ҳудудлар раҳбарларининг жойларда улар йўл қўйган хатоларни тузатиш, фуқароларнинг мулкий ҳуқуқлари ва ҳукуматга ишончини тўлиқ тиклаш бўйича ишларда уларнинг шахсан иштирок этишини таъминлаш мақсадга мувофиқ экани тўғрисидаги таклиф қўллаб-қувватланди.   Йил якунлари бўйича барча вилоятлар, жумладан, Қашқадарё, Фарғона ва Хоразм вилоятлари ҳокимлари фаолияти танқидий таҳлил қилиниб, жойларда юзага келган вазиятни ўнглаш бўйича амалга оширилган ишлар самарадорлигига баҳо берилади.   Манба: ЎзА ...

Батафсил
News

Электр энергияси ва газ учун олдиндан тўлаш қоидалари яна ўзгарди

Электр энергиясидан ва табиий газдан фойдаланиш қоидаларига навбатдаги ўзгартиришлар киритилди (30.07.2019 йилдаги 633-сон ВМҚга қаранг). Эслатиб ўтамиз, 1 мартдан электр энергияси ва табиий газ учун олдинган тўлов киритиш қоидалари ўзгарди: тарифлар ўзгарганда кейинчалик қайта ҳисоблашларсиз олдиндан тўлов тўланадиган давр икки баравар – 6 ойга қисқартирилди. Кўриб чиқилаётган ўзгартиришлар бир-бирига ўхшашдир, рухсат этиладиган давр яна 3 баравар – 2 ойга қисқартирилади. Шу тариқа, маиший истеъмолчилардан электр энергияси учун олдиндан тўлов тариф ўзгарганда қайта ҳисоблашларсиз кўпи билан 2 ой олдиндан қабул қилинади. Табиий газдан фойдаланиш қоидаларида олдиндан тўлов даври чекланмаган. Бироқ тариф ўзгарганда истеъмолчи тўлов тўланган кундан бошлаб фақат 2 ой давомида олдиндан тўланган ҳажм учун қўшимча тўловлардан озод этилади. Электр энергияси ва газ учун олдиндан ҳақни 2019 йил 31 июлгача тўлашга улгурган шахсларга нисбатан қўшимча тўловсиз 6 ой тўғрисидаги аввалги қоида қўлланилади. Маълумот учун: бошқа тоифадаги истеъмолчиларга (номаиший) нисбатан қоидалар ҳам икки марта: жорий йилнинг 1 мартива 1 июнидан ўзгартирилди. Ҳужжат Қонун ҳужжатлари маълумотлари миллий базасида эълон қилинган ва 31.07.2019 йилдан кучга кирди. Манба: Norma.uz Подробн ...

