Тошкент шаҳар

Манзил: Тошкент шаҳар, Чилонзор тумани Шарқ тонги кўчаси, 23-уй

Телефон: (71) 288-42-04 (136)

Электрон манзил:  toshkent.shahar@mail.ru

Янгиликлар
News

Тошпўлат Матибаев: томири бир дарахтлармиз

Марказий Осиё минтақасида хавфсизликни таъминлаш, дўстлик, ҳамкорлик, маданий алоқаларни мустаҳкамлаш Ўзбекистон ташқи сиёсий фаолиятининг асосий устувор йўналиши ҳисобланади. Мамлакатимизнинг Ташқи сиёсат концепциясида ҳам биз ўзимизнинг яқин қўшниларимиз Қозоғистон, Туркманистон, Тожикистон, Қирғизистон ва Афғонистон билан очиқ, дўстона ва прагматик сиёсат олиб боришга содиқ қоламиз, дейилган. Кейинги пайтларда чегаралар демаркацияси, ҳаво қатновларини йўлга қўйиш, ўзаро борди-келдиларни амалга ошириш, савдо-иқтисодий алоқаларни кучайтириш масалаларида музокараларнинг йўлга қўйилгани ва изчил давом этаётгани барчани бирдек қувонтирмоқда. Ўтаётган ҳафта аввалида ён қўшниларимиздан бири — Қозоғистон Республикаси Президентининг мамлакатимизга амалга оширган ташрифи ва ушбу ташриф доирасида 2019 йил Ўзбекистонда Қозоғистон йили деб эълон қилиниши стратегик шериклик муносабатлари тобора мустаҳкамланиб, ўзаро ишонч ва бир-биримизни қўллаб-қувватлаш кучайиб бораётганидан далолат беради. Биз юқоридан қараганда икки дарахтдай кўринсакда, аслида томирларимиз бир, бу томирлар илдиз отган заминимиз бир. Маълумки, мамлакатларимиз ўртасидаги муносабатлар халқларимизнинг тарихан яқинлиги, икки томонлама сиёсий ва иқтисодий манфаатлар, шунингдек, иқтисодиёт, молия, экология, илм-фан, қишлоқ хўжалиги, маданият, таълим, спорт ҳамда бошқа соҳаларда тобора мустаҳкамланиб бораётган кўп қиррали ўзаро манфаатли алоқалар асосига қурилган. Истиқлол йилларида ҳар икки давлат ҳамкорлигини янги чўққиларга олиб чиққан асосий пойдевор ҳужжатлар, бу — Абадий дўстлик ҳақидаги (1998 йил) ва Стратегик шериклик тўғрисидаги (2013 йил) шартномалардир. Қозоғистон ташқи сиёсатида Ўзбекистон йўналиши муҳим ўрин тутади. Марказий Осиёнинг барқарор ривожи улкан сиёсий ва ижтимоий-иқтисодий потенциал соҳиби Ўзбекистон билан ҳамкорлик даражаси ва сифатига кўп жиҳатдан боғлиқ. Давлат раҳбарларининг мунтазам учрашувлари халқаро ва минтақавий муаммоларга баҳо бериш борасида ҳам мамлакатлар позицияларини сезиларли яқинлаштирди. Хусусан, Тошкент расмий равишда 2017-2018 йилларда Қозоғистонни БМТ Хавфсизлик Кенгашининг нодоимий аъзолигига сайлаш таклифини қўллаб-қуввватлади, Остонада ўтган ЕХРО-2017 халқаро кўргазмасида иштирок этишга розилик берди, БМТ Бош Ассамблеясининг 70-юбилей сессиясида Қозоғистоннинг “Ядро қуролидан холи, тинчликка эришиш бўйича Умумдекларация”си резолюциясини биргаликда илгари суришни таъминлади. Ўзбекистон Республикаси Президенти Шавкат Мирзиёевнинг минтақа давлатлари интеграцияси йўлидаги саъй-ҳаракатлари, Қозоғистон раҳбари Нурсултон Назарбоев билан бирга халқлар ўртасида дўстлик алоқаларини янада мустаҳкамлаш борасидаги ташаббуслари ҳар икки юрт аҳлини бирдек мамнун этди. Қозоғистон Республикаси Президенти Қосим-Жомарт Тоқаевнинг давлат ташрифи мамлакатларимиз ўртасидаги дўстлик, яхши қўшничилик ва стратегик шериклик муносабатларини янада кенгайтиришда навбатдаги қадам сифатида икки томон учун бирдек манфаатлидир. Қозоғистон Ўзбекистоннинг энг муҳим савдо-иқтисодий шерикларидан биридир. Кейинги йилларда иқтисодиётнинг етакчи соҳа ва тармоқларида жадаллашган алоқалар туфайли ўзаро савдо ҳажми 2018 йилда қарийб 50 фоизга ўсиб, 3 миллиард доллардан ошди. Томонлар яқин йилларда бу кўрсаткични 5 миллиард долларга етказишга интилмоқдалар. Ўзбекистон ва Қозоғистон ўртасида икки томонлама ҳамкорлик бўйича Ҳукуматлараро комиссияга савдо алоқалари номенклатурасини кенгайтириш, иқтисодий ҳамкорликнинг янги, узоқ муддатли шаклларини топиш ва ривожлантириш вазифаси қўйилди. Бу ўзаро манфаатли иқтисодий ҳамкорликни мустаҳкамлаш ва кенгайтиришга, савдо, инвестициялар, логистика соҳаларида янги истиқболли лойиҳаларни амалга ошириш, интеграциялашган саноат технопарклари, илмий-инновацион кластерлар ва эркин иқтисодий зоналар ташкил этишга ва охир-оқибат мамлакатларимиз иқтисодиётини янада юксалтиришга хизмат қилади. Тошпўлат МАТИБАЕВ, халқ депутатлари Тошкент шаҳар Кенгаши депутати Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

