СУРХОНДАРЁ

Манзил: Термиз шаҳри, Ат-Термизий кўчаси, 19 а-уй

Телефон: (76) 223-34-67, 224-34-68

Электрон манзил: surxondaryo.adolat@mail.ru

Янгиликлар
News

Юксак марралар белгилаб олинди

Ўзбекистон Республикаси Президенти Шавкат Мирзиёев жорий йилнинг 13-14 июнь кунлари Қирғизистоннинг Бишкек шаҳрида бўлиб ўтган Шанхай ҳамкорлик ташкилоти Давлат раҳбарлари кенгашининг ўн тўққизинчи мажлисидаги иштироки мамлакатимиз учун муҳим воқеалардан бири бўлди. Унда Ўзбекистон Республикаси Президенти дунёдаги геосиёсий вазиятга баҳо берар экан, замонавий халқаро муносабатлар туб ўзгаришлар даврини бошдан кечираётган ҳозирги пайтда “Шанхай руҳи” тушунчаси қанчалик аҳамиятли эканига эътибор қаратди. Бинобарин, айнан ушбу ташкилотга асос солиниши халқаро муносабатлар тизимига “Шанхай руҳи”ни олиб кирди. Бугунги кунда ШҲТ кўп томонлама изчил ҳамкорликни қўллаб-қувватлаш орқали жаҳон иқтисодиёти тараққиётига ўз ҳиссасини қўшмоқда. Бишкек саммити – ШҲТ доирасидаги ҳамкорлик жараёнларида яна бир муҳим маррани забт этиш нуқтаси сифатида эътироф этилди. Бундай амалий мулоқотлар, Президентимиз Шавкат Мирзиёев қайд этганидек, “минтақамизда замонавий тараққиётнинг энг муҳим масалалари бўйича ёндашувларни мослаштиришга хизмат қилади”. Давлатимиз раҳбари ўз нутқида, шунингдек, бугунги кунда ШҲТга аъзо давлатлар учун, бир томондан, хавфсизликни таъминлашда келишилган сиёсатни юритиш, иккинчи томондан, давлатларимиз барқарор тараққиёти ва равнақи учун қулай шароитларни шакллантириш муҳим эканига тўхталди. Бўлиб ўтган саммитда Ўзбекистон Президентининг таклифи асосида Ҳудудлараро ҳамкорликни ривожлантириш дастури қабул қилинди. Шуни алоҳида таъкидлаш керакки, бугун ШҲТ ўз тараққиётининг янги босқичига қадам қўйди. Илк босқичда асосий эътибор чегара муаммоларини ҳал қилишга қаратилган бўлса, эндиликда ўзаро ҳамкорликнинг кўламлари ва миқёслари тубдан кенгайди. Бишкек саммитида ШҲТ доирасидаги амалий ҳамкорликни янада кенгайтириш истиқболлари ҳақида атрофлича сўз юритилганини таъкидлаш ўринлидир. Хусусан, Ўзбекистон Президенти “ШҲТни ривожлантириш концепцияси”ни ишлаб чиқиш ғоясини илгари сурди. Бунда, бешта устувор мезонга таянган ҳолда ШҲТ доирасидаги ўзаро манфаатли ҳамкорликнинг асосий йўналишларини белгилаб олиш мақсадга мувофиқ эканига эътибор қаратилди. ШҲТ доирасидаги ўзаро манфаатли ҳамкорликнинг биринчи мезони – иқтисодиёт. Бу ўринда аҳоли фаровонлигини ошириш, инсон капиталини ривожлантириш ва инновациялар соҳасидаги ҳамкорликни кенгайтиришга доир қўшма лойиҳаларни ҳаётга чуқур татбиқ этишдир. Бунинг натижасида мамлакатларимиз иқтисодиётларининг рақобатбардошлиги ошади. Аҳоли, авваламбор, ёшлар учун янада кўпроқ янги иш жойлари ташкил этиш мумкин бўлади. Айниқса, Президентимиз Марказий Осиё бундан кейин ҳам ШҲТнинг устувор йўналишларидан бири бўлиб қолиши зарурлигини таъкидлагани ғоят аҳамиятлидир. Чунки минтақамиз нисбатан барқарор, ишончли ва иқтисодий жиҳатдан мустаҳкам бўлиб бормоқда. Бу, ўз навбатида, кенг миқёсли ҳамкорликни ривожлантириш, муҳим минтақавий лойиҳаларни илгари суриш учун қулай шароит ва ноёб имкониятлар яратади. Давлатимиз раҳбарининг Бишкек саммитидаги ушбу ташаббуси нафақат юртимиз, балки минтақа ва дунё жамоатчилиги томонидан ҳам катта қизиқиш билан кутиб олинди. ШҲТ доирасидаги барча тадбирларда фаол иштирок этиб келаётган Ўзбекистоннинг янги ташаббусларига бундай кенг қизиқиш ва катта эътибор замирида, албатта, муайян омиллар ўз