СИРДАРЁ

Манзил: Гулистон шаҳри, Мустақиллик кўчаси, 35-уй

Телефон: (67) 225-43-58, 225-42-23

Электрон манзил:  sv_adolat@mail.ru

Янгиликлар
News

Партиядошимиз – “Тараққиёт” республика танлови ғолиби

2018 йил 30 майда Ўзбекистон Республикаси Президентининг “Истиқболли бошқарув кадрларини танлов асосида танлаб олишнинг замонавий тизимини яратиш чора-тадбирлари тўғрисида”ги қарори қабул қилиган бўлиб, унга мувофиқ “Тараққиёт” республика танловини эълон қилиш ва ўтказиш бўйича бир қатор ишлар олиб борилган эди. Хусусан, Республикамиз бўйича 8334 нафар талабгор 16 номинация доирасида танловда қатнашиш учун рўйхатдан ўтди ва сўровнома тўлдирди. Шулардан жорий йилнинг 2-мартигача 300 нафар иштирокчи белгиланган босқичлардан ўтиб, финалда иштирок этиш учун саралаб олинди. 2-март куни ўтказилган навбатдаги босқичда эса иштирокчилар учун ташкилотчилик қобилияти ва бошқарув салоҳиятини аниқлаш бўйича ёзма тест синови ўтказилди. Мазкур босқич натижасига кўра, қарор асосида 150 нафар иштирокчи танловнинг финал босқичида иштирок этишга тавсия қилинди. Финал босқичи натижалари 15 июль куни эълон қилинди. Унга кўра барча босқичлардан муваффақиятли ўтган 50 нафар ғолиб аниқланди. Ғолибларга энг кам иш ҳақининг 50 баравари миқдорида бир марталик пул мукофоти берилиши, шунингдек, тегишли йўналишлар бўйича давлат ташкилотларида раҳбарлик лавозимларига тайинланиши, ривожланган хорижий мамлакатларнинг соҳага оид ташкилотларида малака ошириши белгиланган. Энг муҳими, улар орасида Ўзбекистон “Адолат” СДП Сирдарё вилоят Кенгаши раис ўринбосари Тўйчиев Валижон Вахобжоновичнинг ҳам бор эканлиги бизга алоҳида ғурур ва фаҳр ҳиссини бермоқда. Партия вакили Давлат ва жамият бошқаруви номинацияси бўйича танловда қатнашиб, 3 нафар ғолибдан бирига айланди. Бир неча йиллардан буён партия сафида самарали меҳнат қилиб келаётган партиядошимизни бу ютуғи билан чин дилдан қутлаймиз. Келгусидаги фаолиятларида муваффақиятлар тилаймиз. Дилшунос АБДУЛЛАЕВА, Ўзбекистон “Адолат” СДП Сирдарё вилоят Кенгаши раиси Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

