Устувор вазифалар белгилаб олинди

Хоразм вилоят Ёшлар агентлигида партиянинг Урганч шаҳар "Ёш адолатчилар қаноти"нинг IV- ҳисобот-сайлов Конференцияси бўлиб ўтди.

Конференция кун тартибида  "Ёш адолатчилар" қанотининг  2015-2019 йиллардаги фаолияти ва галдаги вазифалар" ҳамда ташкилий масалалар кўрилди.

Кун тартибидаги  биринчи масала юзасидан “Ёшлар қаноти” раиси Нодира Олимаванинг 5 йиллик ҳисобот маърузаси тингланди. 

Таъкидланганидек, Урганч шаҳар Кенгашининг  5 минг 345 аъзосидан   40% ёшларни ташкил этиб, фаол ёшлар саъй-ҳаракати билан партиянинг дастурий ғоялари, мақсад ва вазифалари  ҳамда 30 га яқин ҳаётий ва халқчил лойиҳалари фаоллик билан  ҳаётга татбиқ этилмоқда.

Жумладан, “Ватан келажаги ёшлар қўлида!”, “Мактабда ижтимоий тенглик”, “Талабанинг кичик инновацион корхонаси”, “Фарзандлари соғлом юрт қудратли бўлур” каби ўнлаб халқчил лойиҳаларни ижросини таъминлашда фаол ёшлар намуна кўрсатиб келмоқдалар. Хусусан, 2016 йилдан  анъанага айланган ва юртдошларимиз томонидан илиқ кутиб олинган партиянинг  “Фарзандлари соғлом юрт қудратли бўлур”  лойиҳаси доирасида “Ёш адолатчилар” қаноти ташаббуси билан  156 та тарғибот тадбирлари амалга оширилиб, шундан 87 таси ОАВ орқали мунтазам ёритилган.

Мазкур лойиҳа доирасида ҳар йили миллий кураш мусобақалари ташкил этилган ва  ғолиблар партия томонидан эсдалик совғалари ва фахрий ёрлиқлар билан тақдирланган. Шунингдек, ҳафтанинг ҳар сешанба куни “Ёшларнинг сиёсий билимларини ошириш устувор вазифа” мавзусида 325 та  семинар, давра суҳбатлари ташкил этилган, ҳар чоршанба куни  эса партия фаолиятида “Маҳалла ўрганиш” деб белгилангани муносабати билан  уюшмаган ёшлар билан 243 марта давра суҳбатлар ўтказилган ва муаммолар ўрганилган, 1780 та ёшлар муаммолари аниқланиб, шундан 1680 таси ижобий ҳал этилган.

Ўзбекистон Республикаси Президентлигига ҳамда Олий Мажлис Қонунчилик палатаси ва Халқ депутатлари ҳудудий Кенгашларга бўлиб ўтган сайловларда  ҳам ёшларнинг фаоллиги сезиларли ошганини қайд этиш жоиздир. 2017-2019 йиллар давомида Урганч шаҳар Кенгаши “Ёш адолатчилар” қаноти раиси вазифасида фаолият юритган Равшанбек Жуманиёзов шаҳар Кенгаши депутати бўлди. Жорий йилда бўлиб ўтган Олий Мажлис Қонунчилик палатаси қошида ташкил этилган “Ёшлар парламенти” аъзолигига  бўлиб ўтган сайловда  ёш адолатчи Нодира  Олимова ғолибликни қўлга киритди ва айни пайтда ёшлар орасида  фаолиятини бошлаб юборди.

Сўзга чиққанлар томонидан эришилган ижобий ютуқлар билан бир қаторда йўл қўйилган хато ва камчиликларни ҳал этиш чора-тадбирлари ҳам қайд этиб ўтилди. “Ёш адолатчилар” қаноти нинг беш йиллик фаолияти “қониқарли” деб баҳоланди.

Шундан сўнг кун тартибидаги иккинчи масала доирасида “Ёш адолатчилар” қаноти таркиби қайтадан шаклланди. Партиянинг Урганч шаҳар “Ёш адолатчилар” қаноти раиси этиб “Ёшлар парламенти” аъзоси Нодира Олимова қайта сайланди.

Йиғилиш сўнгида кўрилган масалалар юзасидан тегишли қарорлар қабул қилинди.

                                                                                                             Замира АБДУЛЛАЕВА,

                                                                                                       Ўзбекистон “Адолат” СДП

                                                                              Хоразм вилоят Кенгаши матбуот котиби