Маҳалла раислигига муносиблар сайланади

Ислоҳотларнинг ҳозирги босқичида маҳаллаларни янада қўллаб-қувватлаш ва ҳар томонлама ривожлантириш, шу билан бирга, мамлакатимизда фуқаролик жамиятини шакллантиришнинг замонавий талаблари фуқароларнинг ўзини ўзи бошқариш органлари зиммасига юклатилган вазифаларнинг самарали ижросини таъминлаш тизимини янада такомиллаштиришни тақозо этади. Шу боис Президентимиз томонидан 2018 йили имзоланган «Фуқаролар йиғини раиси (оқсоқоли) сайлови такомиллаштирилиши муносабати билан Ўзбекистон Республикасининг айрим қонун ҳужжатларига ўзгартишлар киритиш тўғрисида»ги ҳамда «Фуқаролар йиғини раиси (оқсоқоли) сайлови тўғрисида»ги қонунлар бевосита маҳалла ҳаётига дахлдор бўлиб, унинг тараққиётини, фаолият мезонларини белгилаб берди. Эътиборлиси, мазкур қонунлар фуқароларнинг ўзини ўзи бошқариш органлари раислари сайлови тизимини маҳалла оқсоқолларига қўйилаётган янгича талаблар асосида амалга оширишга қулай шароит яратиш, сайлов жараёнининг очиқлиги ва шаффофлигини янада ошириш мақсадида ишлаб чиқилган. Ўзбекистон Республикаси Олий Мажлиси Сенати Кенгашининг 2019 йил 15 февралдаги “Фуқаролар йиғинлари раислари (оқсоқоллари) сайловига тайёргарлик кўриш ва уни ўтказиш тўғрисида”ги қарорига асосан мамлакатимизда шу йил май ойида ўтказиладиган фуқаролар йиғинлари раислари (оқсоқоллари)нинг навбатдаги сайлови янги қонун асосида ўтаётгани билан аҳамиятлидир. Бу сайловда республикамизда 9019 нафар, хусусан, Тошкент шаҳрида 508 та фуқаролар йиғинида раислар сайланади. Аввало, ўзини ўзи бошқариш деганда, фуқароларнинг маҳаллий аҳамиятга молик масалаларни ўз манфаатларидан, миллий ва маънавий қадриятлар, урф-одатлар ва анъаналардан келиб чиққан ҳолда ҳал қилиш борасидаги қонунлар билан кафолатланган фаолиятини тушуниш жоиз. Конституциямизнинг 105-моддасида “Шаҳарча, қишлоқ ва овулларда, шунингдек улар таркибидаги маҳаллаларда ҳамда шаҳарлардаги маҳаллаларда фуқароларнинг йиғинлари ўзини ўзи бошқариш органлари бўлиб, улар раисни (оқсоқолни) сайлайди”, деб белгилаб қўйилган. Бу борадаги муносабатлар янги таҳрирдаги “Фуқароларнинг ўзини ўзи бошқариш органлари тўғрисида”ги қонун билан тартибга солиниб, унинг 8-моддасида фуқароларнинг ўзини ўзи бошқариш органлари давлат ҳокимияти органлари тизимига кирмаслиги, фуқаролар йиғини органлари фуқаролар йиғини кенгаши, фуқаролар йиғини фаолиятининг асосий йўналишлари бўйича 8 та комиссия ва тафтиш комиссиясидан иборатлиги белгиланган. Фуқаролар йиғини раиси сайлови Президент томонидан 2018 йил 15 октябрда имзоланган “Фуқаролар йиғини раиси (оқсоқоли) сайлови