МЕНДА ТАКЛИФ БОР: Шаҳар ва қишлоқлар орасидаги тафовутларни камайтириш лозим

Жорий йил мамлакатимизда муҳим сиёсий жараён Олий Мажлис палаталари ва маҳаллий вакиллик органларига сайловлар бўлиб ўтади. Унга мамлакат тараққиётини таъминловчи халқчил ғоялар ҳамда дастурлар билан кириб бориш ҳар бир сиёсий партия учун муваффақият гарови бўлиб хизмат қилади. Ҳаётбахш ғоялар эса марказдан қуйига эмас, қуйидан марказга тизими орқали вужудга келади. Жорий йилнинг 16 июль куни Ўзбекистон “Адолат” социал-демократик партиясининг Сиёсий дастури ва сайловолди дастури муҳокамасига бағишланган видеоселектор йиғилиши ҳам шу мақсадда ташкил этилди. Онлайн мулоқотда Ўзбекистон “Адолат”СДПнинг марказ ҳамда барча ҳудудий Кенгаш студиялари вакиллари қатнашишди. Улар ичида Сирдарё вилоят партия ташкилоти ҳам ўзининг барча масъул ходимлари, туман, шаҳар Кенгаши раислари, депутатлар, партия фаоллари ҳамда ОАВ вакиллари иштирок этди. Дастлаб видеомулоқотда партия Сиёсий Кенгаши раиси Наримон Умаров барчани амалий таклифлар билан фаол иштирок этишга чорлади. Сўнгра Ўзбекистон “Адолат”СДП Сиёсий Кенгаши раис ўринбосари Абдукамол Рахмоновнинг сайловолди дастурига тегишли долзарб аҳамиятга эга маърузаларини барча бирдек қизиқиш билан тинглаб борди. Суд-ҳуқуқ тизимини такомиллаштиришга оид ва бир қанча ижтимоий, ҳаётий мазмундаги таклиф ва мулоҳазалар ҳам видеоселектор йиғилиши иштирокчиларининг диққат-марказида бўлди. Тадбир давомида вилоятлардаги барча ҳудудий студиялар вакиллари томонидан таълим, соғлиқни сақлаш, илм-фан, маданият ва бошқа кўплаб соҳаларда жамиятимизда янгидан янги қирраларни очиб берувчи муҳим таклифлар ўртага ташланди. Олий Мажлис Сенати аъзоси, Халқ депутатлари Сирдарё вилоят Кенгаши депутати Арипжон Қудратов ҳам ўзининг тиббиётга доир зарур таклифларини бериб ўтди. Қизғин баҳс-мунозаралар, тортишувлар ва амалий таклифларга бой бўлган учрашувда билдирилган таклифлар инобатга олиниши таъкидланди. Видеомулоқотда сайлов жараёнларига оид бошқа масалалар ҳам атрофлича муҳокама қилинди ва тегишли қарорлар қабул қилинди. Меҳринисо БОБОНАЗАРОВА, Ўзбекистон “Адолат”СДП Сирдарё вилоят Кенгаши матбуот котиби Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Тиббий кўриклар - аҳоли саломатлигининг бирламчи омили

Партиямиз вакиллари тиббиёт муассасалари билан ҳамкорликда аҳоли учун бепул тиббий кўриклар ташкил этиб, беморлар ҳолидан хабар олишмоқда. Шундай тадбирлардан бири жорий йилнинг 11 июль куни Сайхунобод туман кенгаши томонидан ўтказилди. Туман тиббиёт бирлашмасида ўтказилган тиббий кўрикда 10 дан ортиқ аҳоли вакилларига  тиббий хизматлар кўрсатилди. Жумладан, “Гулистон” маҳалласида яшовчи, кам таъминланган оилалар рўйхатида турувчи фуқоро Абдусаматова Гулсаранинг ўзи ва невараси тиббий кўрикдан ўтказилди. Оилага соғлом турмуш тарзини шакллантиришда жисмоний тарбия ва спортнинг ўрни, тўғри овқатланиш юзасидан малакали шифокорлар томонидан  маслаҳатлар берилди. Тиббий кўрикдан сўнг туман тиббиёт бирлашмасидаги соҳа мутахассислари иштирокида “Халқ саломатлиги – мамлакат келажаги” мавзусида давра суҳбати ташкил этилди. Ундан кўзланган мақсад эса тиббиёт бирлашмаси ходимларини халқ саломатлиги олдида  масъулият ва бурчлари улкан эканлиги эътироф этилган ҳолда ўз вазифаларига сидқидилдан ёндашишлари муҳим эканлиги таъкидланди. Тадбир сўнгида иштирокчилар мавзу юзасидан ўз фикрларини билдириб ўтишди. Мамлакат БЕРДИЕВА, Сайҳунобод туман Кенгаши раиси ...