аксини топган. Бишкек анжумани кун тартибидаги долзарб аҳамиятга молик мавзулар қаторида транспорт-коммуникация соҳасидаги ҳамкорликни фаоллаштириш, хусусан, ШҲТ маконидаги мавжуд транспорт йўлакларидан фойдаланишнинг самарадорлигини ошириш ва янги транспорт йўлакларини барпо этиш истиқболлари ҳам атрофлича муҳокама қилинди. Мамлакатларимизда замонавий ресурс тежовчи ва экологик тоза технологияларни кенг жорий этиш мақсадида ШҲТнинг “Яшил белбоғ” дастурини қабул қилиш долзарб аҳамиятга эга, деб ҳисоблайди Ўзбекистон Президенти. ШҲТ доирасидаги ўзаро манфаатли ҳамкорликнинг муҳим мезонларидан бири – ахборот соҳаси. Давлатимиз раҳбари ШҲТ маконидаги барча мамлакатларнинг ахборот технологиялари ривожланишига масъул идоралари раҳбарларининг мунтазам учрашувлари механизмини жорий этиш таклифи билан чиқди. Киберхавфсизлик масалалари бўйича ўзаро ҳамкорлик дастурини ишлаб чиқиш ғояси ҳам диққатга лойиқдир. Шу нуқтаи назардан, Ўзбекистон Президенти ташаббуси асосида ШҲТга аъзо мамлакатларнинг Рақамлаштириш ва ахборот-коммуникация технологиялари соҳасидаги ҳамкорлиги концепцияси қабул қилинганини алоҳида таъкидлаш лозим. Шунингдек, биз партия вакиллари учун энг муҳим таклифлардан бири бўлган  ШҲТ доирасида парламентлараро мулоқотни тиклашга доир ташаббусларни қўллаб-қувватланишидир. Ушбу янги механизм ташкилот имкониятларини кенгайтириб, ШҲТ фаолиятига парламентарийлар, сиёсий партиялар ва фуқаролик жамияти институтларини жалб қилиш имконини беради. Жаҳон парламентарийлари, сиёсий партияларининг ишлаш услублари, ғоя, мақсад ва вазифалари тўғрисида ахборотга эга бўлинади. Ўзаро тажрибалар алмашинади. Бишкек шаҳрида бўлиб ўтган Шанхай ҳамкорлик ташкилотининг Ёшлар кенгаши йиғилишида илгари сурилган ташаббуслардан келиб чиққан ҳолда, ШҲТга аъзо мамлакатлар ёшлари ўртасидаги ҳамкорлик муносабатларига доир 2019-2020 йилларга мўлжалланган дастурнинг 5 та лойиҳаси Ўзбекистонда амалга ошириладиган бўлди. Хусусан, “Стартаплар форуми”, “PROlogue” V халқаро кинофестивали, “Дўстлик учун!” веломарафони, ШҲТ ёшларининг қишки оромгоҳи, ҳаваскор ёшларнинг футбол бўйича биринчи чемпионати ва волейбол бўйича турнири Тошкент ва Самарқанд шаҳарларида ташкил этилади. Бу эса ёшларимизни жаҳонга чиқиш учун яна бир янги босқични белгилаб беради. ШҲТ доирасидаги ўзаро манфаатли ҳамкорликнинг муҳим мезонларидан бири – хавфсизлик. Минтақамиз, умуман, ШҲТ маконидаги барқарорлик кўп жиҳатдан Афғонистондаги вазият билан узвий боғлиқдир. Ҳозирги вақтда ШҲТга аъзо давлатлар Афғонистон билан асосан икки томонлама битимлар негизида ҳамкорлик қилмоқда. Бир қанча лойиҳалар бўйича ушбу мамлакатнинг энергетика ва инфратузилмалар тизимларини тиклаш ҳамда ривожлантиришга кўмаклашилмоқда. Келгусида Афғонистон билан ҳамкорлик алоқаларини кенгайтиришда кўп томонлама шартномаларга таяниш муҳим самаралар беради. Давлатимиз раҳбари таъкидлаганидек, “Ўзбекистон афғон муаммосини тинч йўл билан ҳал этиш жараёнини тўлиқ қўллаб-қувватлайди”. Хулоса қилиб айтганда, Бишкек саммитида ШҲТ маконида тинчлик ва барқарорликни таъминлаш, тараққиёт ва фаровонликни оширишга йўналтирилган янги ҳамда юксак марралар белгилаб олинди. Бу марраларга эришиш ташкилотнинг узлуксиз ривожланиши ва мустаҳкамланишига ҳам хизмат қилади. Рустам ҲАМРАЕВ, Ўзбекистон “Адолат”СДП Сурхондарё вилояти Кенгаши раиси Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Кенгаш сессиялари сони нега кам? вазифалар озми ёки ташаббускорлик?