тўғрисида”ги қонун талаблари асосида амалга оширилади. Шу ўринда, қонунларимизга киритилган сўнгги ўзгаришларга биноан оқсоқолнинг ваколат муддати 2,5 йилдан 3 йилга узайтирилгани, оқсоқол билан маслаҳатчиларнинг сайлови алоҳида ўтказилиши, оқсоқолни сайлашда сайловда иштирок этиш ҳуқуқи бўлган фуқароларнинг камида 12 фоизи иштирок этиши шартлиги белгиланганини таъкидлаш жоиз. Фуқаролар йиғини раиси сайловида шу маҳалла ҳудудида доимий яшовчи, муомалага лаёқатли 18 ёшга тўлган фуқаролар иштирок этади. Иштирок этиш ихтиёрий ва эркиндир. Оқсоқол сайловини ташкил этиш ва ўтказиш ошкоралик, муқобиллик ҳамда тенг сайлов ҳуқуқи принциплари асосида амалга оширилади. Номзод икки ва ундан кўп бўлиши керак. Сайловни ўтказиш муддатлари сайлов бошланишидан камида икки ой олдин Олий Мажлис Сенати Кенгаши томонидан белгиланади. Сайловни ташкил этиш ва ўтказиш учун фуқаролар йиғини (вакиллар йиғилиши) қарори билан ишчи гуруҳ тузилади. Унинг таркибига оқсоқол, маслаҳатчилари, йиғиннинг бошқа ходимлари, оқсоқолликка номзодлар киритилиши мумкин эмас. Ишчи гуруҳ фуқаролар йиғини (вакиллар йиғилиши) ўтказилишидан камида беш кун олдин шу ҳудудда яшовчи фуқароларни хабардор қилади. Ҳовлилар, уйлар, кўчалар аҳолисининг вакиллар сайлови бўйича умумий йиғилишларини ўтказади. Вакиллар бўйича баённомалар тузади. Фуқаролар фикрини инобатга олган ҳолда тегишли комиссияга тақдим этиш учун оқсоқол лавозимига номзодлар рўйхатини шакллантиради, сайловни ўтказади ва сайловга оид мурожаатларни кўриб чиқади. Ишчи гуруҳ оқсоқоллик лавозимига номзодларни сайловдан камида ўн кун олдин ҳоким билан келишиш учун тегишли комиссияга тақдим этади. Ҳоким номзодларни кўриб чиқиб, асослантирган хулосалари билан комиссияга, комиссия ишчи гуруҳга юборади. Ишчи гуруҳ номзодлар рўйхатини сайловдан камида беш кун олдин фуқаролар йиғини биноси ва гузарларга осиб қўяди. Фуқаролар йиғини раислигига номзодлар Ўзбекистон Республикаси фуқароси бўлиши, қоида тариқасида олий маълумотга эга бўлиши, бевосита сайловга қадар камида беш йил тегишли ҳудудда доимий яшаётган бўлиши, ташкилотчи, ҳаётий ва иш тажрибасига ҳамда аҳоли ўртасида обрў-эътиборга эга бўлиши керак. Суд томонидан муомалага лаёқатсиз деб топилган, оғир ёхуд ўта оғир жиноятларни содир этганлик учун судланганлик ҳолати тугалланмаган ва судланганлиги олиб ташланмаган шахслар, озодликдан маҳрум қилиш жойларида сақланаётганлар, ҳарбий хизматчилар ва диний ташкилотларнинг профессионал хизматчилари оқсоқоллик лавозимига сайланиш учун номзод этиб кўрсатилиши мумкин эмас. Фуқаролар йиғини (вакиллар йиғилиши) ишчи гуруҳ раҳбарлигида ўтказилади. Кун тартибида саноқ комиссиясини сайлаш ва оқсоқолни сайлаш масаласи кўрилади. Саноқ комиссияси камида уч кишидан иборат таркибда сайланади. Номзодларнинг маърузаси алифбо тартибида ўтказилиб, улар ўзининг келгуси фаолият дастурини эълон қилади. Оқсоқолни сайлаш яширин овоз бериш орқали амалга оширилади. Овоз берувчи тўлдирилган бюллетенни сайлов қутисига ташлайди. Сайлов қутилари овоз бериш тугагандан кейин саноқ комиссияси томонидан очилади. Овозларни санаш натижалари бўйича саноқ комиссияси томонидан баённома тузилиб, раис ва аъзолар томонидан имзоланади. Баённома саноқ комиссияси раиси томонидан ўқиб эшиттирилади ва фуқаролар йиғини (вакиллар йиғилиши) томонидан тасдиқланади. Фуқаролар йиғинида иштирок этувчилар рўйхатига киритилган фуқароларнинг ярмидан ками, вакиллар йиғилишида вакилларнинг учдан икки қисмидан ками иштирок этган бўлса, сайлов ўтмаган деб топилади. Овоз беришда иштирок этган фуқароларнинг ярмидан кўпроғининг овозини олган номзод оқсоқол лавозимига сайланган деб ҳисобланади. Фуқаролар йиғини раис (оқсоқол)лигига икки нафардан ортиқ номзод қўйилиб, биронтаси ҳам сайланмаса, энг кўп овоз олган икки номзод бўйича такрорий овоз бериш ўтказилади. Бу вақтда бошқа номзодга нисбатан кўпроқ овоз олган номзод оқсоқолликка сайланган ҳисобланади. Фуқаролар йиғини раиси (оқсоқоли) сайлангач, фуқаролар йиғини (вакиллар йиғилиши) томонидан бир ой ичида фуқаролар йиғини кенгаши шакллантирилади, оқсоқолнинг маслаҳатчилари, комиссиялар ва тафтиш комиссияси сайланади. Амалиётда фуқаролар йиғини раиси(оқсоқоли)ни туман (шаҳар) ҳокими ишдан бўшатганлиги тўғрисидаги мурожаатлар кўп учрайди. Хўш, ҳоким ўзининг қарори билан оқсоқолни вазифасидан бўшатиши мумкинми? Йўқ. Аммо қонунчиликда ҳокимлар тегишли фуқароларнинг ўзини ўзи бошқариш органлари фаолиятини мувофиқлаштириш бўйича кенгашига жамоатчилик асосида раислик қилиши белгилаб қўйилган. Бу кенгаш оқсоқолларнинг ахборотини эшитиш ваколатига эга. Шунингдек, фуқаролар йиғини (вакиллар йиғилиши) мувофиқлаштириш кенгашининг ташаббуси билан чақирилиши мумкин. Ҳар чоракда оқсоқол ҳисоботи эшитилиб, унинг фаолияти қониқарсиз деб топилса, фуқаролар йиғини (вакиллар йиғилиши) қарори билан оқсоқол ваколатлари муддатидан олдин тугатилиши мумкин. Тошпўлат Матибаев, халқ депутатлари Тошкент шаҳар Кенгашининг фуқаролар йиғинлари раислари (оқсоқоллари) сайловини ташкил этиш ва ўтказишга  кўмаклашувчи комисссияси раиси Бизни ижтимоий тармоқларда ҳам кузатинг: t.me/adolat_uz instagram.com/adolat_sdp/ facebook.com/sdpu.adolat/ twitter.com/AdolatSDP ...