Батафсил
News

МЕНДА ТАКЛИФ БОР: Мактаблардаги синф хоналарига камералар ўрнатилиши лозим

Бугунги кунда ёш авлоднинг ҳар томонлама билимли, баркамол бўлиб етишишида, иқтидор ва истеъдодларини рўёбга чиқаришида давлатимиз томонидан кўпдан-кўп шароит ва қулайликлар яратиб берилаётганлиги ҳеч биримизга сир эмас. Ўз навбатида келажак эгаларининг билимлари янада мустаҳкам ва кучли бўлишида таълим даргоҳларидаги ўқитувчиларнинг ўрни алоҳида. Ўқувчиларнинг таълим олишларига мактабда барча шарт-шароитлар бўлиши билан биргаликда, улар устозларининг қанчалар сифатли ва фойдали билим беришларига ҳам боғлиқдир. Ўзим кўриб гувоҳи бўлганимдек, аксарият мактабларда ўқитувчиларнинг дарс ўтиш жараёнини қониқарли, деб бўлмайди. Бу ҳолат айниқса, юқори синфларда дарс берадиган фан ўқитувчиларининг фаолиятида кўп бор учрамоқда. Ўқувчига бутун дарс давомида китобдан конспект кўчиришни буюриб, ўзи интернетда ўтиради.  Ёки мавзуни тушунтирмай, битта фаолроқ ўқувчини синф тахтасига чиқартириб қўйиб, китобдан тайёр машқ ва масалаларни ўқувчиларга кўчиришга буюради. Шу зайлда мактаб ўқувчиси бирор бир фаннинг моҳияти, маъносини тушунмай мактабни битириб кетаверади.   Шу ўринда, таъкидлаш ўринлики, ўқитувчи нафақат билим берувчи устоз, балки психолог ҳам бўлиши керак. Қандай қилиб бўлса-да, дарс жараёнларига ўқувчиларни қизиқтириб олишлари лозим. Ахир гап эртанги кун тақдири қўлида бўлган ёш авлод масаласи ҳақида кетяпти. Бунга жиддий аҳамият қаратилмаса бўлмайди-ку! Аммо бу гаплар оғизда айтилганича қолиб кетяпти. Кимдир айтиши мумкин, ўқитувчилар давлат аттестациясидан ўтказилади, уларнинг билимлари рейтинг асосида текширилиб, бахоланиб борилади-ку деб. Лекин бир нарсани унутмаслик лозимки, коррупция куртак ёйган жамиятда таниш-билишчилик ҳукмрон муҳитда билими саёз, тажрибасиз ўқитувчилар ҳам аттестациядан ўтишнинг йўлини топишяпди. Шунинг учун мен дарс жараёнлари бўладиган ҳар бир синфга камералар қўйилиши лозим деб ҳисоблайман. Агар камералар ўрнатиладиган бўлса ва уни кузатиб турадиган махсус орган ташкил этилса, ким бўлишидан қатьий назар ўша ўқитувчи ўзининг назоратга олинганлигини ҳис этиб, дарсларга жиддий ва масъулият билан ёндашади. Бу таълим сифатининг ўсишида ҳам ижобий натижаларни келтириб чиқаради. Ҳақиқий билимли ёшлар сафи кенгаяди. Меҳринисо БОБОНАЗАРОВА, Ўзбекистон “Адолат”СДП Сирдарё вилоят Кенгаши матбуот котиби Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Эътиборсиз қолдирилган депутатлик сўровлари