Мутасадди ташкилотларга аҳолини ўйлантираётган масалалар юзасидан депутатлик сўрови киритиш орқали уларнинг манфаатларини рўёбга чиқариш Ўзбекистон “Адолат” СДП депутатлари фаолиятида алоҳида ўрин тутади. Жойларда ўтказилган мулоқотлар, фуқароларнинг мурожаатлари асосида халқ депутатлари Сурхондарё вилояти Кенгашидаги партия депутатлик гуруҳи томонидан масъул ташкилотларга жорий йилда 14 та депутатлик сўрови чиқарилди. Ушбу сўровларда асосан коммунал тўловлар, бандлик ва бошқа ижтимоий масалалар, ички йўлларни таъмирлаш, ичимлик суви таъминоти, тиббий хизматга доир муаммолар ўз аксини топган. Айни пайтда депутатлик сўровларининг 7 таси мутасадди ташкилотлар билан ҳамкорликда ўрганилиб, ўз ечимини топди. Депутатлик гуруҳи аъзоси Қизларшой Раҳматова Жарқўрғон тумани “Гулистон” маҳалласида истиқомат қилувчи фуқаро Наргиза Қодировани ишга жойлаштириш бўйича туман халқ таълими бўлимига қарашли “Баркамол авлод” болалар маркази директори номига депутатлик сўрови чиқарган эди. Муаммо ҳал этилиб, ҳозирги кунда Н.Қодирова мазкур марказда ишламоқда. Ушбу маҳаллада яшовчи фуқаролар Бибиойша Содиқова, Жасур Абдиев ҳудуддаги 23-сонли мактабгача таълим муассасасига фарзандларини жойлаштиришда амалий ёрдам сўраб депутат Қ.Раҳматовага мурожаат қилишди. Депутат аралашгач, муаммо ечим топди ва айни пайтда мазкур фуқароларнинг фарзандлари 23-МТМда тарбияланмоқда.     Туманнинг “Наврўз” маҳалласида жойлашган кўп қаватли турар жойларда истиқомат қилувчи бир гуруҳ фуқаролар хонадонларда тоза ичимлик суви йўқлигидан шикоят қилишди. Депутатлик гуруҳи томонидан муаммо ўрганилгач, “Наврўз толачи” уй-жой мулкдорлар ширкати раиси номига депутатлик сўрови чиқарилди. Натижада ширкат мутасаддилари ҳамда туман “Сув-оқава” унитар корхонаси ҳамкорлигида сув қувурлари жорий таъмирланиб, хонадонларга ичимлик суви келтирилди. Халқ депутатлари вилоят Кенгаши депутати Нигора Тошқулова оғир хасталикка чалинган беморларга даволаниш учун бериладиган йўлланмалар сонини ошириш ҳақида вилоят соғлиқни сақлаш бошқармаси бошлиғи А.Норқобиловга юборган депутатлик сўрови натижасида шу турдаги тиббий йўлланмалар сони кўпайтирилганлиги ҳам эътиборга молик. Денов туманидаги “Қизилжар” МФЙ ҳудудида жойлашган 7-МТМ аҳоли истиқомат қиладиган баъзи ҳудудларга узоқлиги бир қатор ноқулайликларни юзага келтираётган эди. Эҳтиёждан келиб чиқиб, маҳаллада давлат тасарруфидаги янги боғча барпо этиш масаласида вилоят мактабгача таълим бошқармаси бошлиғи номига депутатлик сўрови юборилди. Депутатлик сўрови мутасаддилар томонидан ўрганилиб, мазкур ҳудудда янги МТМ қуриш вазифаси тегишли дастурга киритилди. Депутатлик гуруҳи аъзоси Абдурашид Артиқов Жарқўрғон тумани “Дам” маҳалласи аҳли билан ўтказган очиқ мулоқотлар чоғида ҳудудда ичимлик суви қувурларини реконструкция қилиш зарурлиги қайд этилган эди. А.Артиқов мазкур масала юзасидан вилоят “Сув-оқава” корхонаси бошлиғи Ю.Менглиевга депутатлик сўрови юборди. Мутасаддилар муаммони ўз жойига бориб ўрганишди. Муҳими, шу кунларда маҳаллада сув қувурларини реконструкция қилиш ишлари бошлаб юборилган. Шу билан бирга, маҳаллаларда жиноятчилик, ҳуқуқбузарлик, диний экстремизмнинг олдини олишнинг ҳаётий аҳамияти, ОИТС, эрта турмуш қуришнинг салбий оқибатлари, соғлом турмуш тарзига риоя этиш, оилани мустаҳкамлаш каби мавзуларда тарғибот ишлари олиб бориш партия депутатларининг диққат марказида бўлиб келмоқда. Депутатларнинг фикрича, жорий йил давомида халқ депутатлари вилоят Кенгаши томонидан ўтказилган сессиялар сони жуда кам эканлиги депутатларда ташаббус етишмаганини кўрсатади. Кенгашнинг доимий комиссиялар йиғилишлари муҳокамасига долзарб масалаларни киритишда ҳам замон талаби даражасида фаоллик кўрсатилмагани жиддий камчилик, депутатлик ваколати тақозо этган мавжуд имкониятни бой бериш деганидир. Сайловчилар ишончини оқлаш ва ҳудудда партия нуфузини мустаҳкамлашда ваколатлардан унумли фойдаланиш лозим. Гулшод ТУРСОАТОВА, Сурхондарё вилоят кенгаши матбуот котиби Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Депутат халқ орасида: депутат аралашгач, ечимини кутаётган масалалар ҳал бўлди