Батафсил
News

МММдан онлайн: cеминар бошланиш арафасида

Бугун Ўзбекистон “Адолат” СДП Тошкент шаҳар Кенгаши томонидан  партия Сиёсий Кенгаши ташаббуси билан “Дахлдорлик ҳиссини унутмайлик” мавзусида семинар ўтказилади. Айни дақиқаларда иштирокчилар пойтахтимиздаги Ўзбекистон Миллий матбуот марказининг мажлислар залида йиғилмоқдалар. Семинарда партиянинг шаҳар ва туман кенгашлари раислари, Халқ депутатлари Тошкент шаҳар ва туман кенгашларининг депутатлари, ижрочи котиблари, фаоллар, экспертлар оммавий ахборот воситалари ходимлари иштирок этиши кутилмоқда. Тадбирда Ўзбекистон “Адолат” социал-демократик партияси Сиёсий Кенгаши раиси ўринбосари Фарҳод Ишанкулов ҳам қатнашади. ...

Батафсил
News

МММдан онлайн: семинар ўз ишини бошлади

Аввал хабар берганимиздек, Тошкент шаҳрида Ўзбекистон “Адолат” СДП Сиёсий Кенгаши томонидан ташкил этилган “Дахлдорлик ҳиссини унутмайлик” мавзуидаги семинар ўз ишини бошлади. Семинарни партия шаҳар Кенгаши раиси Равшан Талипов қисқача кириш сўзи билан очди. Семинарда дастурга кўра Фарҳод Ишанкулов сўзга чиқиши режалаштирилган. Семинар ўз ишини давом эттирмоқда... ...

Батафсил
News

МММдан онлайн: семинарда Фарҳод Ишанкулов сўзга чиқди

“Дахлдорлик ҳиссини унутмайлик” мавзуидаги семинар ўз ишини давом эттирмоқда. Унда Ўзбекистон “Адолат” СДП Сиёсий Кенгаши раиси ўринбосари Фарҳод Ишанкулов “Ҳар биримиз жамиятга дахлдорлик ҳисси билан яшайлик” мавзусида маъруза қилди. -Мамлакатимизда инсон манфаатлари йўлида олиб борилаётган ислоҳотларнинг бардавомлиги, танлаган йўлимиз ва кўзлаган манзилимизнинг аниқ экани, давлатимиз раҳбарининг оқилона сиёсати, халқимизнинг ғайрат-шижоати эзгу мақсадлар рўёбига хизмат қилиб, юксак марраларни забт этаётгани ҳар бир кишини келажакка ишонч билан қарашга ундайди – деди Ф.Ишанкулов ўз чиқишида. - Давлат раҳбарининг 2017 йил 22 декабрдаги Парламентга мурожаатномаси ва унинг мантиқий давоми сифатида қабул қилинган Давлат дастури мамлакатимиз тарихида туб бурилиш ясади. Бунда “Инсон манфаатлари – ҳамма нарсадан устун”, “Халқ давлат идораларига эмас, давлат идоралари халқга хизмат қилиши керак”, деган эзгу ғоялар Ўзбекистон тараққиётининг янги босқичида кўзда тутилган ислоҳотларни ҳаётга татбиқ этишнинг асосини ташкил қилди. Семинар ўз ишини давом ээтирмоқда.... ...