Депутатлар ўз ваколатлари доирасида ечилиши лозим бўлган муаммоларга ойдинлик киритиб, уни ҳал этишга ҳаракат қиладилар. Масала ҳал этилишини сўраб, мутасаддиларга мурожаат этишганида улар ҳам жиддий ёндашув билан муаммоларни ҳал этишга кўмаклашишлари зарур. Аммо бунинг акси бўлганда-чи? Афсус билан қайд этиш жоизки, юқоридаги ҳолатнинг юз бераётганлиги, мансабдорларнинг кўпгина депутатлик сўровларига беписанд қарашлари оқибатида муаммолар ўз жойида ҳал этилмасдан қолиб кетяпти. Аслида юборилаётган барча депутатлик сўровлари мутасадди ташкилотларнинг хеч қандай депутат сўровисиз ўзлари ҳал қилишлари лозим бўлган муаммолардир. Депутатлар уларга ўз вазифаларини эслатиб қўймоқдалар, холос. Шундан кейин ҳам уларнинг пинагини бузмаётганлигини қандай изоҳлаш мумкин?! Шу каби ҳалигача ўз ечимини кутиб, очиқлигича қолиб кетаётган депутатлик сўровларидан бири 2019 йил 22 майда Сирдарё вилоят хокимининг биринчи ўринбосари А.Р. Каримов номига йўлланган. Мазкур сўровда Олий Мажлис Сенати аъзоси, Халқ депутатлари вилоят Кенгаши депутати Арипжон Қудратовнинг 1999 йилда қурилган, алоҳида таъмирга мухтож Сирдарё вилоят болалар кўп тармоқли тиббиёт марказини капитал реконструкция қилиш лозимлиги хусусидаги  депутатлик мурожаати  юборилган. Бир ярим ойдан бери ушбу депутатлик сўровига ҳанузгача жавоб олингани йўқ. Вахоланки, “Халқ депутатлари вилоят, туман ва шаҳар Кенгаши депутати мақоми тўғрисида”ги қонуннинг 8-моддасига мувофиқ ижро жараёни ҳақида депутатга 10 кундан кечиктирилмаган муддатда жавоб берилиши шарт. Ёки Халқ депутатлари вилоят Кенгаши депутати Салоҳиддин Элмуродов томонидан Сирдарё вилоят хокими ўринбосарига Бахт шаҳар “Ҳазина”  маҳалласи Ахмад Яссавий массиви “Ибрат” кўчасидаги ҳолат бўйича депутатлик сўрови юборилганда вилоят хокимлиги ижро ишларини Бахт шаҳар хокимига юклаган. Бироқ бир йилдан ошиқ вақт ўтдики, хеч қандай амалий иш қилингани йўқ. Нега ахир шундай долзарб муаммо ҳал этилмасдан очиқлигича қолиб кетяпти? Мутасаддилар қаерга қарашяпти? Агар у маҳаллага бориб қолсангиз, хоҳ ишонинг, хоҳ ишонманг ўзингизни ибтидоий замонга тушиб қолгандек ҳис қиласиз. Йўллар чанг-тупроқ, асфальтланмаган. Газни-ку гапирмай, оддий ичимлик суви ҳам, оқадиган анхор ҳам йўқ. Одамлар ичимлик сувини 2 км. узоқликдаги “Ишонч” маҳалласидан ташиб келтиришади. Оқар сувнинг йўқлиги сабаб экин-текинлар етиштириб бўлмаяпти, етиштирилгани ҳам қуриб қоляпти. Электр токларини терак дарахти шохлари, қўлбола таёқлар ушлаб турибди. Ҳудудий электр тармоқлари корхоналарининг бу ишга лоқайдлиги боис аҳоли бошбошдоқлик асосида электр ток симларини хонадонларга улаб олишган. Депутатимизнинг хабар беришича, яқинда ўша жойда электр симлари ерда ёйилиб ётганлиги сабаб шу атрофда ўйнаб юрган болаларни ток уриб олай деган. Яхшики, фалокатнинг олди олинган. Бундай ҳолатларнинг юз бериши эса биринчиси эмас. Хўш, энди айтингчи, ўзимиз барча шароитлар муҳайё шаҳарда яшаб, битта курсини эгаллаб олиб, чекка ҳудудларда истиқомат қилаётган ана шундай ахволдаги инсонларни ҳам ўйлаймизми? Албатта, ҳақиқат аччиқ. Аммо унга тик ва теран нигоҳ билан боқсангиз, кўплаб муаммоларнинг олди олинган бўлади. Биз бу ҳақда мутасаддиларнинг тегишли жавобларини кутиб қоламиз. Меҳринисо БОБОНАЗАРОВА, Ўзбекистон “Адолат”СДП Сирдарё вилоят Кенгаши матбуот котиби Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Янги ва замонавий боғча қад кўтармоқда