Батафсил
News

Меҳр ришталари билан боғланган кўнгил йўли

Жонажон Ўзбекистоним, мангу бўл омон! 1991 йил 31 август. Тарих ўзани миллий тақдиримизда туб бурилиш ясади. Халқимиз, мамлакатимиз ҳаётида энг улуғ, энг азиз кун сифатида мангуга муҳрланиб қолди. ...Мамлакатимизга ташриф буюраётган меҳмонларни кўп кузатаман. Улар таниқли сиёсатдонлар, давлат ва жамоат арбоблари, олим ва мутахассислар, оддий, аммо кўпни кўрган сайёҳлар. Юртимиз меҳмонлари мамлакатимиздаги ютуқларни ҳайрат ва ҳавас билан кўриб, ижобий хулосалар чиқармоқда.  Ўзбекистон айни кунларда улкан қурилиш ва ободонлаштириш майдонига айланган. Зеро, шаҳар кўринишини олаётган қишлоқларимиз сони ошиб бормоқда. Бундай шиддатли тараққиётни кўриб, буюк бобомиз Амир Темурнинг “Бизнинг кимлигимизни билмоқчи бўлсанг, биз қурган иморатларга боқ”, деган сўзлари қалбимиздан ўтади. Айниқса, шаҳар ва қишлоқларимизга кўрк бераётган ижтимоий иншоотлар, намунавий лойиҳалар асосида барпо этилаётган уй-жойлар, дам олиш масканлари, истироҳат боғлари, равон кўчалар-у йўллар турмуш тарзимиз нақадар яхшиланиб, ҳаётимиз фаровонлашиб бораётганидан далолатдир. Энг муҳими, юртимиз тинчлиги, Ватанимиз равнақи, халқимиз фаровонлиги йўлида олиб борилаётган саъй-ҳаракатлар натижасида мамлакатимизда тинчлик ва хотиржамлик барқарор, одамлар руҳиятида кўтаринки кайфият ҳукмрон. Бундай муваффақиятларнинг бош омили, аввало, давлатимиз сиёсатининг инсонийлик ва эзгулик тамойиллари билан уйғунлигидадир. Бинобарин, мамлакатимизда инсон манфаатлари ҳамма нарсадан устун. Муҳими, ҳар бир инсоннинг ҳуқуқ ва эркинликлари, шаъни, қадр-қиммати, турар жойи, мулки ва бошқа дахлсиз ҳуқуқлари қонунларимиз, Президентимиз ҳимоясида. Инсонийлик ва эзгулик қуруқ гап эмас. Энг аввало, Ватан равнақи ва тинчлиги, халқ фаровонлиги йўлида садоқат билан хизмат қилиш, халқимизни рози қилиш, айниқса, одамлар қалбига қулоқ солиш, кўнглига йўл топиш. Бугунги кунда бу борадаги ишлар кўлами янада кенгайди, янада муҳим паллага кўтарилди. Рақамларга мурожаат қиладиган бўлсак, жорий йилнинг биринчи ярмида мамлакат ялпи ички маҳсулоти 5,8 фоиз, саноат маҳсулотлари ишлаб чиқариш ҳажми 6,9 фоиз ўсди. Маҳаллий бюджетлар ихтиёрида 2,6 триллион сўмдан зиёд ёки ўтган йилнинг шу даврига нисбатан 1,5 баробар кўп маблағ қолдирилди. Бюджет даромадлари қарийб 51 триллион сўм ёки прогнозга нисбатан 109 фоизни ташкил этди. Яна шуни алоҳида таъкидлаш жоизки, бу йил табиат ҳам бизга қарашди. Бобо-деҳқонларимиз халқимиз дастурхони учун 7 миллион тоннадан ортиқ ғалла жамлаб, ҳаммамизни хурсанд қилди. Яна шуни алоҳида таъкидлаш жоизки, мана бу йил биз Мустақиллигимизнинг 28 йиллигини муносиб кутиб олиш тараддудидамиз. Халқимиз учун энг улуғ, энг азиз айём, эркин, обод ва фаровон ҳаёт қуриш йўлидаги барча ютуқ ва муваффақиятларимизнинг асосий манбаи бўлган Ватанимиз мустақиллигининг ўтган йигирма саккиз йилида амалга оширилган саъй-ҳаракатлар эвазига миллий тикланишдан миллий юксалиш сари одимлаяпмиз. Бу одимларимиз нафақат эришаётган ютуқларимиз, маънавиятимиз, дахлдорлигимиз, масъулиятимиз билан ўлчанади, албатта. Биз фақат эришган ютуқларимизга маҳлиё бўлиб қолмасдан, юрт тараққиётига ўз улушимизни қўшиш билан қувонишимиз керак. ...Ҳаммамизни тарбиялаган, вояга етказган – шу халқ. Барчамизга туз-насиба берган ҳам шу халқ. Бизга ишонч билдирган, раҳбар қилиб сайлаган ҳам айнан шу халқ. Шундай экан, биз, биринчи навбатда, ким билан мулоқот қилишимиз керак – одамларимиз билан. Ким билан бамаслаҳат иш тутишимиз керак – аввало, халқимиз билан. Шунда халқимиз биздан рози бўлади. Халқ биздан рози бўлса, ишимизда унум ва барака бўлади. Мамлакатимиз Президенти Шавкат Мирзиёев 2016 йилнинг 14 декабрида Олий Мажлис палаталарининг қўшма мажлисида шу сўзларни айтганида барчамизнинг кўнглимиз равшан тортди. Шеърият мулкининг султони Алишер Навоий: “Эл поясин англай десанг асрорини бил,  Кўнглидаги муддаосин изҳорини бил” деб айтганидек, давлатимиз раҳбари ишни кўнгилдан, халқ кўнглини тафтиш қилишдан бошлади. Кўнгил... Ҳа, қулоққа оддийгина эшитиладиган бу сўз замиридан қалб, дил, юрак каби тушунчалар ўрин олган. У билан тиллашиш, уни эшита билиш, унга қўл солиш нақадар муҳим иш эканлигини тезда ҳамма англай бошлади. Хўш, давлат раҳбари халқ кўнглига йўл топишни нимадан бошлади? Албатта, юзма-юз мулоқотдан. Уйма-уй, хонадонма-хонадон кириб боришдан. Одамларни қийнаётган муаммоларни аниқлаб, зудлик билан ҳал этишдан. Бу ишларни сўзда эмас, амалда бажариш барча даражадаги раҳбарларнинг асосий вазифаси этиб белгиланди. 2017 йил мамлакатимизда “Халқ билан мулоқот ва инсон манфаатлари йили” деб эълон қилинди. Унинг дастурига халқ давлат органларига эмас, давлат органлари халқимизга хизмат қилади, деган тамойил асос қилиб олинди. Бундан ташқари, 2016 йилнинг 28 декабрида Президентнинг “Жисмоний ва юридик шахсларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида”ги фармони қабул қилинди. Фармонга мувофиқ, Президентнинг Халқ қабулхоналари ва Виртуал қабулхонаси ташкил этилди. Ўз-ўзидан савол туғилади. Нима учун Президентнинг Халқ қабулхоналари ва Виртуал қабулхонаси ташкил этилди? Ахир халқнинг арзи ва шикоятларини кўриб чиқадиган давлат ва хўжалик бошқаруви органлари раҳбарлари, масъул мансабдор шахслар, маҳаллий ҳокимликлар вакиллари борку?! Гап шундаки, узоқ йиллар давомида халқ билан раҳбарлар ўртасидаги мулоқотлар сустлашиб, “хўжакўрсин”га айланиб қолганди. Одамлар орасидан кимдир бирор раҳбарга мурожаат қилиб келса, “шикоятбоз”, “аризабоз”га айланарди. Фуқаролар турли ташкилотлар ўртасида йиллаб сарсон бўларди. Одамларнинг ўз арзлари билан биринчи раҳбарлар қабулига кириши амримаҳол бўлиб қолганди. Айниқса, давлат органлари ва маҳаллий ҳокимиятларнинг темир панжаралар ортига бекиниб олганлиги одамларнинг ғашига тегиб, раҳбарларга бўлган ишончини сусайтирганди. Оқибатда давлат органлари билан халқ ўртасидаги масофа анчагина узоқлашиб қолганди. Ҳа, шу сабабли ҳам мамлакатимиз раҳбари Шавкат Мирзиёев ислоҳотларни инсон ҳуқуқларини тўлиқ рўёбга чиқаришдан, халқ билан давлат ўртасига ишонч кўпригини ўрнатишдан бошлади. Инсон ҳуқуқларининг уч ўзагидан бири бўлган Ўзбекистон фуқароларининг сиёсий ҳуқуқларини, айнан мурожаат қилиш ҳуқуқини амалга оширишлари учун кенг ва тенг шароитлар яратиш масалаларига алоҳида эътибор қаратди. Юртдошларимиз мурожаатларига – ўз фикр-мулоҳазалари, ўйлари, дард-ташвишлари, орзу-армонларига Президент даражасида эътибор қаратилаётганлиги ҳар биримиз учун муҳим аҳамият касб этмоқда. Пировардида, одамларнинг ҳаётга, давлатга, жамиятга, келажакка ишончи нафақат мустаҳкамланмоқда, ортиб ҳам бормоқда. Барчамиз ҳаётнинг мавжуд аччиқ ҳақиқатларига юзма-юз келиб, реал воқеликнинг шиддатли тўлқинида ёниб ишлаш мумкин эканига рўй-рост шоҳид бўлмоқдамиз. Буларнинг барчаси, аввало, муаммоларга тик қараб, уларни бир четдан ҳал қилишга киришилганидан, ватанпарварликдан, халқчилликдан, шижоат ва жасоратдан далолатдир. Тўғри-да. Президентимизнинг кўплаб қарор ва фармонларида ҳам ўз ифодасини топаётган масалалар аслида халқимизнинг қалбида сақлаб юрган орзулари эмасмиди?! Халқимиз ҳаётида муҳим из қолдирган Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш кечагина ўз йўлбошчисини йўқотган халқнинг кўнглига таскин берган бўлса, атоқли давлат арбоби ва адиб Шароф Рашидов таваллудининг 100 йиллигини нишонлаш тўғрисидаги саъй-ҳаракатлар ўзбек халқи ўз фидойи фарзандларини ҳеч қачон унутмаслигининг яна бир исботи