Озодалик посбонларига эҳтиром

Орамизда шундай касб эгалари борки, машаққатли меҳнатлари қаҳрамонликка лойиқ. Эрталабдан ишга, ўқишга томон йўл олар эканмиз супирилган озода кўчалар, йўл ёқасида очилиб турган чиройли турфа хил гулларни кўриб кўзимиз қувнайди.

Ана шунда ободонлаштириш бошқармаси ходимлари кўзимга озодалик, саришталик посбонидай кўринади. Шу онда онамнинг насиҳатларини хотирлайман: “Болам, ернинг юзини очсанг, уни тозаласанг, ер: “Сен менинг юзимни очдинг, Оллоҳим сенинг бахтингни очсин,” деб дуо қилади деб уқтирар эди. Ўша пайтларда ёшлик қилиб бу гапларнинг маъносига кўпам тушуниб етмасдим. Энди англаяпманки ёши улуғларимизнинг бу ўгитлари супуриш-сидириш, орасталик озодалик билан бирга меҳнатсеварлик, камтарлик ва ўзгалар меҳнатини қадрлашга ҳам ўргатар экан. 

Ана шундай касб эгалари меҳнатини қадрли эканликларини кўрсатиб бериш мақсадида Ўзбекистон “Адолат” СДП Самарқанд вилоят Кенгаши ташаббуси билан партиянинг Самарқанд шаҳар Кенгаши томонидан шаҳар ҳокимлиги Ободонлаштириш бошқармаси ҳамкорлигида хайрия акцияси ташкил этилди. Тадбирда партиянинг вилоят, шаҳар кенгаши вакиллари, маҳаллий кенгаш депутатлари, партия фаоллари, ободонлаштириш бошқармаси ходимлари ҳамда ОАВ вакиллари иштирок этди.

Партиянинг “Тозалик йўлида бирлашайлик” лойиҳаси доирасида озодалик, саришталик посбонлари бўлган ободонлаштириш бошқармаси ходимларини рағбатлантириш, аҳоли орасида покизалик, озодаликни асраш каби азалий қадрятларимизни кенг тарғиб этиш билан бирга меҳнатсеварлик, камтарлик ва ўзгалар меҳнатини қадрлаш туйғусини кенг тарғиб этишга қаратилган ушбу тадбир Самарқанд шаҳрининг 5 та ҳудудида ташкил этилди.

Сиёб, Боғишамол, Боғибаланд, Темирйул ҳудудлари ҳамда Қорасув масканида шаҳримиз ободлиги, озодалиги, кўкаламлаштиришда ўз меҳнатларини аямай фидойилик кўрсатиб келаётган Самарқанд шаҳар ҳокимлиги Ободонлаштириш бошқармаси ходимларига озиқ овқат маҳсулотлари топширилди. 8-март Халқаро хотин-қизлар куни муносабати билан соҳада фаолият юритиб келаётган хотин-қизларга байрам совғалари улашилди. 

Ҳеч эътибор берганмисиз кўчалар, хиёбонлар, йўлаклар бир кун тозаланмаса, турли қоғоз ва чиқиндилар, оёқ кийимига ёпишган чанглардан кўнгилга бир нохушлик чўкади. Шундай пайт кўнгилдан қани энди ҳамма ёқ озода, саришта, тоза бўлса эди, деган фикр кечади. Ана Шундагина бу касбнинг нақадар муҳимлигини, аҳамиятлилигини яна бир карра тушуниб етасиз. Тадбиримиз қаҳрамонлари қаҳратоннинг совуғию саратоннинг жазирамаси бўлмасин, эрта тонгданоқ ёшу қари ширин уйқудалигида аллақачон ўз вазифасини бажаришга киршадилар. Қишнинг изғиринли кунлари, баҳор-кузнинг чанг тўзонли, ёмғирли онлари, ёзнинг жазирамалари уларнинг қадоқ қўлларига, офтобдан қорайган юзларида, вазмин боқишларида акс этади гуё.

Анча вақтдан буён кўнглимизда тугиб юрган истак озодалик посбонларига озроқ бўлсада қувонч улашиш ниятимиз партиямиз фаолларининг ҳам эътиборидан четда қолмади, партиямиз фаоллари, маҳаллий кенгаш депутатлари бирдамликда шундай тадбир ташкил этишга келишдик.

Бугун эрта тонгда ушбу хайрли ишни амалга ошириш учун йўлга чиқар эканмиз кўнглимда ўзгача ҳаяжон бор эди. Озодалик посбонларининг иш жараёни пайтида бордик, суҳбатлашдик. “Раҳмат шундай тадбирлар кўпроқ бўлсин”, “30 йил ишладим аёллар байрамига сизлардек бошқа ташкилотлардан совға эътибор кўрмаган эдим.”, “Бизларни ҳам телевизорда кўрсатишадими?” деган содда, самимий сўзларини  тинглар эканман бугунги кунимдан кўнглим тўлиб, қушдек енгил бўлиб учиб юрдим гуёки.

Дилафруз Жониқулова, ободонлаштириш ходими - шу соҳада 31 йилдан буён ишлаб келяпман. Тўғри тушунаман ҳар хил инсонлар бор. Кимдир бизга, меҳнатимизга эътибор қаратиб қадрласа, шундайлар ҳам борки меҳнатимизни оёқ ости қилиб, масхара қилгандек ўтишади. Бунга эътибор бермайман, чунки ҳалол меҳнатим билан оиламга пул олиб киряпман. Бугунги эътиборларингиздан жуда хурсанд бўлдим. Тўғри ҳозир давлатимиз, бошқармамиз, ҳокимликларимиз томонидан ҳам эътибор қаратиляпти. Аммо, сизнинг ташкилотингиз томонидан қилинган совғалар биз учун кутилмаган бўлди.

Озодалик посбонлари бор экан шаҳримиз кўчалари ораста,  ўқиётган, ишлаётган, яшаётган жойларимиз озода. Тоза-озодалик кайфиятни кўтаради, бошлаган ишда унум сезилади. Уларнинг заҳматли меҳнатлари сабаб шаҳримиз бугун гўзаллик сари юз очмоқда. Уларнинг меҳнатини қадрлайлик.

Зилола Дусанова,

Ўзбекистон “Адолат” СДП Самарқанд шаҳар Кенгаши раиси