Яқин-яқингача Сирдарё туман “Бешбулоқ” МФЙдаги 1973-йилда қурилган 23-мактабгача таълим муассасасининг бугунги кундаги аҳволини кўриб, очиғи, ҳар бир инсоннинг дилидан ачиниш ҳисси ўтиши табиий эди. Салкам ярим аср муқаддам қурилган ушбу объект 60 ўринга мўлжаллаб бунёд этилган бўлиб, бугунги кунга келиб замон талабига мутлақо жавоб бермасди. Таъмирталаб, зах ва қоронғи хоналар болаларнинг саломатлигига жиддий хавф туғдирарди. Қолаверса, йиллар ўтиб маҳалла аҳолиси сони ҳам ортиб борди. Шунга мутаносиб равишда у даврдаги боғча эндиликда шароит жиҳатидан ҳам, ўрин сони жиҳатидан ҳам талабга мос эмас. Бу муаммо бўйича маҳалла аҳли бир неча маротаба юқори ташкилотларга ариза билан мурожаат қилган бўлсалар-да, ушбу муаммоли вазият ҳал этилмасдан келаверди. Ахийри, 2017-йил маҳалладагилар Ўзбекистон “Адолат” СДПдан  Халқ депутатлари вилоят Кенгаши депутати Салоҳиддин Элмуродовга мурожаат этишганида депутат дархол Сирдарё вилоят халқ таълими бошқармасига мазкур масала юзасидан депутатлик сўрови киритди. Депутатлик сўровида эски боғча ёнидан қўшимча ўринларга мўлжалланган бино қурилиши, эскиси янгидан капитал таъмирланиши лозимлиги айтиб ўтилган эди.  Халқ таълими бошқармаси вакиллари депутат билан юзма-юз учрашишганида ушбу сўров бошқарма томонидан маъқулланганлигини оғзаки тарзда билдириб ўтдилар.   Кейинчалик Халқ таълими тизимидан Мактабгача таълим вазирлиги алоҳида ажралиб чиққач, депутат С. Элмуродов яна бир маротаба муаммо ҳал этилишини сўраб Сирдарё вилоят Мактабгача таълим бошқармасига депутатлик сўрови юборди. 2018 йил 7-февралда юборилган ушбу депутатлик сўровига жавобан Сирдарё вилоят Мактабгача таълим бошқармаси депутатга 23-сонли мактабгача таълим муассасаси 2019-йил Инвестиция дастурига киритилганлигини маълум қилади. Унга кўра, Ўзбекистон Республикаси Президентининг 2018-йил 17-декабрдаги қарорига асосан Сирдарё туман “Бешбулоқ” МФЙ ҳудудида мактабгача таълим муассасасини қайтадан қуриш ҳамда 125 ўринга мўлжаллаб реконструкция ишлари олиб борилажагини маълумот тарзида келтиради. Шунингдек, МТМ учун давлат бюджети ҳисобидан 3 миллиард 375 миллион сўм маблағ ажратилганлигини айтиб ўтади.   Белгиланган фурсат келиб, 23-сонли мактабгача таълим муассасасининг мавжуд майдони асосий бино ва қўшимча биноларни қуриш учун етарли эмаслиги аниқлангач, Сирдарё вилоят мактабгача таълим бошқармасининг қурилиш бўйича ўринбосари Ф.Халигитов вилоят ҳокимининг ўринбосари Ж.Ибрахимов номига боғча учун қўшиимча ер майдони ажратилишини сўраб ёзма мурожаат қилади. Сўровда келтириладики, “Бешбулоқ”МФЙдаги 13-мактаб ҳудуди анчагина кенг майдонни ўз ичига қамраб олгани боис янги МТМ биносини айнан шу мактаб ҳудудида қурилишига рухсат берилиши ва ер ажратилишида амалий ёрдам сўрайди. Айнан мазкур сўров Сирдарё туман ҳокими А. Муҳаммадиев номига ҳам юборилган. Бунга қадар 2018-йил 23-октябрда Сирдарё туман ҳокимининг мазкур мактабгача таълим муассасасини реконструкция қилиш тўғрисидаги қарори чиқарилган эди. Бироқ, эски 23-мактабгача таълим муассасасини ўрганиш натижаларига кўра муассаса ҳудуди 10 сотихли ер майдони бўлиб, 125 ўринли бинонинг қурилиши учун етарли бўлмаганлигидан бу ерда боғча қурилиши мақсадга мувофиқ эмас, деб топилади. Шундан келиб чиққан ҳолда Мактабгача таълим бошқармаси Сирдарё туман хокимидан  юқорида қайд этилган қарорга ўзгартириш киритиш ва ушбу маҳалладаги 13-мактаб биноси майдонидан ер ажратилиши, тегишли техник ишларни расмийлаштиришда амалий ёрдам сўраб мурожаат қилади. Яқиндан эътиборан Сирдарё вилоят ва Сирдарё туман ҳокимлигининг бу ишга аралашувлари билан мактаб ҳудудидан янги боғча қурилиши бошлаб юборилди. МТМга 50 сотих ер майдони ажратиб берилди. Шу ўринда, депутатларимизнинг нақадар синчиков эканликларини, ҳал этилиши лозим бўлган ишларга очиқ кўз билан қараб, муаммоли вазиятларни  ижобий томонга буриб юбораётганликларини муносиб бахолаш даркор. Баходир Ҳайитқулов, “Бешбулоқ” маҳалласида яшовчи фуқаро, меҳнат фахрийси: - Кўз олдимизда қад ростлаётган мухташам, бежирим ва замонавий боғчага ҳар кўзимиз тушганида дилларимиз яйраб кетяпти. Менинг боғча ёшидаги 3 та неварам бор. Хонадонимиз эски боғчанинг олдида жойлашган. Гарчи ҳали янги боғча қурилиши ниҳоясига етказилмаган бўлса-да, эскиси ва янгиси солиштирилганда ер билан осмонча фарқ сезилмоқда. Нафақат мен ва оилам, балки, бутун маҳалла аҳли бу боғчанинг қурилаётганлигидан ўзида йўқ хурсанд. Ҳар холда шунча қилинган саъй-ҳаракатлар бесамар кетмади. Халқ манфаати йўлида бошланган эзгу иш ўзининг амалий ифодасини топиб, бугунги кунда 13-мактаб ҳудудидан янги ва замонавий мактабгача таълим муасассаси қад кўтармоқда. Хозирда қурилиш ишлари айни авжи паллада. Албатта, бу каби хайрли ишларнинг ортида халқ манфаатини ўз манфаатидан устун қўйиб, шу асосда иш олиб борадиган фидойиларнинг ўрни алоҳида. Меҳринисо БОБОНАЗАРОВА, Ўзбекистон “Адолат” СДП Сирдарё вилоят Кенгаши матбуот котиби Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