бўлди. Очиғини айтиш керак, инсон кексайган сайин иззатталаб, меҳрталаб бўлиб қолади. Мана шундай кекса инсонларни қадрлаш, йўқлаш, уларнинг ҳолидан хабар олиб туришга, кечаги меҳнаткаш – бугунги нуроний-фахрийлар ҳурматини жойига қўйишга қаратилган чора-тадбирлар, “Меҳнат фахрийси”, “Маҳалла ифтихори” каби кўкрак нишонларини таъсис этиш ҳақидаги фармонлар кўпчиликнинг дилини яйратди. Бир пайтлар Ватан учун, халқ учун фидокорона меҳнат қилиб, кеча ёрдамга муҳтожлиги ҳақида кимга мурожаат қилишини билмай ўтирган уруш қатнашчилари, меҳнат фахрийлари иззат-икром топа бошлади. Шунингдек, иқтисодиётнинг тамал тошини қўядиган илм аҳли – академиклар, профессор-ўқитувчиларга алоҳида эътибор қаратилмоқда, улар эъзозланмоқда, заҳматли меҳнатлари муносиб қадрланмоқда. Ҳеч ким эътибордан, меҳрдан четда қолган эмас. Шу жумладан, ёшлар учун ҳам кенг ва тенг шароитлар яратилгани, кўпчилик ёшларни сарсон-саргардон қилиб қўйган нострификация муаммолари ўз ечимини топгани, олий таълим муассасалари сони сезиларли даражада ошгани, ўнлаб нуфузли хорижий таълим муассасалари бизнинг ёшлар учун эшигини мамлакатимизга келиб очгани, бир неча олий таълим муассасалари марказдан ҳудудларга, туман ва шаҳарларга кўчгани эътибор эмасми?! Тиббий соҳадаги ғамхўрликларни қаранг: тез тиббий ёрдам сифати, патронаж хизматлар, энг замонавий диагностика марказлари, хорижлик тажрибали мутахассисларнинг мамлакатимиз аҳолиси ичига кириб кўрсатаётган ёрдамлари, Тошкентдаги тажрибали мутахассисларнинг қишлоқ жойларига бориб, оддий одамларга кўрсатаётган малакали тиббий хизматлари... Ҳа, ана шундай тезкор шароитлар ва шиддатли юксалишлар билан ҳамоҳанг истиқлолимиз ҳам ҳар йили бир ёшга улғаймоқда. Бу улғайиш тинч-тотув ҳаётимиз, фаровон турмушимиз, буюк келажагимиз, истиқлол шарофати билан турмуш тарзимизга, хонадонларимизга кириб келаётган рўшноликлар, тўкин ризқ-насиба, дунёқарашимизда юз бераётган ўзгаришлар билан боғлиқ. Бу улғайишда, энг аввало, қадди бастимизнинг, ғурур ва шаънимизнинг тикланганини кўрамиз, миллатнинг эркка эришуви нақадар тотли, нақадар тароватли туйғу эканини ҳис этамиз, жаҳон ҳамжамияти сафларида ўзимизнинг муносиб ўрнимизни эгаллаганимиздан ҳақли равишда ифтихор қиламиз. Барчамиз миллий тараққиёт манфаатларини бутун вужудимиз, онг-шууримиз билан ҳимоя қилишга, ёмон кўзлардан, ғаразли ниятлардан асраб-авайлашга даъват этилганмиз. Бу даъват қалбимизда, имон-эътиқодимизда акс-садо беради, шу азиз Ватанга, шу мусаффо осмонга, киндик қонимиз тўкилган муқаддас тупроққа дахлдорлигимиздан қувват оламиз. Келажакка ишончимиз янада ортади. Кейинги йилларда мамлакатимизда юз бераётган оламшумул ўзгаришларни жаҳон ҳамжамияти, мутахассис-экспертлар жиддий кузатиб турибди. Йиллар ўтиб бормоқда, ортимиздан муносиб ўринбосарлар келмоқда. Бугун олий ўқув юртларига, Президент мактабларига имтиҳон топшираётган ёшларни кўриб, дилинг яйрайди. Мамлакатимизда “ижод” мактаблари, “Темурбеклар” мактаблари, Бухорода халқаро математика мактабининг ташкил этилгани ўзбек фарзандлари учун ҳам оламшумул қулайлик. Мустақил фикрига, қатъий ҳаётий позицияга эга бўлган, замонавий билимларни чуқур эгаллашга азму қарор қилган ёшларимизни тўғри йўлдан чалғитиб бўлмайди. Халқаро фан олимпиадаларида фарзандларимиз қўлга киритаётган шода-шода медаллар Истиқлол бизга мана шундай буюк маънавий бойликни ато этганидан далолат беради. Бу бойлик эрта индин янги-янги Навоий, Бухорий, Термизий, Ибн Сино, Хоразмий, Ҳабиб Абдуллаев, Эркин Воҳидов, Абдулла Орипов, Озод Шарафиддинов бўлиб майдонга чиқади. Бутун мамлакат катта қурилиш, бунёдкорлик майдонига айланди. Жаҳон давлатлари тарихида камдан-кам учрайдиган ҳодиса – ёш оилаларни, ногирон ва боқувчисиз қолганларни уй-жой билан таъминлаш сиёсати кўпчиликнинг ҳайратига сабаб бўлмоқда. Банклар ёш тадбиркорларни қўллаб-қувватламоқда. Бўш ётган иморатлар, фойдаланилмаётган ерлар ўз эгаларини топаётир. Чин дилдан қилинган меҳнат ҳисобига келган даромад одамларнинг турмуш тарзини ижобий маънода ўзгартирмоқда. Хорижий кузатувчилар Президент Шавкат Мирзиёевнинг янги сиёсати нафақат Ўзбекистонга, балки бутун Марказий Осиёга яхши маънода таъсир кўрсатаётганини таъкидламоқда. Чиндан ҳам, одамлар ўз меҳнатлари самараларидан баҳраманд бўлиш имкониятига эга бўлди. Жамият аъзоларининг, айниқса, ёшлар, хотин-қизларнинг ҳуқуқий онги ва маданияти ўсди. Ёшларда жамият ҳаётида фаол иштирок этиш, ижтимоий фаоллик, мамлакат, миллат тақдири учун кураш туйғуси, ватанпарварлик ҳисси кучайди. Яқиндагина миллий тараққиётга эришишнинг самарали йўлларини ахтараётган, жамият ҳаётини, иқтисодиётни, ҳуқуқ-тартибот тизимини, маданий-маърифий, таълим-тарбия соҳаларини янгилаётган мамлакатнинг қисқа муддат ичида жаҳон ҳамжамиятининг муносиб аъзосига айланишини, тараққий топган дунё давлатлари билан бўйлашишини, онгу шууримизда, турмуш тарзимизда шу қадар катта ўзгаришлар юз беришини, мамлакатнинг бугунги гўзал қиёфасини, ўғил-қизларимизнинг жаҳон майдонларида эришаётган оламшумул ғалабаларини ҳаммамиз ҳам тўла тасаввур қила олмаганмиз. Орзу-умидларимизнинг рўёбга чиқиши учун жуда кўп йиллар зарур бўлади, деб ўйлаганмиз. Не бахтки, бугун бу улуғ ғалабаларнинг барчасига гувоҳ бўлиб турибмиз, янгиланиш жараёнларида фаол иштирок этмоқдамиз. Мазмун-моҳияти ва амалий натижаларига кўра йиллар-йилларга уланиб бормоқда. Қатрада қуёш акс этади, деганларидек, кейинги икки ярим йил ичида ҳаётимизда юз берган улкан ўзгаришлар Ўзбекистонда янада баланд чўққиларни эгаллаш учун зарур бўлган илмий-техникавий, ижтимоий-сиёсий, маданий-маърифий потенциаллар мавжуд эканидан далолат беради. Бу шиддат асло сўнмайди. Шу заминда туғилиб ўсган, шу ватанни ватан деб, шу юртни юртим деб яшаётган юртдошларимизнинг бир қисми неча йиллар қалбида оғир бир дард билан яшади. Бу дард “фуқаросизлик” дарди эди. Давлатимиз раҳбари уларнинг ҳам қалбига йўл, дардига малҳам топди. Бугунги кунда Ўзбекистондек жаннатмонанд юртнинг фуқароси деган шарафли номга муяссар бўлиш дарди билан эзилиб ётган юракларни дард эмас, муҳаббат, Ватанга муҳаббат, унинг адолатпарвар раҳбарига бўлган муҳаббат эгаллади. Президентимиз ташаббуси билан олға сурилган муҳим ижтимоий-маънавий ташаббуслар, “Обод қишлоқ”, “Обод маҳалла”, “Ҳар бир оила – тадбиркор” дастурлари, мамлакатда энг яхши инвестицион муҳитни яратиш, туризм саноатини ривожлантириш, тадбиркорлик ҳаракатининг янада кенг қулоч ёйиши учун имкониятлар яратиш, бу билан жамиятда шаклланаётган янги мулкдорлар синфини мустаҳкамлаш, ҳар бир кишининг ўз истеъдодини тўла намоён этишига эришиш ҳаётимизни янада шукуҳли қилиши муқаррар. Бунга жиддий асослар мавжуд. Бугун мамлакатимизни 2035 йилгача ривожлантиришнинг стратегик режаси ишлаб чиқилмоқда. Очиғини айтсам, давлатимиз раҳбарининг ғайрат-шижоатига қараб, буюк бобомиз Алишер Навоийнинг мисралари ёдимга келаверади: Одами эрсанг демагил одамий, Ониким, йўқ халқ ғамидин ғами. Халқнинг ғамини еб, ташвишларини енгиллаштириш учун давлатимиз раҳбари “Биз катта марра олдик. Халқимиз олдида улкан масъулият бу. Одамлар катта ишонч билдиряпти. Буни оқлаш учун ҳалол-пок, садоқат билан меҳнат қилишимиз керак”, деб маҳаллама-маҳалла, уйма-уй юрибди. Бу айтишга осон. Ҳа, Президентимиз саъй-ҳаракатлари билан халқнинг қалбига йўл солди. Ва бу йўл оддий йўл эмас, меҳр ришталари билан боғланган кўнгил йўлидир. Кўнгил обод бўлса, юрт ҳам обод бўлади. Абдукамол РАҲМОНОВ, Ўзбекистон Ёзувчилар уюшмаси аъзоси ...

