Онкологик касаллиги бор аёл ўзи каби беморлар учун нафақа миқдорини чеклашни бекор қилиш таклифини берди

Н.П. 2000 йилдан буён кўкрак саратони хасталиги билан оғриб келади. 2002 йили эса турмуш ўртоғи билан расман ажрашишга мажбур бўлган. Ҳозирда 2 нафар қиз фарзандини турмушга узатиб юборган бемор ёлғиз ўзи, боқувчи қарамоғисиз яшамоқда. Боз устига, шифокор яқинда жигар церрози ташхисини ҳам қўйган. Ёлғиз аёл давлат томонидан ажратилган 400 000 сўмлик нафақани қиммат-қиммат дориларига  етказиш у ёқда турсин кундалик бирламчи зарур эҳтиёжларни ҳам қопламаслигини маълум қилди. Аёл билан суҳбатлашилганда унинг ҳолатини кўриб, наҳотки шу пайтгача кўкрагини кериб юрган неча масъуллар ёрдам қўлини чўзишмаган бўлса, деб ўйланади киши. Афсуски, бемор Н.П.га мурожаат қилиб борган Халқ қабулхоналари-ю, прокуратура органлари, ҳудудий сектор ташкилотларининг бирортаси кўмак бермасдан, турли хил важлар битилган рад жавобларини жўнатишдан бошқа нарсани билишмади. Шу ўринда, Н.П. ўзи каби беморларнинг битта эмаслигини ва бу каби касаллик учун нафақа миқдорини бир маромда чеклаб қўйиш нотўғрилиги боис, қонунчиликда ўзгартириш киритиш лозимлиги бўйича ўз таклифини берди.

Карантиндан сал аввалроқ 37-Қурувчилар округидан сайланган Халқ депутатлари Тошкент шаҳар Кенгаши депутати Баҳром Валиев Яшнабод туман Халқ қабулхонасида ўрганишлар олиб борганида ушбу бемор мурожаатига ҳам дуч келган эди. Депутат бемор аёл ҳолати бўйича қатъий ўрганишлар олиб борганидан сўнг эндиликда бу муаммони навбатдаги сессия кун тартибига киритиб, мурожаатга асосан онкологик хасталиги борлар учун нафақа миқдорини чеклаб қўйишни бекор қилиш ҳамда дори-дармонларнинг бепул берилиши таклифини илгари суриш саъй-ҳаракатида. Сессиянинг тегишли қарори чиқарилишига эришилгач, мутасадди ижро органлари ўз-ўзидан Н.П. каби беморларнинг ҳожатини раво қилишдан бўйин товлай олмайдилар.

Меҳринисо БОБОНАЗАРОВА

Ўзбекистон “Адолат” СДП

Тошкент шаҳар Кенгаши

матбуот котиби