ХУЛОСА ҳар кимнинг ўзидан

Қадрли газетхон! Бизда иккита янгилик бор: бири яхши, иккинчиси ёмон. Қай биридан бошлашга иккиланиб турибмиз.

Хуллас, яхшисидан бошласак.

“Халқ таълими вазирлиги тасарруфидаги Филология фанларига ихтисослаштирилган давлат умумтаълим мактабининг 11-“А” синф ўқувчиси Аъзамжон Аъламов АҚШнинг нуфузли WIDENER университетига грант асосида ўқишга қабул қилинди”, деб ёзилади хs.uz сайтида.

Маълум қилинишича, Аъзамжонга йўлланган расмий мактубда унга йилига 30 000 АҚШ доллари, 4 йилга жами 120 минг АҚШ долларига тенг WIDENER университети Президент стипендияси тақдим этилиши кўзда тутилган. Шунинг­дек, Аъзамжонга йилига 3000 АҚШ доллари миқдорида глобал ривожланиш стипендияси топширилиши ҳам билдирилган. У энди ўзи танлаган йўналиш — ахборот технология­лари бўйича АҚШнинг WIDENER университетида таълим олишни мақсад қилган.

Кези келганда айтиш керак, ижтимоий тармоқдан ушбу йигитимизнинг исми шарифи билан очилган шахсий профилни излаб қилган ҳаракатимиз зое кетди. Демак, келажакда ахборот технологиялари бўйича мутахассис бўлишни ният қилган ҳамюртимиз ўзининг қимматли вақтини беҳуда ўтказмайди. Диққатимизни тортган жиҳатга сиз ҳам эътибор қаратингга, Аъзамжон ҳақидаги хабар тарқалган барча интернет сайтларида ўқувчимиз ўзимизникилар топширган “Фахрий ёрлиқ” билан суратга тушган...

Энди иккинчи хабар билан танишинг:

Ижтимоий тармоқларда тарқалган хабарларда айтилишича, самарқандлик икки мактаб ўқувчиси “Tik Tok”да “лайк” йиғиш учун ўзларини томдан ташлаган. Улардан бири энди бир умр ногирон бўлиб қолиши мумкин

 “Мен дўстим билан “Tik Tok” ижтимоий тармоғига қизиқиб, профиль очдик. Обуначиларимизни кўпайтириш мақсадида иккаламиз томга чиқдик ва томдан ўзимизни ташладик.

Дўстим ҳозир шифохонада, шифокорларнинг айтишича, у оёққа турмаслиги ҳам мумкин экан. Энди “Tik Tok”га кирмасликка ҳаракат қиламан”, — дейди ўзини томдан ташлаган йигитлардан бири.

Хулосани сиз, азиз ўқувчилардан кутиб қоламиз.

Ҳа, айтганча, яна бир янгилик бор. Бироқ уни яхшиям деб айтолмаймиз, ёмон ҳам. Пойтахтимиздаги савдо марказларидан бирида “Тik Ток учун телефон” акцияси эълон қилинибди...