Батафсил
News

Акмал Бурхонов: “Овозимизнинг янада баланд чиқиши учун жамоатчилик фикри ва ишончи муҳим”

Cўнгги пайтларда юртимизда жамоат ташкилотларининг сони, фаоллиги ортиб бораётганини эътироф этиш жоиз. Хусусан, жорий йил 17 январь куни давлатимиз раҳбарининг ташаббуси билан нодавлат нотижорат жамоатчилик ташкилоти яна биттага кўпайди — “Юксалиш” умуммилий ҳаракати ташкил этилди. Ушбу ташкилотнинг ишлаш доираси кенг, фаолияти жуда муҳим. Хоҳ жамоатчилик, хоҳ қонунчилик ташкилоти бўлсин, юртимизда кечаётган ислоҳотларни кенг оммага етказиш, тушунтириш, экспертлик муҳокамаларида қатнашиш, шу орқали одамларга ёрдам бериш бош мақсаддир. Қуйида мазкур ташкилот раҳбари, Олий Мажлис Қонунчилик палатаси депутати Акмал Бурҳонов билан мухбиримизнинг суҳбати эълон қилинмоқда. — Акмал ака, Сизни “Тараққиёт стратегияси” марказининг фаол раҳбари сифатида билардик. Эндиликда янги ташкил этилган “Юксалиш” умуммиллий ҳаракати етакчисисиз. Ҳаракатнинг бугуни ва эртаси, асосий фаолият режалари ҳақида тўхталсангиз... — Хабарингиз бор, ушбу умуммиллий ҳаракат Юртбошимизнинг 2019 йил 17 январдаги фармонига асосан ташкил этилди. Фармонда белгилаб берилганидек, “Юксалиш” умуммиллий ҳаракати, давлатимизда рўй бераётган воқеа-ҳодисаларга, эълон қилинаётган қонун ва қарорларга, энг асосийси, тараққиёт стратегияси бўйича амалга оширилаётган ислоҳотлар йўлида халқнинг барча қатламини бирлаштиришдан иборат. Ҳаракатнинг аудиторияси чекланмаган, яъни ким қайси соҳада ва қайси лавозимда бўлишидан қатъи назар ташкилотимиз билан боғланиб, қонунлар бўйича ўз таклифларини киритиши мумкин. Шунингдек, хориждаги ҳамюртларимиз ҳам ўз таклиф-мулоҳазаларини, муаммоларини бемалол айтиш имконига эга. — Демак, “Юксалиш”нинг энг устувор вазифаси бу... тарғибот-ташвиқот ишлари экан-да? — Энг асосий мақсадимиз — ислоҳотлардан барчани бирдек хабардор қилиш. Чеккароқ ҳудудлардаги аҳолига етказиш, қизиқиш уйғотиш ва уларни ҳаракатга келтириш. Шу билан бирга, уларнинг таклифини, муаммоларини эшитадиган ва муҳокама қиладиган майдонни яратиб бериш. Шу орқали одамларнинг давлатга ишончини мустаҳкамлаш. Маълумот учун қуйидагиларга эътибор қилинг. Давлат дастурлари лойиҳалари қабул қилинаётганда фуқаролардан 2017 йилда 1300, 2018 йилда 4000га яқин, жорий йилда эса 4200дан ортиқ таклиф келиб тушган. Бу рақамлар бутун Ўзбекистон аҳолиси сонидан анчагина паст ва таклифларнинг аксари ижтимоий тармоқлар орқали келган. Мақсадимиз қишлоқ ва маҳалла аҳолисига давлат дастури лойиҳаларини етказиб, уларнинг таклифини маҳаллий, халқ депутатлари кенгашлари ёрдамида республика даражасида ҳал қилиб беришдан иборат. Яъни, устувор йўналишларимиз билан фуқароларимизда дахлдорлик ҳиссини уйғотиш бизнинг асосий вазифамизга киради. Бу борада биз кўп ташкилотларни ҳамкорликка чорлаганмиз. Давлат идоралари олиб чиққан мавзуларни жамоатчилик эътиборини жалб қилиш билан қўллаб-қувватлаймиз. Гоҳида ҳудудларда қонун доирасидаги ишлар амалга оширилмагани ҳақидаги хабарлар ҳам келиб туради. Биз мана шундай вазиятларда тизимни мониторингдан ўтказамиз. Шикоятларни тегишли ҳокимлик ва вазирликларга жўнатамиз. Таҳлил қилиш ва содда тилда аҳолига етказиш, албатта, осон иш эмас. Қолаверса, жамоатчилик назорати деган тушунча тўлалигича шаклланмаган. Фуқаролик жамияти институтларида жамоатчилик фикрини ўрганиш энди-энди шаклланиб келмоқда. Фаолият доирасида кўряпмизки, бу борада ҳал этилиши керак бўлган муаммолар кўп. Қонун ва қарорлар қабул қилиниб, ОАВ орқали аҳоли эътиборига ҳавола этилганда, халқнинг “ҳазм” қилиши бирмунча қийин кечмоқда. Шу боис ҳам қонунларимизни содда тилда халққа етказишимиз керак. Бугунги кунда халқимиз “Mening fikrim”, “regulation” каби порталлар орқали ўз фикрини билдириши ва ҳатто ўринли таклиф бўлса, уларни ўзгартириш имкониятига эга. Афсуски, бундан фойдаланувчилар кам. Хоҳлардимки, Ўзбекистоннинг ҳар бир фуқароси давлатимиз қонунларини яхши билса ва ўзгартириш киритилаётганда ўз таклифини бериб, фаол фуқаролик позициясида турса, нур устига аъло нур бўлар эди. — “Юксалиш” умуммиллий ҳаракати ташкил этилганига ҳали бир йил ҳам тўлмади, шу қисқа муддат ичида қанча аҳолини ўз иш услуби билан таништиришга улгурди, аҳолидан қанча мурожаатлар келиб тушди? — Ҳа, иш бошлаганимизга эндигина 8 ой бўлди. Шундан 2-3 ойини вилоят ва туманларда ташкилий бўлимларимизни очишга сарфладик. Ниятимиз, чекка вилоятлардаги аҳоли қатлами ҳам ташкилотимиз фаолиятидан бехабар қолиб кетмасин. Кейинги босқичда нодавлат-нотижорат ташкилотлари билан самарали ҳамкорликни йўлга қўйиш борасида музокаралар олиб бордик. Умуман олганда, шу қисқа вақт давомида кўплаб ташкилотлар, жамоатчилик билан ишлашда платформалар яратишга улгурдик. Қолаверса, сир эмаски, нодавлат-нотижорат ташкилотларига давлат бюджетидан маблағ ажратилмайди, ўзини ўзи молиялаштиради. Мана шундай ташкилотлар учун Ҳаракатимиз қошида “Ковертинг маркази”ни ишга туширдик. Уларни зарур техника воситалари билан таъминлаб, жойлашган манзилидаги ижара пулларинитўлаб бердик. Ўтган вақт давомида республикадаги барча ҳудудларга шахсан ўзим бордим, аҳоли билан учрашдим. Уларни қийнаётган муаммоларни ўргандим. Учрашувларда “Юксалиш” умуммиллий ҳаракатининг 4 та устувор йўналишини таништиришга ҳаракат қилдик. Яъни, булар — Фуқароларни қонунчиликда бўлаётган ислоҳотлар билан таништириш; қонун лойиҳалари жамоатчилик муҳокамасига қўйилганда, таклифлари билан иштирок этишни амалга ошириш; тадқиқот ва сўровномалар ўтказиш; жамоатчилик назоратини самарали механизмини йўлга қўйиш. Жамоатчилик ташкилотлари, жумладан, Хотин-қизлар қўмитаси, Маънавият ва маърифат маркази ва Омбудсман билан ҳамкорлик лойиҳаларимизни кенгайтиряпмиз. Фаолиятимиз йўналишларида нафақат озодликдаги, балки қамоқхоналардаги фуқаролар билан ишлашни ҳам қамраб олиш кўзда тутилган. Тадбирларимизда шу пайтгача 5000 дан ошиқ аҳоли иштирок этди. — Ўтган ой юртимиз ижтимоий-сиёсий ҳаётида “снос”, яъни аҳолининг уй-жойлари ва тадбиркорларнинг турли бино ва иншоотларининг бузилишига доир можаро давлат сиёсати даражасига кўтарилди. Ҳодисага интернет сайтлари орқали муносабат билдириб, ўз таклифларингиз билан ўртоқлашгандингиз. Бу борада Ҳаракат номидан амалда қандай ишлар амалга оширилди? — Қушнинг ҳам уйи бузилмасин, деган нақл бор ва бу бежизга айтилмаган. Мавзу шу даражада долзарбки, ҳатто муҳтарам Юртбошимиз аралашуви даражасига етди. Стратегиямиздан келиб чиқиб, ўз таклифларимизни аҳолига билдирдик. Интернет сайтлари ва ижтимоий тармоқлар орқали халқимизга мурожаат қилиб, кимнинг уйи бузилиш хавфида бўлса, телеграмда