Батафсил
News

Дахлдорлик ҳиссини унутмайлик

Конституциямизнинг 2-моддасида қайд этилганидек, давлат халқ иродасини ифода этиб, унинг манфаатларига хизмат қилади. Давлат органлари, мансабдор шахслар жамият ва фуқаролар олдида масъулдирлар. Ушбу қомусий тамойил халқ давлат ҳокимиятининг бирдан бир манбаи эканлиги, жамият ва давлат ҳаётининг энг муҳим масалалари халқ муҳокамасига тақдим этилиши давлат органларининг халқимиз олдида масъуллигини ўзида ифодалаган.  Бугун Президентимиз Шавкат Мирзиёев бошчилигида олиб борилаётган ислоҳотлар ҳам айни шу мақсадга қаратилган. Давлатимиз раҳбарининг ҳар бир ҳаракати, фикр ва мулоҳазалари, айниқса, “Халқ давлат идораларига эмас, давлат идоралари халқимизга хизмат қилиши керак”, деган сўзлари ҳар биримиз учун дастуриламалдир. Барча даражадаги раҳбарларнинг аҳоли билан бевосита мулоқот қилиши, айниқса, сайёр қабуллар орқали мурожаатчилар ҳузурига бориши уларнинг адолатга, давлатга, эртанги кунга ишончини янада мустаҳкамлашга хизмат қилмоқда. Энг муҳими, очиқ мулоқотларда аҳолига муносиб иш ва турмуш шароити яратишга эришилмоқда. Ушбу жараёнларда сиёсий партиялар, хусусан, Ўзбекистон “Адолат” социал-демократик партиянинг ўрни қандай? Партиялар ислоҳотларнинг ҳаракатлантирувчи кучига айланиши учун нималарга эътибор бериши лозим? Бугун Ўзбекитсон “Адолат” социал-демократик партияси Сиёсий Кенгаши ҳамда партиянинг Тошкент шаҳар Кенгаши ташаббуси билан Миллий матбуот марказида ўтказилган “Дахлдорлик ҳиссини унутмайлик” мавзусидаги семинарда юқоридаги саволларга жавоб изланди. Йиғилишда “Адолат” СДП Сиёсий Кенгаши, Халқ депутатлари Тошкент шаҳар, туман Кенгашлари депутатлари, шаҳар Кенгаши аъзолари, партия экспертлари ва бошланғич партия ташкилоти аъзолари иштирок этди. Семинарда таъкидланганидек, Ўзбекистон “Адолат” СДП ўз сайловолди дастури ҳамда Давлат дастурларида белгилаб берилган устувор вазифлардан келиб чиқиб, электорат ва аҳолининг кенг қатлами билан йўлга қўйилган самарали механизмлар асосида кенг мулоқот олиб бормоқда. Хусусан, ўтган даврда партиянинг Тошкент шаҳар Кенгаши томонидан аҳолига тиббий хизмат кўрсатиш, дори-дармон воситалари билан таъминлашни яхшилаш, илм-фан, таълим-тарбия ва суд-ҳуқуқ соҳаларига асосий эътибор қаратилиб, ушбу йўналишда лойиҳалар доирасида ўрганишлар олиб борди. Хусусан, халқ билан юзма-юз мулоқот ўрнатиш мақсадида “Адолат – қонун устуворлигида” лойиҳаси, мактабгача таълим муассасаларида болаларни мактабга сифатли тайёрлаш ҳолатлари бўйича “Мактабгача таълим – кадрлар тайёрлашнинг бирламчи бўғини” лойиҳаси,ходимлар меҳнат фаолиятига оид ҳужжатларни давлат архивларига топшириш ҳолатларини ўрганишни кўзда тутувчи “Ижтимоий соҳа ривожи – аҳоли фаровонлигининг гарови” лойиҳалари доирасида ўрганишлар олиб борилди. Аниқланган камчиликларни бартараф этиш юзасидан партия шаҳар Кенгашидаги депутатлик гуруҳлари томонидан Халқ депутатлари Тошкент шаҳар Кенгаши сессияси ҳамда доимий комиссияларига масалалар киритилди. Семинар қатнашчилари томонидан партия сайловолди дастурида илгари сурилган устувор вазифаларни ҳаётга татбиқ этиш, сайловчилар билан ўтказиладиган учрашувлар давомида аҳолини ўйлантираётган масалаларни атрофлича ўрганиш ва уларнинг ижроси бўйича ҳисоботлар тақдим этиб бориш орқалигина партия сайловчиларга берган ваъдаларини тўлақонли адо этиб, унинг халқ орасидаги нуфузини янада оширишга эришиш мумкинлиги таъкидланди. Тадбир якунида Қонунчилик палатаси ва туман Кенгашлар депутатлари, партия фаоллари томонидан партиянинг ҳар бир лойиҳасини ўз ҳудудида жорий этиши, мавжуд муаммоларни бартараф қилиш орқали халқ ишончи ва сайловчилар эътиборига сазовор бўлиши ҳамда ислоҳотларнинг фаол иштирокчисига айланиши мумкинлиги таъкидланди. Зулайҳо ЧЎЛПОНОВА, Ўзбекистон “Адолат” СДП Тошкент шаҳар Кенгаши матбуот котиби ...