Олий Мажлис Қонунчилик палатаси депутати Ёрмамат Холиёров ҳудудларда ўрганишлар олиб борди. Хусусан, у Сурхондарё вилоятининг Олтинсой туманида ижтимоий-иқтисодий объектларни кўздан кечирди. Тумандаги “Мустақилликнинг 10 йиллиги” МФЙда ўрганишлар олиб борди. Мазкур маҳаллада жойлашган туман 13-умумий ўрта таълим мактаби филиалида депутатимиз бошчилигидаги ишчи гуруҳ аввал ҳам бўлган, умумий ҳолатни кузатган эди. Бино ўта ночор аҳволдалиги, ташқи ва ички фасадлари таъмирталаблиги, шунингдек, мактаб 60-йилларда 80 ўринга мослаштириб қурилган бўлиб, айни пайтда ўқувчи сони ошиб кетганлиги аниқланган. Табиийки, бу мазкур маҳалла учун янги мактаб қуришни тақозо этади. Депутатимиз мазкур муаммони ўрганиб, тегишли ташкилотларга депутатлик сўрови чиқарган, айни пайтда маҳаллий ҳокимиятдан маблағ ажратилиб, 210 ўринли янги мактаб биноси қурилиши бошланган эди. Аммо, ажратилган маблағ қурилиш ашёларига етишмаётганлиги сабабли мактаб биноси қурилиши сустлашиб қолди. Депутатимиз туман прокуратураси ва туман ҳокимлиги мутасаддиларига мурожаат қилди, масалага ойдинлик киритишга муваффақ бўлинди. Туман молия бўлимидан яна 200 миллион миқдорда маблағ ажратилиб, янги ўқув йилига мактаб биноси битказилиб топширилиши режалаштирилди. Депутатимиз бошчилигидаги ишчи гуруҳ тумандаги “Хўжасоат” ва “Обшир” МФЙларида ҳам бўлиб сайловчилар билан мулоқот олиб боришди. Аҳоли билан мулоқотлар жараёнида мазкур ҳудудларда ёз иссиқлигида узумзорлар сув танқислигидан нобуд бўлаётганлиги маълум бўлди. Айни кунда “Обшир” МФЙда 2167 киши, “Хўжасоат” МФЙда 12238 киши истиқомат қилиб, икки ҳудуднинг жами 2000 гектар очиқ ер майдони бор. Шундан 350 гектари томорқа хўжалиги майдони ҳисобланади. Томорқа учун бериладиган сув барча хўжаликни қамраб ололмаётганлиги сабабли қўшни Денов тумани Ҳазарбоғ каналидан сув қувурлари орқали сув олиб келиш зарурати бор. Депутатимиз Ўзбекистон Республикаси Вазирлар Маҳкамасига мурожаат қилди, мутасадди раҳбарлардан фикр-мулоҳазалар олди. Муаммо юзасидан музокаралар олиб борилиб, Ўзбекистон Республикаси Марказий банкидан 3 миллиард сўмлик имтиёзли кредит берилишига келишилди. Депутат Шўрчи тумани сайловчилари билан ҳам учрашувлар олиб борди. “Лайлакхона” МФЙда яшовчи Э.Элмуродов электр тўловлари учун туман электр тармоқлари корхонаси томонидан 1 миллион 560 сўм ноқонуний қарздорлик чиқарилганлигини айтиб, ушбу муаммони ҳал қилиб беришни илтимос қилди. Депутатимиз томонидан мазкур масалани туман прокуратураси билан ўрганиб чиқди ва қарздорлик асоссиз эканлиги аниқланиб, бекор қилинди. Тумандаги “Шалдироқ” МФЙда яшовчи О.Кенжаевнинг ҳам электр энергияси учун аввалдан тўлаб қўйган маблағини туман электр тармоқлари корхонаси тан олмаётганлиги тўғрисидаги мурожаати мутахассислар ва МИБ ходимлари  иштирокида ўрганилиб, фуқаро фойдасига ҳал этилди. “Қултепа” МФЙ ва “Ҳурлик” МФЙлардаги сайловчилар билан суҳбат жараёнида “Қултепа” ва “Ҳурлик” қишлоқларни боғловчи 8 км. узунликдаги автомобиль йўли таъмирталаб бўлиб, йўлни таъмирлаш учун ёрдам сўраб мурожаат қилишди. Мазкур мурожаат депутатимиз ва туман ободонлаштириш бошқармаси ўртасида муҳокама қилиниб, йўлларни таъмирлаш туманнинг жорий иккинчи ярим йиллик иш режасига киритилди. Гулшод ТУРСОАТОВА, Ўзбекистон “Адолат” СДП Сурхондарё вилояти кенгаши матбуот котиби Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Сурхондарёдан онлайн: навбатдаги семинар бошланиш арафасида

Бугун Термиз шаҳрида Ўзбекистон “Адолат” СДП Сиёсий Кенгаши Марказий аппарати ташаббуси билан “Сиёсий жараёнларда Ўзбекистон “Адолат” СДП позицияларини мустаҳкамлашнинг долзарб масалалари” мавзусида семинар ўтказиш режалаштирилган. Тадбир Термиз давлат университети қошидаги халқ таълими ходимларини қайта тайёрлаш ва уларнинг малакасини ошириш ҳудудий маркази мажлислар залида ташкил этилади. Семинарда партиянинг Сурхондарё вилоят ҳудудий Кенгаши ходимлари, туман ва шаҳар Кенгашлари раислари, Халқ депутатлари вилоят, туман ва шаҳар Кенгашлари депутатлари, партия фаоллари ҳамда ОАВ вакиллари иштирок этиши кутилмоқда. Тадбирда Ўзбекистон “Адолат” СДП Сиёсий Кенгаши раиси Наримон Умаров ҳам қатнашади. Гулшод ТУРСОАТОВА, Ўзбекистон “Адолат” СДП Сурхондарё вилоят кенгаши матбуот котиби Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Сурхондарёдан онлайн: замонавий пиар технологиялардан фойдаланиш — давр талаби

Бугун Термиз шаҳрида Ўзбекистон “Адолат” СДП Сиёсий Кенгаши Марказий аппарати ташаббуси билан “Сиёсий жараёнларда Ўзбекистон “Адолат” СДП позицияларини мустаҳкамлашнинг долзарб масалалари” мавзусида ўтказилиши режалаштирилган семинар давом этмоқда. Партиянинг Сурхондарё вилоят Кенгаши раиси Рустам Ҳамраев тадбирни кириш сўзи билан очди. Шундан сўнг Рустам Ҳамраев “Аҳолининг ҳуқуқий саводхонлигини юксалтиришда пиар технологиялардан фойдаланиш тўғрисида” маъруза қилди. Семинарда таъкидланганидек, жорий йил мамлакатимизда Олий Мажлис Қонунчилик палатасига ҳамда халқ депутатлари вилоят, туман, шаҳар Кенгаши депутатлигига сайловлар куни кеча қабул қилинган Сайлов кодекси нормалари асосида ташкил этилади. Мазкур Кодексда, аввало, фуқароларнинг сайлов ҳуқуқларини ҳимоя қилишнинг қўшимча амалий механизмларини, сайлов қонунчилигини тизимлаштириш ва унификациялаш, сайлов ҳуқуқи нормалари иерархиясини таъминлаш, сайлов жараёни очиқлигининг кафолатларини кучайтириш имконини беради. Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP   ...