очилган махсус бот орқали мурожаат қилишларини сўрадик. Шу пайтгача аҳолидан юзлаб мурожаатлар келиб тушди. Ҳудудлардаги бўлинмаларимиз раҳбарлари ана шу мурожаатлар изидан тушиб, муаммоли ҳолатлар бўлса, тегишли идоралар билан бартараф этмоқда. — “Юксалиш” умуммиллий ҳаракати фаолияти ташкилот сифатида айтайлик, “Ўзбекистон Ёшлар иттифоқи”дан нимаси билан фарқ қилади? — Маълумки, “Ўзбекистон Ёшлар иттифоқи” ёшлар соҳасига оид давлат сиёсатини турли хил дастурлари асосида амалга оширади. Бизнинг ташкилотимиз эса бутун жамият қатламини қамраб олади ва қонунларни жамоатчиликка яқиндан танитишда, фикр бериш ва олишда хизмат қилади. Биз ёшлар билан индивидуал тарзда шуғулланмаймиз, шахсий ва ижтимоий муаммоларини ҳал этмаймиз. — Хабаримиз бор, жамоатчиликни “бир манзилда” йиғиш мақсадида жамоатчилик онлайн платформаси ишга туширилди. Дастлабки натижалар қандай? — Жамоатчилик онлайн платформаси шу яқин кунларда ишга тушди. Қисқа муддат ичида фуқароларимиздан 400 дан зиёд мурожаат келиб тушди. Келган муаммо ва таклифларни йиғиб, Президент администрациясига топширдик. Администрациямурожаатларни тегишли вазирлик ва идораларга жўнатади. Вазирликлар таклифларни ўрганиб чиқиб, ўз муносабатини билдирса, бундан кейин тизимни янада ривожлантириш ниятимиз бор. Келинг, жамоатчилик онлайн платформаси ҳақида кенгроқ маълумот беришга ҳаракат қиламан. Платформа айни пайт­да икки йўналишда ишламоқда. Илк мақсад фуқароларимизнинг бугунги кундаги давлатимизда олиб бораётган ислоҳотларга дахлдорлик туйғусини ҳис қилиб, қонунларга бўлган муносабатини оширишдан иборат. Кейингиси жамиятда рўй бераётган воқеа-ҳодисаларга бўлган муносабатни қисқа вақт ичида етказишдир. — 400 дан зиёд таклиф ва шикоятлар тушди дедингиз, сир бўлмаса, таклифларнинг асосий мавзуси нималардан иборат? — Яширмайман, аксарияти шикоятлардан иборат. Суд-ҳуқуқ, таълим, соғлиқни сақлаш ҳамда фуқаролик ишларидан ва шу пайтгача энг кўп муҳокамаларга сабаб бўлган Тошкент пропискаси бўйича йиғилган. Таълим соҳасидаги камчиликлардан бири сифатида контракт миқдорининг юқорилигини айтишган бўлса, соғлиқни сақлаш тизимида хизматнинг сифат даражаси паст­лигидан арз қилишган. Фуқаролик ишлари бўйича ечилиши шарт бўлган муаммо — Тошкент пропискасига ўтиш тартибини соддалаштириш ҳақида таклиф берилган. Президент Администрацияси биз тақдим этган мурожаатларни тегишли вазирликларга етказишда ёрдам берса, вазирлик ва идоралар оператив тарзда муносабат билдирса, буларнинг бари халқнинг давлат идораларига бўлган муносабати ўзгаришига хизмат қилади, албатта. — Хориждаги фаол, илмли ёшларимиз билан ҳамкорлик ҳақида ҳам тўхталсангиз? — Йўналишимизда хорижда таҳсил олган ва у ерда ишлаётган ватандошларимизни бирлаштириш ҳам бор. “Буюк келажак” нодавлат нотижорат ташкилоти бу борада биз билан ҳамкорлик қилмоқда. Йил бошидан бери ўндан ортиқ давлатда бўлган бўлсак, у ерда юртдошларимизнинг ўй-фикрлари, ташвишлари ҳақида суҳбатлашдик. Мурожаатлардан кўрамизки, уларни кўпроқ консулликка дахлдор масалалар қийнайди. Хориждаги Бутунжаҳон ёшлар федерацияси ташкилотидаги 300 дан ортиқ мутахассис билан ёшлар учун турли лойиҳаларни ҳамкорликда ишлаб чиқяпмиз. — Сиз докторантурани Японияда ўқиб келдингиз ва фаолиятингизда япон ҳамкасбларингизнинг қайси иш услубини киритишни истардингиз... — Депутат бўлганимдан бери қонунчилигимизда Япония қонунчилигининг ижобий томонларини ўзимизда қўллашга ҳаракат қиламан. Халқининг давлат идораларига, ерига бўлган муносабатини юқори баҳолайман. Масалан японлар ёз фаслида энергияни тежаб ишлатади. Табиатини асраш бўйича амалга ошираётган ишлари ҳам таҳсинга лойиқ. Япон халқининг меҳнаткашлиги, янгиликка ўчлиги ҳаммага маълум. Юртимизда японларнинг айтайлик, айрим иш услубларини ҳаётимизга татбиқ этсак, табиий ресурсларимизга улардек муносабатда бўлсак, ишонаманки, она диёримиз янада ривожланади. —Маълумки, бу йил мамлакатимизда Олий Мажлис Қонунчилик палатаси ва маҳаллий кенгашларга сайловлар бўлиб ўтади. Сир бўлмаса керак, сиз Олий Мажлисга қайси ҳудуддан депутат бўлиб сайланган эдингиз? Ғалаба қозонган сайлов округида нечта номзод бўлган, қандай фарқ билан овоз тўплагансиз? — Асли Наманган вилоятиданман. Тўрақўрғон туманидаги 44-сайлов округидан 2014 йилда номзодимни қўйиб, биринчи натижадаёқ ғолиб бўлганман. Бу, албатта, осон кечмаган. Сабаби, 6 йил Японияда ўқиб келиб, пойтахтимизда ишлаётгандим. Наманган вилоятини ҳудудини яхшилаш бўйича амалга оширмоқчи бўлган таклифларим, қолаверса, мақсадли ғояларим билан халқнинг ишончини оқлаган эканман, сайловчилар 4 номзод ичидан мени сайлашган. Мени танлашганига тўхталадиган бўлсак, номзодимни қўйгунга қадар 50 дан ортиқ мамлакатда бўлиб, тажрибасини ўрганган эдим. Хорижда тўплаган тажрибаларимдан мисоллар келтириб, аҳолини ишонтира олганман. Қолаверса, касбим юрист. Бу ҳам сайловчиларни ишонтиришда бир восита бўлган бўлса керак. —Ўзбекистоннинг маданий бойликлари 2021 йилда Франциянинг Лувр миллий музейида бўлиб ўтадиган кўргазмада намойиш этилиши кўзда тутилган эди. Бу ишларни мувофиқлаштириш тегишли вазирлик ва идоралар билан бир қаторда “Юксалиш”гаҳам юкланган деб эшитгандик. Айни пайтда тайёргарлик ишлари қандай кетяпти ва унда нималар намойиш этилади? — Бу кўргазмани ўтказиш бизнинг зиммамизга юклатилмаган. Япониялик ҳамкорларимиз билан суҳбатлашганимизда Илмий технология агентлигининг президенти, профессор Ҳаму Гучи Мучинари юртимизда бўлаётган ислоҳотларни кўздан кечириб, маданий ва моддий меросларимизга ҳавас қилган ҳолда 2021 йилда Франциянинг Лувр музейида бўладиган фестивалда, истасак экспонатларимиздан 3D версиясини тайёрлаб беришини ва Ўзбекистон ҳам Халқаро ҳамжамиятда ўз мақомини янада яхшилаш учун ҳисса қўшишга тайёр эканини билдирганди. —Узр, кўнглингизга олмангу, барибир “Юксалиш” умуммиллий ҳаракатининг “овози” бугунги давр талаби даражасида чиқмаётганга ўхшайди. Ё бундай эмасми? — Ҳаракатимизнинг овози янада баланд чиқиши учун жамоатчиликнинг қўллаб-қувватлаши, фикри ва ишончи муҳим. Энг асосийси, фаолиятимиз учун зарур бўлган платформани ишга туширдик. Қолаверса, юқорида таъкидлаганимдек ташкил топганимизга ҳали кўп бўлмади, кенг кўламли ишларимиз, мақсадларимиз сари илдамлик билан одимлаяпмиз. Янги ташкилотнинг такомиллашишига, албатта, вақт керак, йиллар керак. Биз эса имкон қадар зиммамизга юклатилган вазифаларни тезкорлик билан амалга ошириш, давр талабида ишлашга ҳаракат қиляпмиз. —Суҳбатингиз учун раҳмат! —Сизга ҳам раҳмат! Феруза РАҲИМОВА Суҳбатлашди   “Hurriyat” газетасининг бугун — 14 август сонидан олинди ...