Батафсил
News

“Китоб челленж”: депутат Улуғбек Саматов мактаб кутубхонасига китоблар тўпламини топширди

Пойтахтимизнинг Шайхонтоҳур туманидаги 273-сонли умумтаълим мактабида “Депутат ва ёшлар” мавзусида давра суҳбати бўлиб ўтди. Учрашувда мазкур таълим масканининг ўқитувчи-педагоглари, ўқувчилар қатнашди. Унда Олий Мажлис Қонунчилик палатаси депутати Улуғбек Саматов иштирок этиб, мамлакатимизда таълим тизимида олиб борилаётган ислоҳотлар, ёшларга берилаётган имкониятларнинг мазмун-моҳияти ҳақида ўқувчиларга атрофлича тушунчалар берди. Депутат ёшлар билан самимий суҳбатда бўлиб, уларга китобнинг инсон камолотида тутган ўрни, шахс маънавияти ва маданиятини юксалишида катта аҳамиятга эга эканлигини таъкидлади. Китоб билан дўст тутинган ўқувчидан ёмонлик чиқмаслигини уқтирди. Учрашув давомида депутат ёшларга ўзбек ва жаҳон адабиётининг нодир дурдоналарини мунтазам равишда ўқиб боришларини тавсия қилди. Учрашувда депутат У.Саматов ўқувчиларга китоблар тўпламини тақдим этди. Унда ёшлар турли хилдаги ёзувчиларнинг бадиий асарлари билан танишар эканлар, улар депутатга миннатдорлик билдиришди. Дарслардан, машғулотлардан бўш вақтларида ушбу китобларни ўқиб, улардан завқ олишларини бир овоздан баён қилишди. Албатта, бу каби учрашувлар ўсиб келаётган навқирон авлоднинг сиёсий-ҳуқуқий билимларини оширишида, балки китобхонликка жалб қилиниши билан ҳам аҳамиятлидир. Зулайҳо ЧЎЛПОНОВА, Ўзбекистон “Адолат” СДП Тошкент шаҳар Кенгаши матбуот котиби Бизни ижтимоий тармоқларда ҳам кузатинг: https://t.me/adolat_uz https://www.instagram.com/adolat_sdp/ https://www.facebook.com/sdpu.adolat/ ...

Батафсил
News

Депутат халқ орасида: “Оқилон”даги хизмат кўрсатиш шохобчаcи нега фаолият кўрсатмаяпти?