Батафсил
News

Сиёсий онг ва ҳуқуқий маданиятни оширишда сиёсий партияларнинг роли муҳим

Аввал хабар берганимиздек, бугун Ўзбекистон “Адолат” СДП Сиёсий Кенгаши томонидан партиянинг Сурхондарё вилоят Кенгашида “Сиёсий жараёнларда Ўзбекистон “Адолат” СДП позицияларини мустаҳкамлашнинг долзарб масалалари” мавзусида семинар ташкил этилди. Партиянинг “Юксак ҳуқуқий маданият – тараққиёт гарови!” лойиҳаси доирасида бўлиб ўтган тадбирда Сурхондарё вилоят, туман ва шаҳар Кенгашлари раислари, халқ депутатлари маҳаллий Кенгашларидаги партия депутатлик гуруҳлари аъзолари ҳамда фаоллар иштирок этди. Семинарда сўзга чиққан Ўзбекистон “Адолат” СДП Сиёсий Кенгаши раиси Н.Умаров таъкидлаганидек, сиёсий онг ва ҳуқуқий маданиятни оширишда сиёсий партияларнинг роли муҳим ҳисобланади. Айниқса, парламент ва маҳаллий вакиллик органларига сайловлар бўлиб ўтадиган жорий йилда аҳоли ва сайловчилар билан янада яқинроқ мулоқот олиб бориш, сўнгги йилларда миллий қонунчилигимизга киритилган янгиланишлардан хабардор қилиш орқали уларнинг ҳуқуқий маданияти ошириш долзарб саналади. Чунончи, ҳуқуқий маданият кишиларнинг ҳуқуқий саводхонлик даражаси, қонунларга бўлган ҳурмати, ҳуқуқий нормаларни ижро этиши, ҳаётга тадбиқ эта олиш кўникмаси, ҳуқуқбузарликларга нисбатан муросасизлик, қонунларга итоаткорлик, сиёсий жараёнларда фаоллик ҳамда ташаббускорлигини англатади. Йиғилишда эътироф этилганидек, жорий йил мамлакатимизда Олий Мажлис Қонунчилик палатасига ҳамда халқ депутатлари вилоят, туман, шаҳар Кенгаши депутатлигига сайловлар куни кеча қабул қилинган Сайлов кодекси нормалари асосида ташкил этилади. Мазкур Кодексда, аввало, фуқароларнинг сайлов ҳуқуқларини ҳимоя қилишнинг қўшимча амалий механизмларини, сайлов қонунчилигини тизимлаштириш ва унификациялаш, сайлов ҳуқуқи нормалари иерархиясини таъминлаш, сайлов жараёни очиқлигининг кафолатларини кучайтириш имконини беради. Ушбу демократик тамойиллар асосида ташкил қилинадиган ва ўтказиладиган сайловлар бир томондан, шу мамлакатдаги фуқароларнинг давлат органларини тузиш ва давлат органлари ишида бевосита ҳамда реал иштирокини таъминласа, иккинчи томондан, тўғри ташкил қилинган демократик сайловлар натижасида фуқаро ва жамият манфаатига мос давлат органлари шаклланишида бевосида хизмат қилади.  Қолаверса, сайлов фақат ҳокимият тузилмаларини ташкил этиш, уларга ўз вакилларини сайлаш билан чекланиб қолмай, у давлат ҳокимияти органлари фаолияти устидан жамоатчилик назоратини ўрнатишнинг энг муҳим усулларидан ҳисобланади. Шу мақсадда сайловларга пухта тайёргарлик кўриш, номзодларни халқ билан яқинлаштириш мақсадида бир қатор режалар белгиланди. Аввало партия сайловолди дастурида белгиланган устувор вазифаларни ҳаётга тадбиқ этиш, сайловчилар билан ўтказиладиган учрашувлар давомида аҳолини ўйлантираётган масалаларни атрофлича ўрганиш ва уларнинг ечимини топиш бўйича таклиф қилинган ҳамда амалга оширилган ишларни таҳлил этиш лозим. Бу орқали партия сайловчиларга берган ваъдаларини тўлақонли адо этиб, ўзининг халқ орасидаги нуфузини янада оширишга эришиши мумкин. Шунингдек, тадбирда таъкидланганидек бугунги шиддат билан ўтаётган даврда ижтимоий-сиёсий тадбирларни тайёрлаш ва ўтказишда мажлисбозликдан қочиш лозим. Жумладан, электорат билан ишлашда замонавий сиёсий технологиялардан фойдаланиш, аниқ дастурларни ишлаб чиқиш зарур. Ижтимоий-сиёсий тадбирларни ташкил этишда иштирокчиларнинг кўплиги, катта қилиб ўтказишга эмас, балки партия электоратининг қамраб олиниши ва уларнинг манфаатларига қанчалик хизмат қилишига эътибор қаратиш зарур. Ушбу йўналишда инновацион усулларидан, тарғиботнинг илғор ва таъсирчан воситаларидан, хорижий давлатларнинг бу борадаги ижобий тажрибаларидан етарли даражада фойдаланиш, сиёсий ўқувлар ҳамда бошқа ҳуқуқий тарғибот тадбирларининг самарадорлигини янада ошириш зарурлиги таъкидланди.  Яна бир эътиборли масала шундан иборатки, йиғилиш давомида партиянинг бошланғич ташкилотлари фаолиятини жонлантириш, уларга услубий ва амалий кўмак бериш, жойларда учраётган муайян ижтимоий муаммо ва камчиликларга партия қандай муносабат билдираётгани, уларни ҳал этиш борасида қандай ғояларни илгари суриш масалалари юзасидан муҳим таклифлар билдирилди. Иштирокчилар томонидан таъкидланганидек, сайлов натижалари сиёсий партиялар фаолиятига бериладиган баҳо ҳисобланади. Сайловларда яхши натижа кўрсатиш ва вакиллик бошқарув органларида имкон қадар максимал ўринларни эгаллаш учун эса пухта ва жиддий ҳозирлик кўриш талаб этилади. Шу мақсадда партия 2019 йилда Ўзбекистон Республикаси Олий Мажлиси, халқ депутатлари вилоят, туман ва шаҳар Кенгашлари сайловига тайёргарлик кўриш бўйича Йўл харитаси ишлаб чиқилди ва зарурий вазифалар белгиланди. Жонли мулоқот ва савол-жавобларга бой бўлган семинар сўнгида иштирокчиларга кун тартибидаги масалалар юзасидан тегишли кўрсатмалар берилди. Гулшод ТУРСОАТОВА, Ўзбекистон “Адолат” СДП Сурхондарё вилоят кенгаши матбуот котиби Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Cурхондарёда “Саломатлик йўлида бирлашайлик!” лойиҳаси доирасида тиббий кўриклар ташкил этилмоқда