Батафсил
News

Менда таклиф бор: Мактаб дарсликлари ҳажми ихчамлаштирилса

Эрталабдан мактаб томон ошиқаётган ўқувчиларни кузатсангиз, елкаларига тақиб олган мактаб сумкалари зил-замбилдек оғир эканлигини пайқайсиз. Айниқса, бошланғич синф ёшидаги ўқувчиларнинг юқори синф ўқувчилариникидан кўра мактаб сумкалари оғирроқ бўлади. Айни умуртқа поғонаси шаклланаётган болаларнинг бундай ҳолатга учрашига сабаб нима? Аввало муаммо шундаки, мактаб дарсликлари катта ҳажмда ёки ўта оғир қилиб чоп этилмоқда. Бир куни эрталаб мактабга шошаётган ўғлимнинг сумкасини кўриб: “Ичига тош солиб олганмисан, намунча оғир?”, - дедим. Шунда ўғлим: - “Бугун беш соат дарсимиз бор. У дарсларга мана шу китоблар керак”, - деди. (“Алифбе”, “Мусиқа”, “Инглиз тили”, “Математика”, “Атрофимиздаги олам” ва ҳ.к). Ўсиш ёшида бўлган болаларнинг бу каби оғир дарсликлар билан лиқ тўлган сумкаларни кўтариб олиши уларнинг ўсишига, жисмонан шаклланишига ҳалал беради. Бу борада мактаб сумкаларининг ўқувчиларга оғирлик қилмайдиган янгича турини яратиш ёки дарсликлар ҳажмини ихчамлаштириш орқали муаммони ҳал қилиш мумкин. Шунингдек, мактаб дастурига киритилган дарсликлар сони шу қадар кўпки, ўқувчи уларнинг қай бирини ўзлаштирсам экан, деб қийналади. Шу боис бу тизимда янгича ёндашув асосида ишлар олиб бориб, ўқувчиларни маълум бир йўналишга қараб кетадиган билимлар эгаллашига, сонига эмас, сифатига аҳамият қаратилса тўғрироқ бўларди, менимча. Мен ушбу таклифларни ўртага ташлар эканман, эртамиз эгалари бўлган фарзандларимизнинг ҳар томонлама баркамол бўлиб вояга етишишларида юқоридаги муаммоларнинг олди олиниши зарур деб ҳисоблайман. Мархабо ДАВЛАТОВА, партия фаоли Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Менда таклиф бор: Дарсликлар бепул берилса...