Олий Мажлис Қонунчилик палатаси депутати Улуғбек Саматовнинг бу галги учрашувлари Шайхонтоҳур туманидаги ижтимоий объектларни ўрганишга қаратилди. Жорий йилнинг 27-31 март кунлари депутат ҳудуддаги мактабгача таълим муассасалари, мактаблар, тиббиёт муассасалари, оилавий поликлиникалар ва тез тиббий ёрдам кўрсатиш марказларига ташриф буюриб, уларнинг фаолияти билан яқиндан танишди. Ўрганишлар “Оқилон”, “Кўкча Дарвоза”, “Катта Оқтепа”, “Маннон Уйғур” маҳаллаларида бўлиб ўтди. Унда мактабгача таълим муассасаларида болалар сонининг меъёр даражаси, кадрлар масаласи, мактабларнинг дарсликлар билан таъминланганлиги, тиббий хизмат, моддий-техник базаси ҳолатига эътибор қаратилди. Шунингдек, оилавий поликлиникалардаги мутахассисларнинг тўлиқлиги, аҳолига стоматологик хизмат, тез тиббий ёрдам кўрсатиш сифати, ижтимоий дорихоналарнинг ташкил этилиш ҳолатлари кўздан кечирилди. Хусусан, тумандаги “Оқилон” маҳалласи Рахмат Файзий кўчасида бунёд этилган пойафзал таъмирлаш, сартарошхона, нонвойхонанинг ҳанузгача ишга тушмаётгани аҳоли эътирозига сабаб бўлмоқда. Мазкур хизмат кўрсатиш шахобчасининг кадастр ҳужжатлари тегишли ташкилотлар томонидан бугунги кунгача расмийлаштирилмаётгани маълум бўлди. Шахобча ўз фаолиятини бошласа унда 3 нафар ёшлар иш жойига эга бўлишади. Ушбу ҳолатга ойдинлик киритиш бўйича депутат У.Саматов Шайхонтоҳур тумани ва Тошкент шаҳар ҳокимликлари орқали ижобий ечим топишини маълум қилди. “Катта Оқтепа” маҳалласида ҳам қатор муаммолар кўтарилди. Ҳудуддаги “Фотимаи-Заҳро” жоме масжиди учун автотураргоҳ ташкил этиш, Мажлисий кўчасидаги 118-уй олдидаги пиёдалар йўлагини таъмирланишида амалий ёрдам сўраб, маҳалла раиси С.Умаров томонидан қайта-қайта қилинган мурожаатлар мутасаддилар томонидан жавобсиз қолаётгани аниқланди. Яқин вақт оралиғида депутат кўмаги билан ушбу муаммо бартараф этилса, йўл ҳодисаларининг олди олиниб, аҳоли учун яна бир қулайлик яратилган бўлар эди. Шунингдек, ўрганиш жараёнида “Оқилон” маҳалласининг Кўкча Дарвоза, “Маннон Уйғур” маҳалласининг Нурфайз, Улуғбек, “Кўкча” маҳалласидаги 71-, 111-сонли мактабгача таълим муассасасига кирувчи ҳамда Аҳил, Қўрғонча кўчаларининг ички йўлларини, “Кўкча Дарвоза” маҳалласининг Кўкча тор кўчасида пиёдалар йўлагини таъмирлаш лозимлиги кузатилди. “Маннон Уйғур” маҳалласининг Беҳзод, Қизилғунча берк кўчаларида электр токи босимини кўтариш, 71-, 111-сонли МТМ, 192-умумтаълим мактабининг кўчаларига светафор ўрнатиш, пиёдалар чизиғини ташкиллаштириш жоизлиги кўзга ташланди. Албатта, бу каби ҳолатлар фуқаролар ва транспортларнинг ҳаракатланишида ноқулайликларни юзага келтирмоқда. Айни дамда депутат тегишли ташкилотлар билан Шайхонтоҳур туманида кўтарилган масалаларни ҳал этиш юзасидан саъй-ҳаракатлар олиб бормоқда.   Зулайҳо ЧЎЛПОНОВА, Ўзбекистон “Адолат” СДП Тошкент шаҳар Кенгаши матбуот котиби Бизни ижтимоий тармоқларда ҳам кузатинг: https://t.me/adolat_uz https://www.instagram.com/adolat_sdp/ https://www.facebook.com/sdpu.adolat/ ...

Батафсил

АЛОҚА

Манзилимиз: Тошкент шаҳри, Чилонзор тумани, Шарқ тонги кўчаси, 23-уй. Мўлжал: Озарбайжон Республикаси элчихонаси:

Телефон: 71-2730731 71-2884654 (139)

Электрон манзил: adolat.sdp@exat.uz

САЙТ ТЕСТ РЕЖИМИДА ИШЛАМОҚДА:

www.adolat.uz веб-сайти 2018 йилнинг 21 май куни электрон ОАВ сифатида давлат рўйхатидан ўтказилган. Гувоҳнома рақами: 1232. Муассис: Ўзбекистон Адолат СДП. Таҳририят манзили: 100043, Тошкент шаҳри, Чилонзор тумани, Шарқтонгги кўчаси, 23-уй. Электрон манзил: info@adolat.uz

Сайт материалларидан фойдаланилганда Фойдаланиш шартларига амал қилиниши шарт. Барча ҳуқуқлар Ўзбекистон Республикасининг оммавийахборот воситалари тўғрисидаги ҳамда муаллифлик ва турдош ҳуқуқлар тўғрисидаги қонун ҳужжатларида белгиланган тартибда ҳимояланган

#

Мурожаатингиз учун рахмат!