Ўзбекистон “Адолат” социал-демократик партияси Сурхондарё вилоят ташкилоти ташаббуси билан жойларда фуқароларни тиббий кўрикдан ўтказиш ишлари айни пайтда қизғин паллага кирган. Хусусан, ҳар чоршанба куни Партиянинг Сурхондарё вилоят Кенгаши ташаббуси билан Вилоят кўп тармоқли катталар поликлиникаси ҳамкорликда партиянинг “Саломатлик йўлида бирлашайлик” лойиҳаси доирасида жойларда аҳоли учун бепул чуқурлаштирилган тиббий кўриклар ташкил этиляпти. Тиббий кўрикларда партия фаоллари, вилоят кўп тармоқли катталар поликлиникаси тиббиёт ходимлари ва бошқа тажрибали мутахассислар иштирок этишмоқда ва аҳолига тиббий хизмат кўрсатишяпти. Шунингдек, фуқароларга соғлом турмуш тарзи, ўзи ва яқинларининг саломатлигига эътиборли бўлиш, соғлом умр кўришлари бўйича маслаҳатлар беришяпти. Ана шундай тиббий кўриклардан бири шаҳардаги “Каттабоғ” маҳалласида ташкил этилди. Унда партия ходимлари ва вилоят кўп тармоқли катталар поликлиникаси шифокорлари хонадонма хонадон юриб аҳолини тиббий кўрикдан ўтказишди. Самариддин Бойқораев, “Каттабоғ” МФЙ фуқароси, 1-гуруҳ ногирони: – Ўтказилаётган тиббий кўрикларнинг ташкил этилганлиги аҳоли, орасида турли касалликларнинг олдини олиш учун аҳамиятли бўляпти. Иш ва ҳаёт ташвишлари билан чалғиб, вақтида тиббий кўрикдан ўтишимиз учун эътибор қаратмас эдик. Тиббий-кўрик давомида мутахассислар томонидан керакли маслаҳат ва тавсиялар бериляпти. Турли касалликларнинг олдини олишга қаратилган маълумотларга эга бўляпмиз. Ҳар олти ойдан тиббий кўрикдан ўтиш саломатлигимиз учун жуда муҳим эканини чуқурроқ тушуниб оляпмиз. Ташкилотчилардан миннатдормиз. Турли касалликларни олдини олишга қаратиган тарғибот ишларини мунтазам ташкил этиш мақсадга мувофиқдир. Партиянинг лойиҳаси доирасида ташкил этилган тиббий кўрик фуқароларнинг тиббий саводхонлигини ошириши билан бирга касалликларни олди олинишида хизмат қилади. Тиббий кўрик давомида фуқаролар ўзлари қизиққан саволларга жавоблар, саломатлиги тўғрисидаги муаммоларга тегишли кўрсатмалар олишди. Шунингдек, Термиз тумани “Орол” МФЙда ҳам туман Оилавий поликлиникаси билан ҳамкорликда маҳалла аҳолиси тиббий кўрикдан ўтказилди. – Туман бўйлаб аҳолини тиббий кўрикдан ўтказяпмиз, – дейди гуруҳ аъзоси, малакали кардиолог, олий тоифали шифокор И.Шомуродов. – Тиббий текширув асбоб-ускуналари билан бориб ташхис қўйиш қийин бўлган беморларни кўриб, уларга даволаниши учун аниқ кўрсатмалар берилмоқда. Тиббий кўрик давомида “Орол” МФЙда 50 га яқин аҳоли вакиллари тиббий кўрикдан ўтказилди. Шунингдек, чекка қишлоқларда яшаётган ёши улуғ инсонлар, ногиронлиги бор шахслар ва болаларнинг ҳолидан хабар олиниб, уй шароитида тиббий кўрик ташкил этилмоқда. Соғлом турмуш тарзини шакллантиришда жисмоний тарбия ва спортнинг ўрни, тўғри овқатланиш юзасидан маслаҳатлар берилмоқда.. Гулшод ТУРСОАТОВА, Ўзбекистон “Адолат” СДП Сурхондарё вилоят Кенгаши матбуот котиби Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Жарқўрғонда бешта муҳим ташаббус доирасида тадбир ўтказилди