Кейинги йилларда мамлакатимизда баркамол авлодни тарбиялаш масаласига катта эътибор қаратилмоқда. Айниқса, таълим соҳасида чуқур ислоҳотлар ўтказилаётгани кенг жамоатчиликка маъқул тушмоқда. Буларнинг ҳаммаси келажакда ўзининг ижобий самарасини беради, албатта. Шу билан бирга ўқувчиларнинг таълим олишга қизиқишини оширишга, уларнинг ота-оналарига енгиллик яратиш мақсадида мактабларда дарсликларни бепул тарқатиш йўлга қўйилишини истардик. Тўғри, ҳозир болалар китоблардан ижара асосида фойдаланадилар. Ижара – ижара-да, ўқувчи дарсликни ўзиники деб ҳисоблай олмайди. Боз устига сўнгги қўнғироқ янграши билан уни мактабга қайтариб топшириш керак. Ўзиники бўлса, ёзги таътилда ўтилган дарсларни қайта-қайта такрорлаб олиш ҳам мумкин. Беҳзод СИДДИҚОВ. Ўзбекистон “Адолат” СДП Наманган вилоят Кенгашининг туманлараро ижрочи котиби ...

Батафсил
News

Менда таклиф бор: Тиббиёт тизимига кодекс зарур

Маълумки, сўнгги йилларда тиббиёт соҳасида олиб борилаётган ислоҳотлар асосида сезиларли янгиланишлар бўляпти. Бироқ, шунга қарамай тизимда ҳали қилиниши лозим бўлган ишлар талайгина. Шу мақсадда соғлиқни сақлаш тизимида фаолият юритаётган шифокор-ходимларнинг ҳуқуқ ва манафаатларини таъминлаш, уларни фуқаролар тазйиқларидан ҳимоя қилиш ҳамда ижтимоий қўллаб-қувватлашни ўзида жамлаган кодекс яратиш таклифини бераман. Сўнгги пайтларда шифохоналарда, тез тиббий ёрдам шифокорларига одамлар томонидан ножоиз муомала, қалтис хатти-ҳаракатлар содир этилаётгани тез-тез қулоққа чалиниб турибди. Бу каби салбий ҳолатлар шифокорларни нафақат ҳуқуқларини ерга уриш, балки беморга тез тиббий ёрдам кўрсатилишига ҳам тўсқинлик қилади. Агар тиббиёт тизимида ана шундай кодекс қабул қилинса, шифокорларга фуқаролар томонидан ўтказилаётган тажовузларнинг олди олиниб, уларнинг хавфсизлиги таъминланган бўлар эди. Натижада аҳолига тиббий хизмат кўрсатишнинг сифати янада ошишига, уларнинг ҳуқуқ ва бурчларини кафолатлашга эришиларди. Бу эса соғлиқни сақлаш оламида яна бир муҳим янгиликка замин яратади.       Бехзод АБДУХОЛИҚОВ, Ўзбекистон “Адолат” СДП Учтепа туман Кенгаши раиси   Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP   ...

Батафсил
News

Номзодни ҳоким эмас, сиёсий партия танлайди

Сайлов ҳар бир сиёсий партияни халқ синовидан ўтказади. 2019 йилнинг декабрь ойида Олий Мажлис Қонунчилик палатаси ва халқ депутатлари маҳаллий Кенгашларига бўлиб ўтадиган сайловларга Ўзбекистон “Адолат” СДП тизимида ҳам пухта ҳозирлик кўрилмоқда. Ҳаёт шуни кўрсатадики, ижтимоий муносабатлар ҳар қандай демократик давлатда ҳам бир хил бўлмайди. Буни юртимизда мавжуд сиёсий партиялар фаолиятига муносабатларда ҳам кўриш мумкин. Демократиянинг асосий таомили ҳам ана шу хилма-хилликка йўл очишда, яъни ҳар бир фуқаро жамият ҳақида ўз фикрини маданий тарзда айта олиши даркор. Ҳукуматнинг вазифаси эса ана шу фикр-мулоҳазаларни ҳисобга олиб, ўз ислоҳотлари стратегиясини белгилашга қаратилади. Чунки таклифи инобатга олинган фуқаро уни рўёбга чиқаришда ҳам фаоллик кўрсатади. Тан олиш керакки, жамиятимизда сиёсий партиялар фаолияти ҳақида кўпроқ танқидий фикрлар сақланиб қолмоқда. Айни кунларда мамлакатамиз оммавий ахборот воситалари, шу жумладан, ижтимоий тармоқларда сиёсий партиялар фаолияти ҳақида кўплаб таҳлилий, танқидий чиқишлар сезиларли даражада ўрин олмоқда. Яқинда телеграм каналида “Бўлажак депутатлик сайловлари масаласида” мавзусидаги мақолани ўқиб қолдим. Очиғини айтганда, мақолада акс этган фикр-мулоҳазалар бирор мантиққа тўғри келмайди. Жумладан, ушбу мақоладаги “5 та сиёсий партиянинг ҳаммаси норасмий ҳокимликларга бўйсуниб, ҳокимнинг айтганини қилиб ишлайди”, “Ҳозир сайловларга номзодларни ҳокимият назоратидаги ОРГ отдел кўриб чиқмоқда” деган асоссиз фикрлар қонунчиликдан ҳам, амалиётдан ҳам йироқдир. Албатта, аввалги сайловларда, ҳокимлар халқ депутатлари Кенгаши раиси бўлган пайтда балки депутатликка номзодлар билан танишиб чиққан бўлиши мумкин. Буни инкор қилмайман. Лекин “номзодларни ўзи танлаб берган” деган фикрга умуман қўшилмайман.  “Сиёсий партиялар тўғрисида”ги қонуннинг 12-моддасида Ўзбекистон Республикаси Президенти, давлат ҳокимияти органлари (халқ депутатлари вилоят, туман ва шаҳар Кенгаши) сайловларида иштирок этиш ҳуқуқи кўрсатиб ўтилган. Мазкур сайловларда сиёсий партиялар фаол қатнашиб келишмоқда. Ҳурматли блогерлар, танқид қилишдан олдин сайлов қонунчилиги билан танишиб, қизиқсангиз ҳар куни сиёсий партиялар расмий сайтига ташриф буюринг. Шу кунларда, партиялар қандай долзарб масалалар олиб чиқаётганлигини кўриб, кейин танқид қилишни ўйлаб кўришни тавсия қиламан. Сиёсий партиялар ўз кўрсатаётган номзоднинг билим савияси ва дунёқараши юқори бўлиши билан бирга сайловчилар уларни яхши билишини ҳам муҳим аҳамиятга эга деб ҳисоблайди. Биргина мисол. Қонунчилик палатасидаги 150 депутатлик ўрнига Ўзбекистон “Адолат” социал-демократик партияси депутатликка 1500 дан ортиқ номзодлар захирасини шакллантирди ва ушбу жараён ҳамон давом этмоқда. Номзодлар захирасини шакллантиришда бошланғич партия ташкилотларининг фидойи аъзолари, маҳаллий Кенгашларда фаоллиги билан ажралиб турган депутатлар ҳамда партия экспертларига асосий эътибор қаратилмоқда. Бу борада сиёсий партияга вилоят, шаҳар, туманлар ҳокимлари бирор кўрсатма бераётгани йўқ, бунга улар аралашишга ҳақли ҳам эмас. Барча номзодлар ҳокимлар танлови ёки қарори асосида эмас, балки сиёсий партияларнинг 5 йилда бир маротаба чақириладиган олий органи (Съезд ёки Қурултой)да сайловда иштирок этиш учун номзод сифатида кўрсатилади. Бунга мутлақо ҳокимларнинг алоқаси йўқ. Илҳом ЖЎРАЕВ, Ўзбекистон “Адолат” СДП Марказий аппарати сектор мудири Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Менда таклиф бор: Сифатсиз маҳсулотлар рекламасига чек қўйиш лозим