“Давлат мукофотига лойиқ кўрилганимдан мамнунман”

Ватанимизда биз ёшлар учун яратилаётган имкониятлар чек-чегарасиз. Биздан фақат олға интилиш, ўқиб изланиш, ғайрат ва шижоат талаб этилади. Дарҳақиқат, ёшларга давлат сиёсати даражасида эътибор қаратилиб, бу бўйича муҳим ислоҳотлар, янгиланишлар олиб борилмоқда. Бунда Президентимиз томонидан илгари сурилаётган бешта муҳим ташаббус асосий йўналиш сифатида танлаб олинганлиги, айниқса, ёшларнинг ўз имкониятларини янада кенгроқ очишларида асосий омил бўлиб хизмат қилмоқда. Бешта муҳим ташаббуснинг ҳар бири ёшларимиз учун жуда зарур бўлган йўналишларни ўз ичига қамраб олган. Шу билан бирга, таълим соҳасида ҳам қатор ижобий ўсишларга гувоҳ бўлмоқдамиз. Олий таълим соҳасидаги янгиланишлар ёшларимизга жуда кўплаб имкониятларни, хусусан, халқаро нуфузли олийгоҳларда имтиёзли шартлар асосида  ўқиш имкониятини туҳфа этмоқда. Юртимизда кўплаб хорижий олий таълим муассасаларининг филиаллари ташкил этилмоқда. Янги-янги таълим даргоҳлари барпо этилмоқда. Уларда энг сўнгги технологиялар асосида замонавий шарт-шароитлар яратилмоқда. Албатта, бундай беқиёс имкониятларимизни кўриб, қалбимиздаги жўшқинлик, ёрқин келажакка бўлган интилиш янада ошади. Ватанимиз истиқболи йўлида хизмат қилиш олдимизда турган шарафли бурч эканлигини теранроқ англаймиз. Уйимиз, оиламиз, маҳалламиз тинч ва фаровон. Осойишта яшаб, хотиржамликни ҳис этишимизнинг ўзи катта бахт. Баъзи жойларда бир бурда нонини халоват нелигини билмасдан тановул қилаётганлар бор. Биз шуларни кўриб, фикр этиб, тинчлигимиз энг олий неъмат эканлигини ҳис этмоғимиз даркор. Зеро, кундузлари файзли, тунлари осуда ўтаётган жаннатмакон юртимизнинг қадрига етишимиз зарур. Шу асосда, тинмай меҳнат қилиб, ўқиб, изланиб Президентимизнинг бизга билдирган ишончларини оқлашимиз,  Ватанимиз, халқимиз олдидаги ўз фарзандлик бурчимизни адо этишимиз лозим. Яқинда нишонланган “Ёшлар куни” арафасида янги таъсис этилган “Мард ўғлон” Давлат мукофотига  кўплаб иқтидорли ёшлар қатори мен ҳам лойиқ кўрилдим. Спорт соҳасида эришган камтарона ютуқларим шундай улуғ мукофотга лойиқ кўрилганлигидан Юрбошимизга чексиз миннатдорчилик изҳор этаман. Бундай шарафдан, албатта, бошиш кўкка етди. Шунинг баробарида, бу мукофот менинг зиммамга янада улкан масъулиятларни юклайди. Менга берилган бу ишончни оқлашим, яна ҳам кўпроқ интилиб юқори марраларни забт этишим зарур. Барча ҳамюртларимизга омад ва зафарлар ёр бўлишини тилаган ҳолда, бутун Ўзбекистон ёшларига мақсадлари сари олға интилишларига тилак билдираман. Жавоҳир ҚУРБОНОВ, Ўзбекистон “Адолат” СДП Сирдарё вилоят Кенгаши “Истеъдод” клуби аъзоси, “Мард ўғлон” Давлат мукофоти соҳиби Бизни ижтимоий тармоқларда ҳам кузатинг t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Вилоят Кенгаши фаолиятидан қониқасизми?