Президентимиз томонидан илгари сурилган 5 та муҳим ташаббус ижроси доирасида Сурхондарё вилояти Жарқўрғон туманидаги 33-умумтаълим мактабида маънавий-маърифий тадбир бўлиб ўтди. Ўзбекистон “Адолат” социал-демократик партияси вилоят кенгаши томонидан ташкил этилган тадбирда партиянинг вилоят Кенгаши ходимлари, халқ депутатлари вилоят ва туман кенгашларидаги депутатлар, вилоят Маънавият ва маърифат бўлими мутасаддилари, мактабнинг тўгарак раҳбарлари ва спорт мураббийлари, ёшлар иштирок этди. – Мазкур маънавий-маърифий тадбир аждодлардан мерос қолган маънавий қадриятларимизни, ёшлар саломатлигини сақлаш ва шу йўл билан уларнинг жисмоний тарбия ҳамда спортга интилишини тарғиб қилишга қаратилгани билан барчага манзур бўлди, – дейди Ўзбекистон “Адолат” социал-демократик партияси вилоят Кенгаши раиси ўринбосари Исроил Қурбонов. – Бу иш партиямиз мақсад ва вазифаларининг муҳим йўналишларидан бирига айланди. Мазкур тадбирни ўтказишдан мақсадимиз 5 та муҳим ташаббуснинг ижросини таъминлаш баробарида ёшларнинг спорт, мусиқа, рассомлик, адабиёт, санъатнинг бошқа турларига қизиқишини янада ошириш, ёшлар иқтидорларини юзага чиқариш ва уларни рағбатлантиришдан иборат эди. Тадбирда сўзга чиққан партия фаоллари ёшларга қаратилган эътибор ва имкониятларнинг мазмун-моҳияти, бу борада партия томонидан олиб борилаётган амалий ишлар тўғрисида гапириб ўтишди. Тадбирда ёшлар ўртасида шахмат–шашка, елкада кураш, миллий рақслар, арқон тортиш, асфальтда расм чизиш, турли хилдаги картиналар чизиш каби турлари бўйича ўтказилган беллашув якунида ғолиблар аниқланиб, партиянинг фахрий ёрлиқлари ва эсдалик совғалари билан тақдирландилар. Шунингдек, тадбирда мактаб ўқувчи ёшлари томонидан яратилган ҳунармандчилик буюмлари кўргазмаси, китоблар ярмаркаси ҳам ташкил этилди. Тадбир сўнггида мактабнинг ҳаваскор ёшлар жамоаси ўзларининг ранг-баранг дастурлари билан барчани хушнуд этди. Гулшод ТУРСОАТОВА, Ўзбекистон “Адолат” СДП Сурхондарё вилояти Кенгаши  матбуот котиби Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил

АЛОҚА

Манзилимиз: Тошкент шаҳри, Чилонзор тумани, Шарқ тонги кўчаси, 23-уй. Мўлжал: Озарбайжон Республикаси элчихонаси:

Телефон: 71-2730731 71-2884654 (139)

Электрон манзил: adolat.sdp@exat.uz

САЙТ ТЕСТ РЕЖИМИДА ИШЛАМОҚДА:

www.adolat.uz веб-сайти 2018 йилнинг 21 май куни электрон ОАВ сифатида давлат рўйхатидан ўтказилган. Гувоҳнома рақами: 1232. Муассис: Ўзбекистон Адолат СДП. Таҳририят манзили: 100043, Тошкент шаҳри, Чилонзор тумани, Шарқтонгги кўчаси, 23-уй. Электрон манзил: info@adolat.uz

Сайт материалларидан фойдаланилганда Фойдаланиш шартларига амал қилиниши шарт. Барча ҳуқуқлар Ўзбекистон Республикасининг оммавийахборот воситалари тўғрисидаги ҳамда муаллифлик ва турдош ҳуқуқлар тўғрисидаги қонун ҳужжатларида белгиланган тартибда ҳимояланган

#

Мурожаатингиз учун рахмат!