Мен анча пайтдан буён оммавий ахборот воситаларини кузатиб бораман. Айниқса, тижорат йўналишидаги рекламалар менга маъқул бўлмаётир. Масалан, ёшларнинг онгига салбий таъсир этувчи рекламаларни чеклаш лозим. Бундан ташқари, инсон организмига салбий таъсир этувчи маҳсулотлар ҳам кўп тарғибот қилиняпти. Таклифим, телевидение мутасаддилари ҳар қандай нарсани реклама қилишдан аввал, унинг сифати ҳақидаги маълумотни олишлари керак. Оммавий ахборот воситаларида халққа тавсия этилаётган маҳсулот сифати ҳақида тегишли лаборатория кўригидан ўтган бўлиши шарт. Таклифим, оммавий ахборот воситаларида фаолият олиб бораётган реклама тижорат бўлимларига товарни реклама қилишдан аввал турли соҳа мутахассисларини жалб этган ҳолда уларнинг хулосасини олиш керак. Ҳар қандай реклама қилинаётган маҳсулот кимёвий  қўшимчалардан холи бўлиши лозим. Республикамиздаги барча телевидение рекламаларида  гўшт, айниқса, колбаса маҳсулотларини жуда кўп тарғибот қилишаяпти. Аммо унинг таркибидаги турли кимёвий воситалар инсон организми учун зарар-ку. Шунингдек, пепси, кока-кола, фанта, Sitro, WF ва шу кабилар ҳам инсон организми учун фойдали эмас. Ушбу кимёвий қўшимчалар асосида тайёрланган ичимликлар баҳонасида турли ютуқли ўйинлар оммалашиб кетаётгани ачинарлидир. Тўлқин ХИДИРОВ, Ўзбекистон “Адолат” СДП Миришкор туман Кенгаши раиси Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Менда таклиф бор: Афсуски, дастурдан кўнглим тўлмади...

Партиямизнинг сайловолди дастури лойиҳаси муҳокамасида иштирок этар эканман, ундан кўнглим тўлмади. Кўпгина масалаларга юзаки ёндашиб кетилган. Ахир сиёсий дастур шунчаки қоғоз саҳифаларни тўлдириш учун эмас, кўп сонли электорати, аҳоли манфаатларини ҳимоя қилиш учун  ишлаб чиқилади. Фикримча, асосий электорати ижтимоий соҳа вакиллари бўлган партия бу борадаги масалаларга чуқурроқ эътибор қаратиши лозим. Энг аввало, ҳозирда тизимда жорий этилган истеъмол саватини қайта кўриб чиқиш зарур, буларни ҳисоблашда аҳолини кам таминланган қатлами бор эканлигини ҳам унутмаслик лозим. Таълим тизимини ислоҳ қилиш, бунда уйда ёлғиз таълим олувчи ўқувчи ёшлар билан ишлаш механизмини яратишга ҳам эътибор зарур. Хорижда таълим олувчи ва ишловчи фуқароларнинг ҳуқуқларини ҳимоя қилиш мақсадида махсус дастурлар механизмини ишлаб чиқиш замон талабидир. Шунингдек, бозор иқтисодиётини ислоҳ қилиш, ёшлар билан ишлашда “Тенгдош - Тенгдошга” тамойили асосида ишлаш, олий таълим муассасаларида  ўқувчи алмашунувини йўлга қўйиш, хорижий олий таълим муассасалари билан шартномалар қилиш, ўқитувчи ва профессорлар малакаларини узлуксиз тарзда ошириб бориш, олий таълим муассасаларига қабул қилиш жараёнларида имтиёзларга эга бўлган ёшлар учун алоҳида қабул квоталарини ажратиш, партиянинг маҳаллий Кенгашларида ва қўйи бўғинларида фаол, нотиқ ёшларини саралаб олиб “Келажак депутати” гуруҳларини ташкил этиш, ҳамда ушбу гуруҳ аъзоларни партиядан сайланган депутатларга бириктириш, жараёнларга иштирокини таъминлаш, фаоллик кўрсатаётган ёшларни босқичма босқич тақдирлаб, рағбатлантириб бориш тизимини жорий этиш, “Келажак депутати” учун махсус логотип яратиш, энг муҳими эса, пул муомаласи сифатини ошириш, ўзбек сўмини жаҳон бозоридаги қадр ва қийматини юксалтириш борасида ҳам аниқ вазифа ва мақсадлар дастуримизда ўз аксини топишини хоҳлар эдим. Қурбонали УЛАШОВ, Ўзбекистон “Адолат” СДП Пастдарғом туман Кенгаши “Ёш истеъдод” клуби аъзоси Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил

ҲУДУДИЙ КЕНГАШЛАР

Map

АНДИЖОН Батафсил

НАМАНГАН Батафсил

ФАРГОНА Батафсил

Toshkent Shahri Батафсил

СИРДАРЁ Батафсил

ЖИЗЗАХ Батафсил

САМАРКАНД Батафсил

СУРХОНДАРЁ Батафсил

КАШКАДАРЁ Батафсил

НАВОИЙ Батафсил

БУХОРО ВИЛОЯТИ Батафсил

ХОРАЗМ Батафсил

Қорақалпоғистон Республикаси Батафсил

ТОШКЕНТ вил. Батафсил

ИНФОГРАФИКА

Инфографика


ПАРТИЯ ТУЗИЛМАЛАРИ



ДУНЁ ПАРЛАМЕНТЛАРИДА


Почему переименован проект закона?

Социнтерн, «Единая Россия», Справедливая Россия поздравили участников 18 съезда СДПК

Қирғизистон социал-демократлари мухолифатга ўтди


Видеогалерея


АЛОҚА

Манзилимиз: Тошкент шаҳри, Чилонзор тумани, Шарқ тонги кўчаси, 23-уй. Мўлжал: Озарбайжон Республикаси элчихонаси:

Телефон: 71-2730731 71-2884654 (139)

Электрон манзил: adolat.sdp@exat.uz

САЙТ ТЕСТ РЕЖИМИДА ИШЛАМОҚДА:

www.adolat.uz веб-сайти 2018 йилнинг 21 май куни электрон ОАВ сифатида давлат рўйхатидан ўтказилган. Гувоҳнома рақами: 1232. Муассис: Ўзбекистон Адолат СДП. Таҳририят манзили: 100043, Тошкент шаҳри, Чилонзор тумани, Шарқтонгги кўчаси, 23-уй. Электрон манзил: info@adolat.uz

Сайт материалларидан фойдаланилганда Фойдаланиш шартларига амал қилиниши шарт. Барча ҳуқуқлар Ўзбекистон Республикасининг оммавийахборот воситалари тўғрисидаги ҳамда муаллифлик ва турдош ҳуқуқлар тўғрисидаги қонун ҳужжатларида белгиланган тартибда ҳимояланган

#

Мурожаатингиз учун рахмат!