Ўзбекистон “Адолат” СДП Сирдарё вилоят Кенгашининг туман ва шаҳар партия ташкилотлари иштирокида йиғилиш ўтказилди. Вилоят партия ташкилоти ходимлари, туман, шаҳар раислари иштирок этган тадбирда партия фаолияти танқидий руҳда ўрганиб чиқилди. Таъкидландики, ўтган ярим йилликда қилинган ишлар, айтилган вазифалар, белгиланган чора-тадбирлар доирасида иш самарадорлиги суст олиб борилмоқда. Хусусан, туман ва шаҳар Кенгашлари фаолиятининг натижаси сезилмаяпти. “Қачонки, туман ва шаҳар Кенгашидаги партиямиз фаолияти жонланар экан, бизнинг иш унумдорлигимиз ошади ва натижаси кўринади”, дея фикр билдирди вилоят Кенгаши раиси Д. Абдуллаева. Ташкилий ва мафкуравий ишлар бўйича партия вилоят Кенгаши ўринбосарлари ҳам ўз муносабатларини билдиришди. Айтишларича, партия лойиҳаларини амалга оширишда фаоллик етишмаяпти. Ўтказилаётган тадбирлар номигагина ташкил этилиб, сифатига аҳамият қаратилмаяпти. Бу йил бўлиб ўтадиган сайловларга номзодлар заҳирасини шакллантиришда сусткашликка йўл қўйилмоқда. Йиғилиш сўнгида кейинги фаолият юзасидан чора-тадбирлар белгилаб олинди ва тегишли қарорлар чиқарилди. Меҳринисо БОБОНАЗАРОВА, Ўзбекистон “Адолат” СДП Сирдарё вилоят Кенгаши матбуот котиби Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил

АЛОҚА

Манзилимиз: Тошкент шаҳри, Чилонзор тумани, Шарқ тонги кўчаси, 23-уй. Мўлжал: Озарбайжон Республикаси элчихонаси:

Телефон: 71-2730731 71-2884654 (139)

Электрон манзил: adolat.sdp@exat.uz

САЙТ ТЕСТ РЕЖИМИДА ИШЛАМОҚДА:

www.adolat.uz веб-сайти 2018 йилнинг 21 май куни электрон ОАВ сифатида давлат рўйхатидан ўтказилган. Гувоҳнома рақами: 1232. Муассис: Ўзбекистон Адолат СДП. Таҳририят манзили: 100043, Тошкент шаҳри, Чилонзор тумани, Шарқтонгги кўчаси, 23-уй. Электрон манзил: info@adolat.uz

Сайт материалларидан фойдаланилганда Фойдаланиш шартларига амал қилиниши шарт. Барча ҳуқуқлар Ўзбекистон Республикасининг оммавийахборот воситалари тўғрисидаги ҳамда муаллифлик ва турдош ҳуқуқлар тўғрисидаги қонун ҳужжатларида белгиланган тартибда ҳимояланган

#

Мурожаатингиз учун рахмат!